Search form

KALATE METATAʼA 20

Abraham a tabe e Gérar

(Met 12:10-20; 26:1-11; Sam 105:12-15)

1Abraham a nga kôlô bilône bi Mamré a ke e si ba loone Négéb; a nga tabe e zañe Kadés a Sur, wôna a nga tabe Gérar. 2Abraham a mbe a jôʼôk ajô ngale na: Kale jame le. Abimélék, njô bôte ya Gérar, a nga wôlé Sara. 3Ajô te Zambe a nga zu be Abimélék e biyeyem alu a jô nye na: Wo ye wu amu minga ô nga wôlé, amu a ne nluʼan. 4Abimélék, nyô a mbe te na a subu Sara bebé a nga yalane na: A Nti ye wo ye wôé ayoñe bôt éziñ toʼo na e ne zôsôôô? 5Ye émien a nji jô me na: Kale jame le, éyoñe minga émiene ke a mbe a jôʼô na: Ndôme jame le? Me mbe me bili e *nlem ô ne zôsôôô a mo me ne teke bijô éyoñe me nga bo jame te. 6Zambe a nga yalane nye biyeyeme na: Ma fe ma tuʼa yeme na éyoñ ô nga bo jame te ô mbe ô bili e *nlem ô ne zôsôôô: ajô te mamien me nga kamane wo na ô bo te bo ma *abé. Ajô te me nji ke ve wo nkañesane na ô nnambe nye. 7Eyoñe ji, bulaʼane minga môt ate; amu a ne *nkulu mejô, a ye yeʼelan asu dôé a wo ye nyiñ. Ve nge wo bo te bulane nye, yeme na wo ye wu a e jôm ése é ne énjôé.

8Abimélék a nga kôlô si ndibe tyé; a nga loone bebo bisaé bé bese a kañete be mam mete mese; a bôte bete bese be nga dañe ko woñ. 9Abimélék a nga loone fe Abraham a jô nye na: Jé ô nga bo bia ji? A za abéé me nga bo wo avale ya tindi bia na bi bo abime beta *abé di, éjôé jam a mamien? O nga bo ma e mam me nji ke yian. 10Wôna Abimélék a nga jô Abraham na: Nkômban ôvé ô nga bili e mboone wuna été? 11Abraham a nga yalane na: Me mbe me jôʼô na teke bisô na nkoone Zambe woñ ô nji bo e vôme nyô, a na ba ye wôé ma amu minga wom. 12Jam afe na, e ne bebela na a ne kale jam ngon ésaa wom, ve da a nji bo ngone nyia wom a a ntoo minga wom. 13Eyoñe Zambe a nga bo me na me ke ma ndeñ ôyab a *nda bôte jam, me nga jô Sara na: Kañeseʼe jô, e mevôm mese bia ye ke na: Me ne ndôme jôé. 14Abimélék a nga nyoñe moné a beta mbame biyem, bebo bisaé be ne befam a ba be ne binga, a a nga ve bie Abraham; a nga bulane fe nye Sara. 15Abimélék nye na: E si jam nje é ne wo ôsu nyô, tabeʼe e vôme wo ye yene mvaé. 16A nga jô Sara na: Ma ve ndôme jôé minsañ mi moné toyini; jame te da ye bo wo éyañese mis asu ba bese mia be be mi né, nalé ate duma dôé da ye bo teke aton. 17Abraham a nga yeʼelane Zambe, nye ve bo Abimélék *mvoʼé, nalé fe minga wé a bebo bisaé be binga, a be nga bo nguleya biaé. 18Amu Nti a nga bibi ndaa Abimélék ése na é bo minkôkôm, amu Sara, minga Abraham.

Bible en langue Bulu

© LʼAlliance Biblique du Cameroun, 2007

More Info | Version Index