Search form

LEVITIK 11

Atiñ ya betit be ne *mfuban a ba be ne te mfuban

(Lv 20:25-26; Dt 14:1-21; Mm 10:11-16)

1Nti a nga kobô Môze ba Arone na: 2Kobôʼô bone bʼIsraél a jô be na: E betite bese ya si, bana mbe mia ye di. 3Mia ye di tit ése é bili éboʼos é too nsalan, mbiaé fe ô too nsalan a a boʼotôʼô nyalak.

4Ve bana mbe mia ye bo te di akôsa bo na ba boʼotô nyalak nge na be bili éboʼos é too nsalan: kamel, amu a boʼotô nyalak ve éboʼos te nsalan: mia ye yene je ane tit é ne te mfuban; 5nyôk é too *mekok, amu ja boʼotô nyalak ve éboʼos te nsalan: mia ye yene je ane tit é ne te mfuban; 6Liévre, amu a boʼotô nyalak ve éboʼos te nsalan: mia ye yene nye ane tit é ne te mfuban; 7ngôé, amu é bili éboʼos é too nsalan nalé fe mbiaé, ve te boʼotô nyalak: mia ye yene je ane tit é ne te *mfuban. 8Mia ye bo te di minsône miap: mia ye yene be ane betit be ne te *mfuban. 9Betite bese ba nyiñe mendim, bana mbe mia ye di: Ba bese be bili mengap a bibas be too e mendim, toʼo mañ nge bone bʼasôé. 10Ve ayôme betit ése é too mendim a jôm ése ja nyiñ e mendim, toʼo mañ nge bone bʼasôé, ba bese be nji bi mengap nge bibas, ba ye bo mbia be biôm mfaʼa wônan. 11Ba ye bo mbia be biôm mfaʼa wônan, mia ye bo te di minsône miap a mia ye yene mimbime miab ane mbia be biôm. 12Betite bese be ne e mendim te mengap nge bibas, ba ye bo mbia jôm mfaʼa wônan.

13Mfaʼa ya anon, dina nde mia ye yen ane mbia jôm, a mia ye bo te di de: jun, ébandôé a ndôé mañ; 14ze yôp a fufu ôbam a di da funane nye; 15éngbwañ a anon ese da funane nye; 16a éngutu, a mvômvôt, a élolé mañ a ôbam avale dé; 17a nyôk, nsoñemetoʼo a nduk; 18akuñ e beʼe bitombo, ngôkoé a ntememvoé; 19Bingobingo, Sôsolôsôé a ônon ôse ô ne ane je, hupe a Ôngem.

20Mone tit ase a beʼe mefab a wuluʼu a mebo menyin, a ye bo mbia jôm mfaʼa wônan. 21Ve bone betit bese be beʼe mefap be wuluʼu a mebo menyin, mia ye di e ba be beʼe mevale mebo mebaé: ma ba wulu me a ma ma volô be na be yôô. 22Bana mbe mia ye di: Étandak, mbaʼasan, mbu a aselek, jôm ése yʼété é too avale dé. 23Bone betite bevoʼo bese be beʼe mefab a mebo menyin, ba ye bo mbia jôm mfaʼa wônan. 24Be ne bo mia na mi yené te *mfuban, a môt ase a ye nambe mimbime miap, a ye bo te *mfuban a kui mamengôʼé, 25a môt ase a ye beʼe mimbime miap a ye sôbe mengômesane mé a tabe fe te *mfuban a kui mamengôʼé. 26Tit ése éboʼos é ne nsalan ve mbiaé ô too te nsalan, nalé fe te boʼotô nyalak, mia ye yene je ane nyô é ne te *mfuban. 27Betite mekule bese, mia ye yene be ane te *mfuban: môt ase a ye nambe mimbime miap a ye bo te *mfuban a kui mamengôʼé, 28a môt ase a ye beʼe mimbime miap a ye sôbe mengômesane mé a tabe te *mfuban a kui mamengôʼé. Mia ye yene be ane betit be ne te *mfuban. 29Bone betit ba woñe si bana mbe mia ye yen ane te *mfuban: kpwañesan, fôô a nsoo, jôm ése yʼété avale dé; 30afaé, nkaʼa, kuu, ôngôtô a jôngô ô. 31Mia ye yene be ane te *mfuban e bone betite bese été: môt ase a ye nambe be, éyoñ be wuya, a ye bo te *mfuban a kui mamengôʼé. 32Jôm ése jôme ya mimbime miab ja ye nambe ja ye bo te *mfuban: ékanda, ngômesan, ékôbe tit, nkuta, élabaʼa ése ba belane je: ba ye futi jôme te mendim é tabe fe te *mfuban a kui mamengôʼé, ja ye bo *mfuban éyoñe ngôʼé é lôteya. 33Jôm ése ba ye koone je élabaʼa é ne mboon a tyia été a jôm éziñe ya mimbime betite mite é too été, ja ye bo te *mfuban, a mia ye bôé élabaʼa te. 34Adi ese ba di, mendim ya élabaʼa te me too nsôan été ma ye bo te mfuban; jôm ése ba nyu avale élabaʼa te ese ja ye bo te *mfuban. 35Jôm ése ngabe ya mbime wob ja ye ku yôp ja ye bo te mfuban; jaʼane mbum nge ntakaʼa ya di, ba ye tyame bie. Bi ne te *mfuban, a mia ye yene bie ane te *mfuban. 36Ve jame da na anjeñ a ébé bi ne mboon mfaʼa ya baʼale mendim bia ye bo mfuban; ve nyô a ye nambe mbime wop a ye bo te *mfuban. 37Nge jôm éziñe ya mbime wob ja ku e mvoñ ja yiane béébane yôp, mvoñ éte é ngenane mfuban; 38ve nge be nga jini mvoñ éte mendim, a jôm éziñe ya mbime wop é kpwelé je yôp, mia ye yene mvoñ éte ane te *mfuban.

39Nge tite jia ya betite mia di ja wu, môt a ye nambe mbim a ye bo te *mfuban a kui mamengôʼé; 40môt a ye di avale mbime te a ye sôbe mengômesane mé a tabe te *mfuban a kui mamengôʼé. 41E mone tit ase a woñe si a ye bo mbia jôm: ba ye bo te di nye. 42Mia ye bo te di toʼo ve wua ya bone betit ba woñe si, nge ba ba vutan a mebum, nge ba ba wulu a mebo menyin nge a abui mebo, amu be ne mbia jôm. 43Te boone miabebiene mbia jôm amu bone betite bete bese ba woñ; a te boone miabebien te *mfuban a be, nge ve miabebiene mvin a be. 44Amu me ne Nti, e Zambe wônan: mia ye telé miabebien étyi, a naa mia ye bo étyi amu me nʼétyi; a mia ye bo te bo miabebiene mvin a bone betite bete bese ba woñe si.

45Amu me ne Nti a nga soo mia e si yʼEjipte na me bo e Zambe wônan, a mia ye bo étyi, amu me nʼétyi. 46Atiñe da fombô betit, anon, bevevee be biôme bese ba fôʼôsan e mendim a biôme bi vee bi woñe si, nde le, 47mfaʼa ya kandé jôm é ne te *mfuban a jôm é ne *mfuban, tite ba di a nyô be ne te di.

Bible en langue Bulu

© LʼAlliance Biblique du Cameroun, 2007

More Info | Version Index