Search form

LEVITIK 14

Mboon ya fubu nzezam

(Mk 1:40-44; Lv 8:22-30; Sam 51:9; Tt 3:4-6)

1Nti a nga kobô Môze a jô nye na: 2Éyoñe ba ye fubu nzezam, avale di nde da ye boban: ba ye ke liti nye *ntuni, 3éyoñe te *ntuni a kui e minkan atan a fombô nye nge môt ate a yeteya *zam. 4Ntuni a ye bendé na be zuu anon abaé bevevee e too fe *mfuban, be zuu njaʼa élé sédre, nalé fe mevule me ntômba nduban ôbe évele a abui izôpe. 5Eyoñe te a bo na be tyiʼi ônone wua *tyiñ élabaʼa tyia yôb é bili mendim yʼanjeñ. 6Emien a ye nyoñ ônon ôvok a njaʼa sédre, a mevule me ntômba me ne ôbe évele a abui izôpe a dube bie e metyi ya ônon ba te tyik; 7éyoñe te a miame metyi mete biyoñe zamgbwal e nyôle môt a yiane tuneban ôkone zame wé. Mvus éte *ntuni a ye yôtane na môt ate a ntoo *mfuban wôna a ye suu vevea ônon a yele a ke afan. 8Môt ate a ye sôbe mengômesane mé, a mane tyeñe mimvote mié a wobane fe mewoban ma fubu nye. Eyoñe te a bulane nyiin e minkan, ve a ye tabe e *nda éndelé jé atan tañe ngume sondô. 9E môse zamgbwale, a ye beta tyeñ ésile jé, e zele jé, bivula bié a mimvote mivoʼo mise, a mane sôbe mengômesane mé a woban: ataté éyoñe te a ntoo *mfuban.

10E môse muame, môt ate a ye nyoñe mintômba mibaé mi too *mvoʼé ne selem, a nyoñe fe mvean avut kili ébuu mfuʼan a mbon, nalé fe étune lita mbone jia. 11Ntuni a bo ésaé melu mete a ye telé môt ate a mimveane mié asu Nti, anyiine *nda éndelé bendôbaʼan. 12A ye nyoñe ntômba wua a ve wô ane étyiʼa ya *njaman abé, a ye fe ve étune lita mbon éyoñe te a bo biôme bite ndeñkolô ôsu Nti. 13A ye tyiʼi ntômba e vôm ba tyiʼi mimvean asu *njaman abé nge ke mimvean mia diʼibane ngumba, nalé a ne na e vôm a nʼétyi, amu étyiʼa ya mvaane mekua avale fe ane ji ya *njaman abé bi ne asu *ntuni, ane biôm bi ne étua étyi. 14Ntuni a ye nyoñe metyi mʼétyiʼa ya mvaane mekua, éyoñe te a woʼo me e *nda alo ya mbo nnôme môt a tuneban, nalé fe e nnôm ônyu ya akule wo dé ya mbo nnôm a e nnôm ônyu ya akul abo dé ya mbo nnôm.

15Eyoñe te fe *ntuni a nyoñe mbon a sôé wô e wo wé ya mbo ngal;

16A ye dub ônyu vié ya mbo nnôm e mbon ô ne nye akule wo dé ya mbo ngal été, a miame mbone te a ônyu tañe biyoñe zamgbwal ôsu Nti. 17Ntuni a ye nyoñe mbon wo liʼi nye wo a futi wô ndaa alo ya mbo nnôme môt a tuneban, nalé fe nnôm ônyu ya abo dé ya mbo nnôm a e nnôm ônyu ya abo dé ya mbo nnôm, e vôme fe a tameya futi metyi me ntômba asu mvaan *abé.

18Ntuni a ye sôé mbon wo liʼi nye wo e nlô môt ate a bo mam ya fubu nye asu Nti. 19Wôna *ntuni a ye bo metunaʼa ya *njaman abé a mam mese yʼété, éyoñe te a suʼulan bo mimvean mia diʼibane ngumba. 20A ye ve mimvean mia diʼibane ngumba ataʼa metunaʼa yôp a mvean avut. Ntuni a ye beta bo mame ya vaa *abé asu môt ate, wôna a ye bo *mfuban.

21Nge ntunan nzezam ô ne azoé. Môt a ne *nzôzoé a teke bi mezene ya ve mimvean mise ba sili, a ye nyoñe mone ntômba wua asu mimveane ya mvaan abé; ba ye liti nye Nti ane môt ate a ne nguleya tuneban. A ye fe nyoñe kili avut élaa mfuʼan a mbon a nyoñe fe étune lita mbon, 22adu abaé nge zum ébaé avale jôm ése émien a ne nguleya bi: ônone wua asu mimvean ya mvaan *abé, ônon ôvok asu mimveane mia diʼibane ngumba. 23E môse muame, a ye zuu mimvean mite mise e be *ntuni, anyiine *nda éndelé bendôbaʼan, asu Nti. 24Ntuni a ye nyoñ étoñe ntômba asu mimveane ya mvaane mekua a étune lita mbon éyoñe te a bo bie ndeñkolô asu Nti. 25A ye tyiʼi étoñe ntômba *tyiñ, a nyoñe metyi mé, a woʼo me môt ate e ndaa alo ya mbo nnôm a e nnôm ônyu ya wo wé ya mbo nnôm a e nnôm ônyu ya abo dé ya mbo nnôm. 26A ye sôé mbon e wo wé ya mbo ngal été, 27A ye miame mbon ô ne wo wé ya mbo ngale te asu Nti biyoñe zamgbwal a ônyu ya wo wé ya mbo nnôm. 28Ntuni a ye futi mbon ô ne wo e ndaa alo ya mbo nnôme môt a tuneban, nalé fe e nnôm ônyu ya wo wé ya mbo nnôm, a e nnôm ônyu ya abo dé ya mbo nnôm, e vôme fe a nga futi metyi mʼétyiʼa ya mvaane mekua. 29Ntuni a ye futi mbon wo liʼi nye wo e nlô ya nyô a tuneban, nalé a ye bo mame ya *njaman mfaʼa wé ôsu Nti. 30Eyoñe te a ye ve ôdu wua nge zume jia ya ba be nga nyoñeban e biôm a bili été, 31jôm ése a ye bo nguleya bi, ônone wua asu mimveane ya *njaman abé, wu ôvok asu mimveane mia diʼibane ngumba a mvean avut; éyoñe te *ntuni a ye bo mame ya njamane môt a tuneban ôsu Nti.

32Atiñ da fombô nzezam ô ne te mezene ya ve biôm ba sili asu ya fubu nye nde le.

Sun ya mimfine mi nda

(Lv 13:47-59; Eza 32:18; Nli 18:2)

33Ane Nti a nga kobô Môze baa Aron a jô be na: 34Éyoñe mi kuiya e si ya Kanaan nje ma ve mia é bo énjenan, nge ma bo na abat sun e kui e *nda éziñ ya mfefé si mia ye bi, 35môt a ne *nda éte a ye ke kate *ntuni jame te a jô na: Me yeneya abat e *nda jam. 36Ntuni a ye bendé na biôm bise bi ne *nda été bi kui atan nté émien a ngenan teke yen abate te, éyoñe te jôm ése é ne e *nda été ja ye bo te bili mvin. Wôna *ntuni a ye nyiine *nda a fombô abate te. 37Nge e bili bibé bi too ane mekaé bilé nge ôbe évele, nge abate te da bo ébé e mfine *nda, 38Ntuni a ye kui atan a dibe *nda tañe ngume sondô. 39E môse muame, *ntuni a ye beta zu fombô éyoñ éfe: nge abat e maneya yiane mfine *nda, 40*ntuni a ye bendé na be vaa *mekok me maneya bili mieñgele a wua me e vôm a nji bo *mfuban e tison atan. 41A ye bo na be mane wome mimfine mi *nda mise mfaʼa yʼété; ba ye wua mvin éte ése e vôm a ne te *mfuban e tison atan. 42Ba ye nyoñe mekoʼo mefe a tyendé ma ya ôsu; ba ye fe nyoñe jôm éfe ya beta kone *nda.

43Nge abate mieñgele da beta yené éyoñ éfe e *nda a koé na be maneya vaa mekoʼo me nga ndaman, a koé fe na be maneya wom a beta kone mimfin, 44*ntuni a ye beta ke fombô: nge e ne nalé na abat e beteya foʼo kui, nalé a ne na mieñgele ate a se nguleya beta kôlô *nda: *nda éte é nji fe beta bo *mfuban. 45Ba yiane tyame je, toʼo mevôm me bili *mekok, nge mevôm me bili bilé; wôna ba ye beʼe mbuan a jôm be nga koone je *nda é maneya kutan a kee bie e vôm a ne te *mfuban e tison atan. 46E môt ase a nyiine *nda melu ja yiane tabe mfetan, môt ate a nji fe bo *mfuban a a ye tabe nalé a kui mamengôʼé. 47Môt ase a bômbô e *nda éte nge di jôm éziñ été, a yiane sôbe mengômesane mé. 48Ve nge *ntuni a yen, éyoñ a beteya fombô *nda na abat e nji beta kui e mvuse nkonane *nda, a ye yôtane na *nda éte é ne *mfuban amu mieñgele a maneya.

49Mfaʼa ya fubu *nda, *ntuni a ye nyoñ anon abaé, njaʼa sédre, mevule me ntômba nduban ôbe évele a abui izôpe. 50A ye tyiʼi ônone wua *tyiñ, élabaʼa tyia yôp, é bili mendime ya anjeñ. 51A ye nyoñe njaʼa sédre, abui izôpe, mevule me ntômba nduban ôbe évele a ônon ôvok, éyoñe te a dube bie e metyi mʼônon a te tyiʼi *tyiñ a e mendim yʼanjeñ, éyoñe te a miam e *nda biyoñe zamgbwal. 52Ajô te a ye tun *nda éte a metyi mʼônon, mendime yʼanjeñ, ônon ô vee, njaʼa sédre, abui izôpe a mevule me ntômba me nʼôbe évele. 53A ye suu vevea ônon a yele e tison atan, mfaʼa yʼafan. A ye suʼulane bo jame ya fubu *nda éte, a ja ye bo *mfuban.

54Atiñ da fombô mevale me *zam, meko, 55mieñgele ya mengômesan a sun ya menda, 56memvim, bikôbaʼa a mebat nde le. 57Atiñe te da volô mfaʼa ya yemelan biyoñe bôt nge biôm bi nji bo *mfuban nge éyoñ bi ne *mfuban. Atiñ asu *zam nde le.

Bible en langue Bulu

© LʼAlliance Biblique du Cameroun, 2007

More Info | Version Index