Search form

LEVITIK 15

Atiñe da fombô e mvin ja kui e biôm bi fam

(Nlb 5:1-4; Mk 7:20-23; 2 Ko 7:1)

1Nti a nga kobô Môze ba Arone na: 2Kobaʼane bone bʼIsraél a jô be na: Éyoñe fam éziñ é biya ôkon e biôme bi fame bié, mendim me ne kui été, ma bo môt ate te *mfuban, 3toʼo na mendim mete ma lôt nge tebe, môt ate a nji bo mfuban; melu mese minsône mié mia kuli mendim nge te kuli mendim, éto te mfubane jé é ne avale da. 4Ajô te énoñ ése môt ate a bômbô a éto ése a tabe é nji fe bo *mfuban. 5Môt a nambe énoñe te a yiane sôbe mengômesane mé, a émiene fe a yiane woban; a ye tabe te *mfuban a kui mamengôʼé. 6Môt a tabe éto nkôkone te wo te tabe a yiane sôbe mengômesane mé, a émiene fe a yiane woban: a ye tabe te *mfuban a kui mamengôʼé. 7Nyô a nambe e môt a kon, a yiane sôbe mengômesane mé a émiene fe a yiane woban, a ye tabe te *mfuban a kui mamengôʼé. 8Nge môt a kon a tui môt a ne *mfuban mendene nyô, môt ate a yiane sôbe mengômesane mé, émiene fe a yiane woban: a ye tabe te *mfuban a kui mamengôʼé. 9Eto ése ba beté tite yôb nje nkôkone te wo te tabe éyoñe wo te wulu, éto éte é nji fe bo *mfuban. 10Nyô ase a nnambe jôme nkôkon ô nga tabe yôp a ye bo te *mfuban a kui mamengôʼé. Nyô a beʼe avale jôme te, a ye sôbe mengômesane mé, émiene fe a ye woban a tabe te *mfuban a kui mamengôʼé. 11Nyô nkôkone wo nambe te na nkôkon te wo te sôbe mo a ye sôbe mengômesane mé, émien a wobane fe, a a ye tabe te *mfuban a kui mamengôʼé. 12Ba yiane bôé élabaʼa tyia ése nkôkon wo te nambe; nge élabaʼa te é ne ji bilé, ba yiane sôbe je a abui mendim.

13Eyoñe nkuane mendim wo te bo môt te *mfuban ô tebeya, môt a ye yange ngume sondô éyoñ a ngenan te lañebane mfuban; mvus éte a ye sôbe mengômesane mé, émiene fe a ye wobane mendim yʼanjeñ a éyoñe te nje ñhe a ntoo *mfuban. 14E môse muame môt ate a ye nyoñe adu abaé nge zum ébaé a ke kee bie *ntuni, asu Nti, anyiine *nda éndelé bendôbaʼan. 15Ntuni a ye ve ônone wua asu mvean ya nyoñe *njaman, ônon ovoʼo ki asu mvean wo diʼibane ngumba ôsu Nti, a ye suʼulane bo môt ate e jam da fubu nye e mfaʼa ya nkuane mendime wé.

16Nge meyôm ma kui fam éziñ atan (éyoñ a ne ôyo a alu), a yiane wobane mendim nyôl ése a tabe te *mfuban a kui mamengôʼé. 17Ngômesan ése, nge mfinga ékôb ôse atoé meyôm da te nambe bia yiane sôban a tabe te *mfuban a kui mamengôʼé. 18Eyoñe fam ba minga ba te tabe, bebaane ba ye woban a tabe te *mfuban a kui mamengôʼé.

Eyoñe minga a nji bo mfuban

(Lv 12:2-8; 20:18; Mk 5:25-34)

19Eyoñe minga a yene ngon a metyi ma kui nye nyôl, a ye tabe te *mfuban tañe ngume sondô. Môt a nambe nye fe a ye tabe te *mfuban a kui mamengôʼé. 20Enoñ ése a bômbô a éto ése a tabe éyoñ a yene ngon bi ntoo te *mfuban. 21Môt ase a nambe énoñe jé a ye sôbe mengômesane mé, émien a wobane fe mendim a tabe te *mfuban a kui mamengôʼé. 22Môt ase a nambe jôm a nga tabe yôb a ye sôbe mengômesane mé, émien a wobane fe mendim a a tabe te *mfuban a kui mamengôʼé.

23Nge jôm éziñ é nga bôô énoñe jé, nge vôm a nga tabe a be nambe jôme te, môt a te nambe jôm éte a ye tabe te *mfuban a kui mamengôʼé. 24Nge fam éziñ ja tabe a nye, te mfubane ya be minga a kalaneya be fam: fame fe ja ye tabe te *mfuban tañe ngume sondô, a énoñ ése a bômbô é ntoo te *mfuban.

25Eyoñe metyi ma kui minga nyôl melu melu atane ya biyoñ ya ñyenane ngone wé, nge na ñyenane ngone wé wo lôt abime melu ô wôʼô tabe, minga ate a nji bo *mfuban nté ôse metyi ma kui, avale fe ane melu ya a yene ngon. 26Enoñ ése a bômbô nge na éto ése a tabe, é nji fe bo *mfuban avalʼane biyoñe ya ñyenane ngon. 27Môt ase a nambe énoñ éte nge éto éte, a yiane sôbe mengômesane mé émien, a wobane fe, a a tabe te *mfuban a kui mamengôʼé.

28Eyoñe metyi me leneya, minga a ye yange bo *mfuban e mvuse ngume sondô. 29E môse muame, a ye nyoñ adu abaé nge zum ébaé a zule ve bie *ntuni anyiine *nda bendôbaʼane. 30Ntuni a ye ve ônone wua asu mimveane ya *njaman abé, a ônon ôvok asu mveane wo diʼibane ngumba. A ye suʼulane bo minga ate jame ya fubu nye asu be Nti amu metyi me nga kui.

31Mia ye bo bone bʼIsraél na be tebe ôyab a vôme wom a nʼétyi éyoñ be nji bo mfuban; a tune be mvine jab be za wu nge ba subu bebé e vôme wom a nʼétyi a tele ézezañe jenan éyoñ be nji bo *mfuban. 32Atiñe da fombô fam mendim ma kui zene befam a nyô biôm bi fam bia kui atan (éyoñ a bôô ôyo a alu) a toé nye te *mfuban,

33A minga éyoñe jé ya ñyenane ngon, nalé fe fam ja fulane minga melu minga ate a nji bo *mfuban, nde le.

Bible en langue Bulu

© LʼAlliance Biblique du Cameroun, 2007

More Info | Version Index