Search form

KALATE METATAʼA 29

Yakob e be Laban

(Oz 12:13; Bm 14:10-13)

1Yakob a nga beta taté dulu a ke e sii bone ya jôbe da tôô. 2A nga yen anjeñ afan mimbame mi bone biyeme milaa mi vule minkan e fefele valé. Amu e nne be mbe be vaʼa mimbame biyem mendime ya nyu anjeñe te. Ve akoʼo da dib anjeñ e mbe anen. 3Mimbame biyem mise mi mbe mi sulaʼane valé, be mbe be fenekeʼe akoʼo da dib anyu anjeñ, be mbe be vaʼa mbame bone biyeme mendim a nyu, a be mbe be betaʼa futi akok e vôme wé anyu anjeñ. 4Yakob a nga jô bebaʼale biyeme na: A bobejañ, mi ne bôte ya vé? Be nga yalane na: Bi ne bôte ya Harañ. 5Nye be na: Ye mia yeme Laban e mone Nakor? Be nye na: Yaa bia yeme nye. 6A nga jô be na: Mia te liʼi nye aya? Be nga yalane na: A ne *mvoʼé! Ngo jé le ja zu, Rachél, a mbame bone biyem. 7Yakob nye na: Môs ô ngenan abui; éyoñe ya sulane mbame biyem é ngenane teke kui, vaʼane mbame bone biyeme mendim, wôna kelan a boʼone na be di. 8Be nga yalane na: Bi se nguleya bo nalé e nté mimbame mise mi ngenane teke sulane vôme wua; éyoñe te nje ba feneke akok da dib anyu anjeñ a nyuu mbame bone biyeme mendim.

9A ngenan a kobôʼô be e teme na Rachél a nga zu a mbame bone biyem ésaa: amu a mbe mbaʼale biyem. 10Eyoñe Yakob a nga yene Rachél, ngone Laban, ndôme nyia, a mbame bone biyeme Laban, a nga subu bebé a feneke akok e mbe anyu anjeñ a nyuu mbame bone biyeme Laban. 11Wôna Yakob a nga latane Rachél anyu, a taté na a yôn. 12Yakob a nga kate Rachél na a mbe évuvuman ésaa wé, na a mbe mone Rebeka. A nga mate mbile ya ke kate de ésaa wé. 13E nné ane Laban a nga nyoñe foé nsoone Yakob, mone kale jé, a nga tôbane nye mbil, ve bametane nye toé a wubane nye, a nga kee nye *nda jé, a Yakob a nga kate Labane mam mese. 14Eyoñe te Laban a nga jô nye na: E ne foʼo na ô ne jôme ya bivese biam a minsône miam.

Léa a Rachél

(Oz 12:13; Bm 14:10-13)

Yakob a nga tabe be Laban ngume ngon. 15Wôna Laban a nga jô Yakob na: Mbôlô ô ne évuvumane jam, ye wo saane ma zesé? Kate ma jôme wo kômbô ane maʼan. 16Nde Labane ke a nga bili bengone bebaé: Ntôl ô mbe jôé na Léa, ébatane ke na Rachél. 17Mise me Léa me mbe minkieñ, ve Rachél a mbe étua abeñ. 18A Yakob a mbe a nyekeʼe Rachél, ane a nga jô na: Ma ye saane wo tañe mimbu zamgbwa, asu Rachél, ngo jôé é ne mongô. 19Labane nye na: Ma dañe yene mvaé ya ve wo nye a lôte na me ve nye môte mfe. Tabeʼe be ma! 20Nalé ate Yakob a nga saé mimbu zamgbwal asu Rachél. Mi mbe e mise mé ane abe melu, amu a mbe a nyekeʼe nye.

21Mvus éte, Yakob a nga jô Labane na: Keʼe ma minga wom, amu éyoñe mboon ésaé jam é kpwaneya, a ma kômbô ke be nye. 22Laban a nga sulane bôte bese ya vôm ate a bo beta dina. 23Mamengôʼé a nga nyoñe ngo jé Léa a ke je be Yakob nye ke ve lañe nye melu. 24Laban a nga ve mbo ésaé minga wé Zilpa e be ngo jé Léa. 25Tyé kpwaa, Yakob a nga yene na a mbe Léa. A nga jô Labane na: Jé wo te bo ma ji? Ye me nji saé be wo asu Rachél? Amu jé wo te duʼu ma? 26Laban nye na: Nalé a nji bobane be bia na be taté ve ébatan aluk ntôl ô liʼi. 27Sondôʼô sondô a nyôna, a bia ye fe ve wo nyô mbok mvus ésaé, wo ye beta bo be ma tañe mimbu mife zamgbwa.

28Yakob a nga bo nalé a mane sondô baa Léa; mvus éte Laban a nga ve nye ngo jé Rachél a bo minga wé. 29Laban a nga ve mbo ésaé minga wé Bila a bo mbo ésaé minga ngo jé Rachél. 30Yakob a nga lañe fe Rachél melu, nyô a nga nyeʼe a dañe Léa; wôna a nga beta saé be Laban mimbu mife zamgbwal.

Bone be Yakob

Sam 127:3; Met 40:1-43

31Nti a nga yene na Léa a mbe nlulup, e nde a nga bo nye na a fôé, a bo ke Rachél nkôkôm. 32Léa a nga nyoñ abum a biaé monafam a yôlé nye jôé na Ruben, amu a nga jô na: Nti a yeneya ôsame wom, a éyoñe ji, nnôme wom a ye nyeʼe ma. 33A nga beta nyoñ abum a biaé monafam. Nye na: Nti a wôʼôya na me ne nlulup, a veya fe ma nyôna. A nga yôlé nye jôé na Siméoñ. 34A nga beta nyoñ abum a biaé monafam. Nye na: Eyoñe jina ñhe nnôme wom a ye kabetane ma amu me biaya nye bobefame belaa. Ajô te be nga yôlé nye jôé na Lévi. 35A nga beta nyoñ abum a biaé monafam. Nye na: Eyoñe ji, ma ye kañe Nti. Ajô te be nga yôlé nye jôé na: Yuda. Eyoñe te abiaé dé e nga tebe.

Bible en langue Bulu

© LʼAlliance Biblique du Cameroun, 2007

More Info | Version Index