Search form

KALATE METATAʼA 28

1Izak a nga loone Yakob, a botane nye a ve nye abendé di: Wo ye bo te luʼu ngone ya Kanaan. 2Kôlôʼô si, kele Padañ-Aram, e be ésaa nyua, a nyôñek minga ya luʼu wé e be bengone be Laban, ndôme nyua. 3Zambe a ne ngul ése a botaʼane wo, a boʼo wo na ô fôé, ô bi abui mvoñe bôt, nalé ate wo ye bi étitibe *meyoñ me bôt! 4A vaʼa wo ébotan Abraham, womien a mvoñe bôte jôé, nalé ate wo ye bi e si ô too ane *ntabe, e nje Zambe a nga ve Abraham. 5Ane Izak a nga bo ñhe na Yakob a ke Padañ-Aram e be Laban, e mone Betuél, mone Aramééñ, ndôme Rebeka, nyia Yakob a Esô.

6Esô a nga yen na Izak a nga botane Yakob a na a nga lôme nye Padañ-Aram asu ya luʼu minga wé, a na éyoñ a nga botane nye a nga ve nye abendé na: Wo ye bo te luʼu ngone ya Kanaan. 7Yakob a nga bo ésaa a nyia mewôk, a a nga ke Padañ-Aram. 8Nalé ate Esô a nga yene na ésaa wé Izak a nga yene bengone ya Kanaan *abé. 9Eyoñe te Esô a nga ke be Ismaél, a nga luʼu Mahalat ngone Ismaél, mone Abraham a kale Nebayôt e binga bevoʼo yôp.

Ñyenan Ôbet

(Oz 12:13; Met 35:1-15; Yo 1:52; Rm 5:20)

10Yakob a nga kôlô Birséba a ke Harañ. 11A nga kui vôm éziñ a lôt alu valé, amu valé jôp e dimeya. A nga nyoñe da ya mekoʼo me mbe vôm ate a beté nlô été yôp, a bômbô vôm ate. 12A nga yeme biyeyem a yene na Ôbet ô tele si, sôsoʼo jé é nambeʼe yôp, beéngele be Nti be betek a be sisik été. 13Vʼétua jame na Nti a mbe ôbete te yôp, nye na: Me ne Nti, e Zambe Abraham ésoo, a e Zambe Izak. E si ô bôô le, ma ye ve wo je a mvoñe bôte jôé. 14Mvoñe bôte jôé ja ye bo teke alañé ane mbuluʼu ya si; wo ye ke mfaʼa jôbe da dim a mfaʼa jôbe da tôô, akôé a nké. Menda me bôte mese ya *si nyô ma ye bi ébotan e be wo a e be mvoñe bôte jôé. 15Tame yen, mamien me ne a wo a ma ye baʼale wo e vôm ase wo ye ke a ma ye bulane wo e vôme nyô; amu ma ye bo te liʼi wo nté me ngenane te tôé e jame ma jô wo.

16Yakob a nga vee ôyo vié a jô na: E ne foʼo na Nti a ne vôme nyô, ve ma ma be teke yeme nalé! 17A nga ko woñ a jô na: E vôme nyô a ne ékowoñ! A nji bo jôm éfe ve *nda Zambe, a ne *mbé ya yôp! 18Yakob a nga kune kôlô si a nga nyoñ akok a nga futi e nlô wé si, a nga telé de ane ndem a sôé mbon abôbôn yʼété yôp. 19A nga yôlé vôm ate na Bétél, ve jôé tison e nga taté bo na Luz. 20Yakob a nga tiñeti na: Nge Zambe a ne a ma, nge a baʼale ma e zene ma ke, nge a ve ma bidi ya di a mengômesane ya jaé; 21a nge me bulane *mvoʼé e ndaa ésaa wom, éyoñe te Nti a ye bo Zambe wom. 22Akoʼo ma te telé ane ndeme di, da ye bo *nda Zambe. Ma ye ve wo *ngab awômô ya biôme bise wo ye ve ma.

Bible en langue Bulu

© LʼAlliance Biblique du Cameroun, 2007

More Info | Version Index