Search form

LEVITIK 1

Etyiʼa ba diʼi ngumba a

(Met 8:20-21; Nlb 15:1-16, 28; Sam 51:18-21; Hé 10:1-14; Ef 5:2; Fil 2:8)

1Ane Nti a nga loone Môze a kobô nye, *tyiñ é soʼo e *nda éndelé bendôbaʼan na: 2Kobôʼô bone bʼIsraél a jô be na:

Éyoñe môte wua ya be mia a kômbô ve Nti mvean éziñ, a ye ve wô ô soʼo mbame benyak nge mbame mintômba a bikela été.

3Nge mveane wé ô ne étyiʼa ja diʼibane ngumba ô soʼo mbame benyak, a ye ve nnôm a ne *mvoʼé ne selem; a ye ve nye anyiine *nda éndelé bendôbaʼan, nalé étyiʼa te ja ye nyoñebane be Nti. 4Môt ate a ye beté wo wé e nlô étyiʼa Nti a maneya kañese asu *njaman abé dé. 5A ye tyiʼi étoñe nyaʼa *tyiñ asu Nti; betuni, bone bʼAron, ba ye ve metyi a miame me mbômaʼan a ataʼa metunaʼa e ne anyiine *nda éndelé bendôbaʼan. 6A ye soé étyiʼa ja diʼibane ngumba ékôp a ba je mefuse mefus. 7Bone bʼAron Ntuni ba ye futi nduan ataʼa metunaʼa a wua njaʼa e nduan été. 8Betuni, bone bʼAron, ba ye bôé mefus, nlô a avoñ e njaʼa é ne mfutane nduan ya ataʼa metunaʼa yôp. 9Ba ye sôbe *miñya a mimbiaé mi tit, a wua ya betuni a ye diʼi biôm bite bise ataʼa metunaʼa yôp: étyiʼa ja diʼibane ngumba e nduan nje le é too fe mbamba menyum e be Nti. 10Nge mvean ô nʼétyiʼa ja diʼibane ngumba wo so e mone mbame biyem, mintômba nge bikela, a ye ve nnôm a ne *mvoʼé ne selem, 11a ye tyiʼi nye *tyiñ asu Nti ataʼa metunaʼa akôé, a betuni, bone bʼ Aron, ba ye miame metyi mé mbômaʼan a ataʼa metunaʼa. 12Ntuni a ye ba nye mefus, nlô a avoñ bi too fʼété; éyoñe te a bôé biôme bite e njaʼa a nduan ya ataʼa metunaʼa yôp. 13Miñya a mimbiaé bia ye sôban a mendim. Eyoñe te *ntuni a ye ve biôme bite bise a diʼi bie ataʼa metunaʼa yôp. Etyiʼa ja diʼibane nduan ngumba nje le é too mbamba menyum e be Nti.

14Nge mveane wé a ve Nti ô ne étyiʼa ja diʼibane ngumba ô soʼo anon, a ye ve adu nge bezum. 15Ntuni a ye ve ônon ataʼa metunaʼa yôp. A ye bok a té wô *tyiñ a jaé, a diʼi wô ataʼa metunaʼa yôb a miate metyi yʼété mbômaʼane ataʼa metunaʼa. 16A ye vaa ngok a mesaé a wua ônon ôbien bebé ataʼa metunaʼa mfaʼa jôb da tôô e vôm ba kut asup. 17A ye nyabe vie mfaʼa ya mefab ve teke té me, éyoñe te *ntuni a ye diʼi ônon ataʼa metunaʼa yôp, e njaʼa é ne nduane yôp. Etyiʼa ja diʼibane ngumba e nduan nje le é too mbamba menyum e be Nti.

Bible en langue Bulu

© LʼAlliance Biblique du Cameroun, 2007

More Info | Version Index