Search form

KALATE METATAʼA 25

Awu Abraham

(1 Minkte 1:32-33; Met 35:28-29; 49:29-33)

1Abraham a nga beta luʼu minga mfe jôé na Ketura. 2A nga biaé nye bobefam ana: Zimran, Yôksan, Medan, Madian, Yisebak a Kua. 3Yôksan a nga biaé Saba a Dedan. Bengone be Dedan be mbe Beakurim. Beletusim a Beleumim. 4Bone be Madian be mbe: Efa, Efer, Hénok, Abida a Elda: Bobefam be Ketura e mbe le bese.

5Abraham a nga ve Izak e biôme bise bi mbe émbié. 6E mfaʼa bone bibone bié a nga faʼé be biôm wôna valé a ngenan a vee, a nga lôme be ôyap a mone wé Izak, e mfaʼa jôbe da tôô, e si ya jôp da tôô.

7E nté ényiñ Abraham ô mbe mimbu 175. 8Wôna Abraham a nga wu. A nga wu mvuse mevaʼa éto nnôm, abui mimbu, melu njalane nyô ne lut, a a nga jambe e vôme bimvame bié bi nga wu bi nga jambe. 9Izak a Ismaél e bobefame bé be nga jame nye mbas akok e Makpéla, afup Efroñ, mone Sôhar, mone Hitit, zoʼone Mamré. 10E mbe afup Abraham a nga Kus e be Behitit. E nne Abraham a minga wé Sara be nga jambe valé. 11E mvus awu Abraham, Zambe a nga botan Izak, e monafame wé, e nye a mbe a too bebé anjeñe Lahayi-Rôyi.

Nkañete Ismaél a *nda bôte jé

(1 Minkte 1:28-31; Met 17:20; 21:17-21)

12E mvoñe bôt Ismaél, e mon Abraham e nye Agar ngone yʼEjipte, mbo ésaé minga Sara, a nga biaé Abraham, e nje nyô. 13Bobefam be Ismaél ô laté a jôé memvoñ me bôte map e mbe ba: Nebayôt, ntôle mone Ismaél, Kédar, Adbeél, Mibsam, 14Mikma, Duma, Masa, 15Hadad, Téma, Yetur, Nafik a Kedma. Bobefam be Ismaél mbe le; 16môé mabe le a minkane miap a minlame miap. Bejôô awôm a bebaé be mbe minlô ya meyoñe map. 17Ismaél a nga nyiñe mimbu 137. A nga suu mvebe a wu, a a nga ke fulan a bimvame bié bi nga wu. 18Beismaélit be nga tabe ataté Havila a kui Sur, e Asiri. Ismaél a nga tabe bobenyañe bé bese yat.

Nkañete Izak a *nda bôte jé

(Rm 9:10-13; Met 38:27-30; Hé 12:16-17)

19Mvoñe bôt Izak, mon Abraham, nje nyô: Abraham a nga biaé Izak. 20Izak a mbe mimbu 40 éyoñ a nga luʼu Rebeka, ngone Betuél, mone Aramééñ ya Padañ-Aram a kale Laban, mone Aramééñ. 21Izak a nga yeʼelane Nti na a mvamane minga wé amu a mbe nkôkôm, a Nti a nga wôʼô meyeʼelane mé. Minga wé Rebeka a nga nyoñ abum. 22Bon be mbe be jimbaʼan abume dé été, a a nga jô na: Jé ja kui be ma? Ane a nga ke yemelan nkômbane Nti 23Nti a nga jô nye na:

Meyoñ mebaé me ne wo abum,

mvoñ bôt ébaé ja ye kandan éyoñe ja ye vame wo abum

mvoñe bôte jia yʼété ja ye bo ngu a dañe nyô fok

ntôl wo ye ke éjôé nyô a ne mongô si.

24Eyoñ a mbeme biaé be nga yene na mimbiase mibaé mi ne nye abum. 25Nyô ôsu a nga vam nyôl ése é too nye e zañ évele a mfôl, é funaʼane alôʼô mimvot; ane be nga yôlé nye jôé na Esô. 26Mvus éte, monyañ a nga vam, wo wé ô bili étimekili Esô; a be nga yôlé nye na Yakob. Izak a mbe mimbu mewôm mesaman éyoñe be nga bialé.

27Bobefame bete be nga yaé. Esô a mbe ñyeme nsôm, môta mefan; ve Yakob a mbe môt a too ne séé, a mbe a nyekeʼe a too e menda bindelé si. 28Izak a mbe a nyekeʼe Esô, amu a mbe a nyekeʼe a di tit; a Rebeka a mbe a nyekeʼe Yakob.

29Môs éziñ Yakob a mbe a yamek étutuʼa, Esô ve so nsôm, ateʼe nyôl ne botok. 30Esô nye Yakob na: Jôkéʼé ma, ma yeʼelane wo, na me di ngabe ya évele jôme te, amu ma wôʼô ateʼe nyô. Ajô te be nga yôlé Esô jôé na Edom. 31Yakob nye na: Kuʼane ma môse wu éto ntôl. 32Esô a nga yalane na: Ma nyô me nga ye wu, éto ntôl te ja volô ma jé? 33Ane Yakob a nga jô na: Tatéʼé kane me ngana. E nde a nga kane nye ngana a kuan éto ntôle jé be Yakob. 34Eyoñe te Yakob a nga ve Esô belet a étutuʼa kôôn. A nga di a nyu, mvus éte a nga kôlô si a ke. Avale te nde Esô a nga biasé éto ntôl.

Bible en langue Bulu

© LʼAlliance Biblique du Cameroun, 2007

More Info | Version Index