Search form

KALATE METATAʼA 47

Yôsep a *nda bôt ésaa e be Faraoñ

(Met 46:31-34; 45:7,10,11; Sam 103:15-18)

1Yôsep a nga ke kate Faraoñ foé a jô nye na: Bobejañ a ésaa wom be soya Kanaan, a mbame bone biyeme wop a wu beta biyeme wop, a biôme bise bi ne émbiap, a e mbe bana be ne Gôzen. 2A nga nyoñe betane ya bobenyañ a zu liti be Faraoñ. 3Faraoñ a nga jô bobenyañ be Yôsep na: Za avale bisaé mia bo? Be nga yalane na: Bebo bisaé bôé be ne bebaʼale mbame bone biyem, avale bʼésaa bangan be mbe. 4Be nga beta jô Faraoñ na: Bi ne nsoone ya bo mintabe e si jôé, amu teke fe bidi ya di asu mbame bone biyem bebo bisaé bôé, amu zaé ja jeme mvé e Kanaan; vaʼa ñhe ngule na bebo bisaé bôé be tabe e Gôzen. 5Faraoñ a nga jô Yôsep na: Esoo a bobenyoñ ba te zu be wo. 6Si yʼEjipte é ne e mo môé; toʼé ésoo a bobenyoñ éfase si ja dañ abeñ. Be tabeʼe e Gôzen; a, nge wo yeme na bôte ya tabe be ndi be ne be be, teléʼé be ane bejôô mimbame biyeme miam.

7Yôsep a nga zuu ésaa a liti nye Faraoñ; a Yakob a nga botane Faraoñ. 8Faraoñ a nga jô Yakob na: Mimbu yʼényiñe jôé mi ne miañembé?

9Yakob a nga yalane Faraoñ na: Mimbu mi ényiñe jam tee ngum étabaʼa mi ne 130. Mimbu yʼényiñe jam mi mbe étun a *abé, mi nji ke kui mimbu mi ényiñe bʼésaa bam, e nté be nga nyiñ tee ngum étabaʼa. 10Yakob a nga beta botane Faraoñ a kôlô vôm a mbe. 11Yôsep a nga jéé ésaa a bobenyañe bé éto, a nga ve be ngabe si e si yʼEjipte, éfase si ja dañ abeñ, e sii Ramzés, avale Faraoñ a nga bendé. 12Yôsep a nga ve biôm asu mebelan mʼésaa wé, me bobenyañe bé, me *nda bôt ésaa wé ése, aval ane tañe *bon é mbe.

Njôane Yôsep Ejipte

(Met 41:30-36,48-57)

13Belet ya di é nji fe beta bo Ejipte ése, amu mfumbale zaé a mbe étua adit; Ejipte a Kanaan be nga wu amu mfumbale zaé. 14Yôsep a nga toʼé moné ase a mbe Ejipte a e Kanaan, mvol a fôn ése be mbe be Kusuk; a nga bo na be nyiñeli moné ate e *nda Faraoñ. 15Eyoñe moné yʼEjipte a nyô ya Kanaan a nga man, bôte bese yʼEjipte be nga zu be Yôsep be jôʼô na: Vaʼa bia belet! Ye bia yiane wu ô too amu na moné a jeñemban? 16Yôsep nye na: Vaʼane mimbame biyeme mienan a ma ye ve mia belet, mvol a biyeme bienan, mbôlô moné a jeñemban. 17Be nga soo biyeme biap be Yôsep, a Yôsep a nga ve be belet, mvol a bikabela, mimbam mi bone biyem a beta biyem, a bijakas. Nalé ate a nga ve be belet mbu ôte mvol a mimbame biyeme miap mise.

18Eyoñe mbu ôte ô maneya, be nga zu be nye, e mbu ô nga tôñe valé, a jô nye na: Bia ye bo te solé masa na moné a maneya, a na bi nga soo masa mimbame biyem, a liʼiya bia, asu masa, ve menyôle mangan a mesi mangan. 19Ye bia yiane wu ô lôô, biabebien a mesi mangan? Kuse bia a mesi mangan, mvol a belet, a bia ye bo belo be Faraoñ, bia a mesi mangan, vaʼa bia jôme ya bé si, ane bi ne ke ôsu a nyiñ a bo te wu, nalé ate mesi mangan ma ye bo te bo bilik. 20Yôsep a nga kuse mesi mese yʼEjipe asu Faraoñ, amu bôte yʼEjipte be nga kuan, môt ase afube dé, amu mfumbale zaé a mbe a bametaʼane be. Si é nga suʼulane bo e jôme Faraoñ. 21A nga ke a tooé bôt e bitison, ataté akuʼu di a kui di avoʼo ya minné mi si yʼEjipte. 22Ve a nji ke kuse mesi betuni, amu njôane Faraoñ éziñ ô mbe ô too *mvoʼé asu betuni, e mbe be mbe be nyiñik amu njôane Faraoñ a nga jô mfaʼa wobe te. 23Yôsep a nga jô bôte na: Me maneya kuse mia den a mesi menan asu Faraoñ; mvoñ, asu denan, e nje nyô; mi ne nguleya futi mvoñ e mesi. 24Eyoñe nkôane bidi, mia ye ve Faraoñ ngabe tañe yʼété, mia ye nyoñe mengabe menyine mevok asu ya bé mefube menan, asu bidi bienan, bi bôte be too menda menan a bone benan. 25Be nga jô na: Wo bulane ve bia ényiñ! Bi biya mvolane masa a bia ye bo belo be Faraoñ. 26Yôsep a nga bo na jame te é tilibane ngume njôan, e ñwô ô tabeya a kui môse wu, asu mesi yʼEjipte: Ngabe tane ya nkôane bidi é ne asu Faraoñ; mesi betuni étam e mme me nji bo e ma me Faraoñ.

Asuʼulan ényiñe Yakob Bibotane bi Efrayim a Manasé

(Met 49:29-32; 50:4-13)

27Israél a nga tabe Ejipte, éfuse si ya Gôzen. Be nga nyoñe je é bo énjap. Be nga fôé a bo abui abui. 28Yakob a nga nyiñ Ejipte mimbu awôm a zamgbwa; tañe mimbu ése yʼényiñe Yakob é mbe 147. 29Valé melu me Israél me nga lumbu memané; a nga loone mone wé Yôsep a jô nye na: Nge wo kômbô bo ma mbamba jam, ma yeʼelane wo na, futiʼi akule wo dôé *abé dame si, litiʼi ma *mvam a zôsôôô: ma yeʼelane wo na te jame ma Ejipte! 30Eyoñe ma ye wu, wo ye kôlô ma Ejipte a ke jame ma e soñe bʼésaa bam. Yôsep a nga yalane na: Ma ye bo e jame wo jô ma. 31Yakob nye na: Kane ma de ngana. A Yôsep a nga kane nye de ngana. Ane Israél a nga ve nye akéva a kute meboñe si abôlaʼa nlô yʼénoñe jé.

Bible en langue Bulu

© LʼAlliance Biblique du Cameroun, 2007

More Info | Version Index