Search form

KALATE METATAʼA 16

Agar, abialé Ismaél

(Met 30:1-9; Yb 4:8; Met 21:9-21; Sam 10:14; Mt 7:7-9)

1Sarayi, minga Abram, a nji biaé nye mon. A nga bili mbo ésaé minga, ngone yʼEjipte a too jôé na Agar. 2Sarayi a nga jô Abram na: Mbôlô Nti a nga dibe na me bo te biaé mon, kele ñhe be mbo ésaé minga wom; éko éziñe na ma ye bi monafam be nye. Abram a nga wôʼô tyiñe Sarayi. 3Ane Sarayi, minga Abram, a nga nyoñe mbo ésaé minga wé a mbe ngone yʼEjipte, Agar, a ve nye Abram nnôme wé ane ngal, valé be tabeya mimbu awôm e Kanaan. 4A nga ke be Agar, a a nga nyoñ abum. Eyoñ a nga yene na a ntoo abum, a nga fombô Sarayi mise mʼébiasé. 5Ane Sarayi a nga jô Abram na: Abé da kui be ma e bete wo nlô. Mamien be nga futi e mbo ésaé minga wom abume dôé si, ve éyoñe ji amu a lôô na a ntoo abum, a nga fombô ma mise mʼébiasé. Nti a boʼo *ntyiʼi mejô e zañe bia wo! 6Abram a nga yalane Sarayi na: E mbo ésaé minga wôé a ne e mo môé été: boʼo nye avale wo ye yene mvaé. Eyoñe te Sarayi a nga belane nye *abé, a Agar a nga tup a ke nye ôyap.

7Engele Nti a nga koone nye fefel anjeñe mendim e *nkôte si, fefel anjeñe mendim e ne zene ya Sur. 8Nye na: A Agar, mbo ésaé minga Sarayi, wo so vé a wo ke vé? A nga yalane na: Ma tube Masa minga wom, Sarayi, a ke nye ôyap. 9Engele a nga jô nye na: Bulaʼane be masa minga wôé a suu womiene si asu dé. 10Engele Nti a nga jô nye na: Ma ye fôle mvoñe bôte jôé abui abui, a ba ye bo te nguleya lañe je amu ja ye bo ézuk. 11Engele Nti a nga jô nye na: Tame yen ô ntoo abum;

wo ye biaé monafam

wo ye yôlé nye jôé na Ismaél;

amu Nti a wôʼôya wo ôsame wôé été.

12A ye bo ane éjakase ya fé;

wo wé wo ye tebe bese ngame yat

a wo bese wo ye tebe nye ngame yat

a ye basane bobenyañ bese.

13Ane Agar a nga loone Nti a nga kobô nye jôé na: Ata El Royi, a 14Ajô te be nga yôlé anjeñe te na: Lahayi Royi; b 15Agar a nga biaé monafam; a Abram a nga yôlé nye Ismaél. 16Abram a mbe mimbu 86 éyoñ Agar a nga biaé nye Ismaél.

Bible en langue Bulu

© LʼAlliance Biblique du Cameroun, 2007

More Info | Version Index