Search form

KALATE METATAʼA 22

Izak a veban étyiʼa

(Hé 11:17-19; Yak 2:21-23; 1 Yo 4:9-10)

1Mvus mam mete, Zambe a nga veʼele Abraham a jô nye na: A Abraham! Nye na: Ma nyô! 2Zambe nye na: Nyoñe monafame wôé, atyiʼi monafam, e nyô wo nyeʼe, Izak, kelek e sii Moriya, a e wé, vaʼa nye mveane ba diʼi ngumba e wua ya minkôle ma ye liti wo.

3Abraham a nga kune kôlô si, a mane kôm éjakase jé, a a nga nyoñe bisoé bebo bisaé befame bé bibaé a monafame wé Izak. A nga sale njaʼa asu mvean ô ne ngumba a kôlô a ke e vôme Zambe a nga liti nye. 4E môse lale, Abraham a nga bete mis a nga yene vôm ate ôyap. 5Wôna a nga jô bisoé bebo bisaé befame bié na: Mia, likaʼane va a éjakas, bia ndôman bia ye ke yôbe li asu ya kañ, wôna bia ye beta zu koone mia. 6Abraham a nga nyoñe njaʼa asu mvean ba diʼi ngumba, a nga kee bie monafame wé Izak a beʼe bie, wôna a nga nyoñe nduan a ôtyeñ e wo wé. Be nga wulu bebaane bese nsamba wua. 7Ane Izak a nga kobô ésaa wé Abraham na: A ésaa wom! Nye na: Ma nyô, a mone wom! Izak nye na: Nduan a njaʼa e mbie bi ve mone ntômba asu mvean ba diʼi ngumba a ne vé? 8Abraham nye na: Zambe Emien a ye ve mone ntômba asu mveane ba diʼi ngumba.

Bese bebaane be nga wulu nsamba wua. 9Eyoñe be nga kui e vôme Zambe a nga liti nye, Abraham a nga lôñ ataʼa metunaʼa valé a taʼa njaʼa été yôp. A nga kaʼa monafame wé, Izak a beté nye ataʼa metunaʼa yôp, e njaʼa yôp. 10Wôna Abraham a nga same wo a nyoñ ôtyeñ asu ya tyiʼi monafame wé Izak *tyiñ. 11Ane éngele Nti a nga loone nye yôp a jô na: A Abraham! A Abraham! Nye na: Ma nyô. 12Engele nye na: Te same wo wôé e be ésoé ndôman, a te bo nye jam éziñ; amu éyoñe ji me yemeya na wo ko Zambe woñ, a na ô nji bene ve ma monafame wôé, atyiʼi monafame dôé. 13Abraham a nga bete mis a yene nnôme ntômba e mvuse jé, a tii minlak ésaé; Abraham a nga ke nyoñe nnôme ntômba a ve nye mveane ba diʼi ngumba éjiane monafame wé. 14Abraham a nga yôlé vôm ate na: Adonaé Yiré. Ajô te ba jô môse ya dene na: Jôm ja ye veban e nkôle Nti.

15Engele Nti a nga loon Abraham éyoñe baa e yôp 16a jô na: Ma bele a mamien, nalé Nti a jô na: Amu wo te bo nalé, a na ô nji bene ve ma monafame wôé, atyiʼi monafame dôé, 17ma ye jalé wo a bibotan, a ma ye fôle mvoñe bôte jôé ane ateté é ne yôp a ane nselek ô ne nsaʼa mam. E mvoñe bôte jôé ja ye nyoñe Mbé Anyiine ya tisone besiñe bé, amu wo te ve tyiñe jam mewôk. 18Meyoñ mese ya *si nyô ma ye jô na me bili ébotan amu mvoñe bôte jôé; amu wo te ve tyiñe jame mewôk.

19Abraham a nga kôlô a bulane be bisoé bebo bisaé bié, wôna be nga kôlô si na be ke nsamba e Birséba, amu Abraham a nga too Birséba.

Mvoñe bôte Nakor

(Mink 25:25; Met 24:15)

20Eyoñe mam mete me lôteya, be nga zu kate Abraham foé na: Milka fe a biaya monyoñe Nakor bobefam; 21Uts, e ntôl, Buz, monyañ. Kemuél, ésaa Aram, 22Késéd, Hazô, Pildak, Yidlaf a Betuél. 23Bétuél a nga biaé Rebeka. E bobefame muam Milka a nga biaé Nakor, monyañe Abraham, e mbe le. 24Ebone jé, jôé na Réuma, nye fe a nga biaé *bon: Téba, Gaham, Tahak a Maaka.

Bible en langue Bulu

© LʼAlliance Biblique du Cameroun, 2007

More Info | Version Index