Search form

LEVITIK 12

Atiñe da fombô minga a ndôme biaé

(Sam 51:7; Lk 2:21-24)

1Nti a nga kobô Môze na: 2Kobôʼô bone bʼIsraél a jô be na: Éyoñe minga a ye bo abum a biaé monafam, a ye bo te *mfuban tañe melu zamgbwal; a ye bo te *mfuban avale fe ane melu ya a yene ngon. 3E môse muame, mon a ye tyiʼiban atyel. 4A ye beta tabe melu mewôm melaa a melaa, mfaʼa ya fubu émien amu metyi mé; a ye bo te nambe jôm é ne ntelan étyi, nge ke vôm yʼétyi akekui mimôse ya ntunane wé mi ntoo njalan. 5Nge a biaé monaminga, a ye tabe te *mfuban tañe sondô ébaé, avale fe ane melu a yene ngon; A ye tun émien amu metyi mé tañe melu mewôme zamgbwal. 6Eyoñe melu ya ntunane wé me maneya, toʼo a nga biaé monafam nge monaminga, a ye zu ve Ntuni étoñe ntômba é ne mbu wua anyiine *nda éndelé bendôbaʼan, asu mvean wo diʼibane ngumba; nalé fe zum nge ôdu asu mveane ya *njaman abé. 7Ntuni a ye liti bie asu Nti a bo mame ya *njaman abé asu dé, nalé a ye tuneban amu metyi me nga kui nye atan. Atiñe minga a biaé monafam nge monaminga nde le. 8Nge jôme ya kus étoñe ntômba é ne momo e mo mé, a ye nyoñ adu abaé, nge zum ébaé, jia asu mimvean mia diʼibane ngumba, nyô fok asu mveane ya *njaman abé. Ntuni a ye bo mame ya *njaman asu dé, a a ye bo *mfuban.

Bible en langue Bulu

© LʼAlliance Biblique du Cameroun, 2007

More Info | Version Index