Search form

KALATE METATAʼA 49

Bibotan bi Yakob e be bobefame bé awôm a bebaé Awu Yakob

(Dt 33)

1Yakob a nga loone bobefame bé a jô na: Sulaʼane vôme wua, a ma ye kate mia mam ma ye kui be mia melu ma zu.

2Sulaʼane vôme wua, vôʼôlaʼan

mia bobefame be Yakob!

Vôʼôlaʼan Israél ésoo wônan!

3Wo, Ruben, ntôle mone wom,

ngule jam a *bembômô ya ngule fame jam.

Oyabe yôp mfaʼa ya éjijin, a ôyabe yôp

mfaʼa ya éwôlô.

4Ayok ane mendim, ve wo ye bo te dañe bôte bevok,

ô nga ve énoñe jame mvin,

éyoñ ô nga dañ été.

5Siméoñ a Lévi, be ne bobenyañ,

atyeñe dap e ne bivôle bi njet.

6Nsisime wom ô boʼo te nyoñe ngap

a ésoʼo jap,

ôsimesane viam ô boʼo te fulan a nsulaʼane wop!

Amu, ayoʼo dab été, be nga wôé môt

a e mimbusa miab été,

be nga tyiʼi minsône mebé mi beyôme benyak.

7Ayaa dap e boʼo biyoʼé

amu e ne njet,

nalé fe mbia ñwôʼan ôlune wop

amu a ne fe njet!

Ma ye kandé be e Yakob été,

a ma ye mialane be Israél été.

8Yuda, wo bobenyoñ ba ye kute meboñe si

ôsu viôé.

9Yuda a ne étoñe ngbwengbwem,

wo bet ô soʼok e vôme mimbim mi né,

a mone wom!

a nyiʼik meboñ,

a bômbô si ane nnôme ngbwengbwem,

ane ngale ngbwengbwem,

za a ye bo na a kôlô si?

10Ntum éjôé wo ye bo te kôlô Yuda.

Nge ndeme môta metiñ e kôlô mebo mé zañ.

Akekui Mesi a soya

a *meyoñ me bôte ke me veya nye mewôk.

11A tiñeti éjakase jé afube mindik,

a mona ngal éjakase wé a tiñeti nye

afase ndik da dañ abeñ.

A sôbe ngômesane jé e woon été,

a alôʼô dé e metyi bibuma bi ndiʼi woon été.

12Mise mé me ne évele a woon,

a mesôñ mé éfumulu a menyañ.

13Zabuloñ a ye tabe e bikôte bi mañ,

a ye tebe ékôte mañ besitima,

a minné mié mia ye limitan a kui

mfaʼa ya Sidoñ.

14Isakar a ne éjakas é ne mbamba éyekaʼa

e nje ja bômbô e zañe mebemba mebaé.

15A lôô na e vôm a bôô a ne mbamba vôm,

a naa si ne abeñ.

A vit étule jé e mbeʼe si,

a ne *ôlo yʼésaé.

16Dañ a ye tyiʼi ayoñe dé mejô

ane ayoñe da ya meyoñe yʼIsraél.

17Dañ a ye bo nyo e zene yôp,

akpwe ôsozen,

a lôbôk biboʼos bi ékabela

e nje mbebe wé a ku kayale ôtok.

18Me too nyiane wôé ndi, a Nti!

19Gad, nsamba bôt wo ye yametan a wosane nye,

ve nye a ye sulan asu ya titane wô!

20Abui bidi da ye bo e be Azér,

a ye ve mbamba bidi bi njô bôt.

21Néftali a ne ngale nkok a mate;

a ye tote mbamba bifia.

22Yôsep a ne éfaʼalé yʼélé é ne atek,

éfaʼalé yʼélé é ne atek e fefelʼanjeñe mendim,

mintyaé mia bet ôyabe yôp a dañ akak.

23Be nga té nye ntañete, be nga wua nye akoñ *élaé,

bewua *élaé be mbe besiñe bé.

24Ve *élaé jé é nga liʼi é too avale da,

e mo mé me nga vebane ngu

a mo me Ngungule Yakob;

ajô te a nga suʼulane bobane mbaʼale, akôm Israél.

25A Zambe ésoo, nyô a ye bo mvolô wôé;

a Nyô a ne Ngul ése, nyô a ye botane wo,

bibotane bia so yôbe ya môp,

bibotane bia so édoʼo ya beta yee,

bibotane ya mebé a abume nyia mon,

26Bibotan bi ésoo bia dañe bibotane bi ba

be nga nyoñe ma abum,

akekui akuʼu ya minkôle mi too nnôm éto;

bi boʼok e nlô Yôsep, e nlô njôô bobenyañ!

27Bényamin a ne ze ja nyap;

mametyé, a min e jôm a te bi a mamengôʼé,

a kabe biôme ya nsa.

28E ba ba bo *meyoñ mʼIsraél awôm a mebaé e mbe le; a e jam ésaa wop a nga jô be nde le, a botaʼane be. A nga botane be, môt ase avale bibotane dé.

Yakob a yaʼane bon

(Met 23:1 akk; 50:4-13)

29Wôna a nga ve be abendé di na: Me mbeme zu ke koone bimvame biam bi nga mane wu, jamane ma a beésa bam, e mbas akok ô ne afube yʼEfroñ, mone Hitit, 30e mbas akoʼo yʼafube Makpéla, bebé a Mamré, e Kanaan. E ne afub Abraham a nga kus e be Efroñ, mone Hitit, ane afube mesoñ. 31E nne be nga jam Abraham a Sara valé; e nne me nga jame Léa valé; 32afup a mbas akok ô ne été bi nga kuseban e be Behitit. 33Eyoñe Yakob a maneya ve bone bé mebendé, a nga beta bômbô si, a nga wu a ke koone bimvame bié bi nga mane wu.

Bible en langue Bulu

© LʼAlliance Biblique du Cameroun, 2007

More Info | Version Index