Search form

KALATE METATAʼA 13

Abram a bulane Kanaan baa Lot ba kandan

(Sam 112:1-3; Mt 5:9; Yak 3:17-18)

1Abram a nga beta bet, a kôlôʼô Ejipte a kelek e Négéb, Nye, e minga wé a biôme bise a nga bili. Lot a mbe e nsamba wé. 2Abram a mbe étua kum mfaʼa biyem, argent a or. 3A nga kôlô Négéb a kele a tebe zene *zen a kui Bétél, 4e vôm a nga lame *nda éndelé jé atataʼa, e zañe Bétél a Ayi, e vôm ataʼa metunaʼa a nga lôñ éyoñe ya mvus é mbe; a valé ate e nye Abram a nga loone jôé Nti.

5Lot, nyô a mbe e nsamba Abram, a mbe fe a bili mbame bone a beta biyem, nalé fe menda bindelé. 6Si é mbe tyôtyoé asu ya na be tabe vôme wua, amu akume dap e mbe étua abui avale ya na be mbe te nguleya tabe vôme wua. 7Zôʼé é nga boban e zañe bebaʼale mimbame biyem be Abram a bebaʼale mimbame biyem be Lot. Bekananééñ a Beférézieñ be mbe be too si éte melu mete. 8Abram a nga jô Lot na: Ma yeʼelane wo na mewôman me boʼo teke bo e zañe jam a wo, nge zañe bebaʼale biyeme bam a émbôé; amu bi ne bobenyañ. 9Si ése é ne wo ôsu, kandaʼane ñhe ma: nge wo ke mbo ngal, ma ye ke mbo nnôm; nge wo ke mbo nnôm, ma ye ke mbo ngal.

10Lot a nga bete mis a yene njeʼese Yordan ôse ñwô ôse ô mbe ô bili mendim. Valé Nti a ngenane te tyame Sodome a Gômor a kui Sôar, a mbe ane afube Nti, ane si Ejipte. 11E nde ñhe Lot a nga top, asu dé, njeʼese ôse ya Yordan, a ke mfaʼa jôp da tôô, nalé be nga kandan wua a nyô mbok. 12Abram a nga tabe Kanaan; a Lot a nga tabe bitisone ya njeʼese a lame menda bindelé mé mfaʼa ya Sodom. 13Bôte ya Sodom be mbe étua mbia be bôt a bebo *abé mfaʼa Nti.

Mengakaʼa me Nti

(Met 15:18-21; 17:1-8; Mt 5:3)

14Nti a nga jô Abram a koone na baa Lot be kandaneya na: Beteʼe ñhe mis a ataté vôm ô né, fombôʼô mfaʼa yʼakôé a e nké, e jôbe da tôô a jôbe da dim; 15amu si ése ô lôô le, ma ye ve wo je womien a mvoñe bôte jôé nnôm éto. 16Ma ye bo mvoñe bôte jôé ane mbuluk ya si avale ya na ba ye bo te nguleya lañe je avale be se nguleya lañ mbuluʼu ya si. 17Kôlôʼô si, wuluʼu si éte ése, amu ma ye ve wo je. 18Abram a nga lame menda bindelé mé a zu tabe bilône ya Mamré, e fefele Ebroñ. A nga lôñe Nti ataʼa metunaʼa valé.

Bible en langue Bulu

© LʼAlliance Biblique du Cameroun, 2007

More Info | Version Index