Search form

LEVITIK 16

Beta môse ya *njaman abé

(Hé 9:1-12; 10:1-22)

1Nti a nga kobô Môze e mvus awu bone bʼAron bebaé mbe be nga tebe asu Nti avale bebien be nga kômbô, ane fe be nga wu. 2Nde a nga jô Môze na: Kobôʼô monyoñ Arone na a bo te nyiin e vôme wom a nʼétyi éyoñ ése, a dañedañe na a bo te tulan éyé é tyele e zañe *nda éndelé, a tebe ôsu ébutaʼa é nʼéwolo yʼélate yôp: éyoñe te a ye bo te wu, amu ma suan ébutaʼa te yôp me too e nsume *nkut été.

3Avale di nde Aron a ye nyiin e vôme wom a nʼétyi: a bili étoñe nnôme nyak asu mveane ya sili *njaman abé, a nnôme ntômba asu mvean wo diʼiban. 4A ye jaé éwomane ndombo é nʼétyi a jaé mekuba me ndombo e nyôle jé; a ye tiñeti asese ndombo angeteñ a jaé fe ôzomezome ntôme ndombo e nlô: mengômesan me nʼétyi a ye jaé mme le, éyoñ émien a tatéya mane wobane mendim. 5Wôna a ye nyoñe beyôme bikela bebaé e be bôte bese yʼIsraél asu mveane ya nyoñe *njaman abé, a nnôme ntômba asu mveane wo diʼibane ngumba. 6Aron a ye ve nnôme nyak mfaʼa wé asu *njaman abé, éyoñe te a ye bulu nsem asu dé émien a asu *nda bôte jé. 7A ye nyoñe beyôm bikela bebaé a zuu be asu be Nti, anyiine *nda éndelé bendôbaʼane. 8Eyoñe te a ye bo bikela bite bibaé *asimba, *asimba da asu Nti a di avok asu azazél. 9Aron a ye nyoñ ékela *asimba da ye liti asu Nti a ve je mveane ya *njaman abé. a 10Wôna ji *asimba da liti asu azazél a ye zuu je vevee asu be Nti, nnôm ékela ate a ye volô asu mbulane minsem éyoñe ba lôme nye Azazél e *nkôte si. 11Aron a ye ve nnôme nyaʼa wé asu *njaman abé, éyoñe te a ye bulu nsem asu dé émien a asu *nda bôte jé. A ye tyik e nnôme nyaʼa wé a ne asu *njaman abé *tyiñ. 12A ye nyoñ ésiʼi é bili abui metyeʼe me nduan a te vaa ataʼa metunaʼa asu be Nti a asube da nyume mvaé, njalane mo mebaé, éyoñe te a ye kee bie ôyab a éyé é tyele e zañe *nda éndelé. 13Eyoñe te a kut asub e nduan asu be Nti, nalé ôtita wo ye yian ébutaʼa éwolo yʼélat, a a ye bo te wu. 14A ye nyoñe metyi me nnôme nyak a miame me a ônyu ôsu ébutaʼa éwolo yʼélat mfaʼa jôp da tôô, a ye miame metyi mete a ônyu ôsu ébutaʼa éwolo yʼélat tañe biyoñe zamgbwal. 15A ye tyiʼi nnôm ékela *njaman abé ya bôte *tyiñ a kee metyi yʼété ôyab a éyé ya e zañe *nda éndelé, a ye belane metyi mete avale fe a nga belane ma me nnôme nyak; a ye miame me e yôp a ôsu ébutaʼa éwolo yʼélat.

16Avale te nde a ye bulu nseme ya vôme wom a nʼétyi amu mvine ya bone bʼIsraél, amu mimboon mi njete miab a amu minseme miabe mise. Avale te fe a ye bo asu *nda éndelé bendôbaʼan é ne be be, ézezañe ya mvine jap. 17Teke môt a ye tabe e *nda éndelé bendôbaʼan été éyoñ Aron a ye nyiine na a bulu nsem e vôme wom a nʼétyi akekui a kuiya atan. A ye bulu nsem asu dé, émien, asu *nda bôte jé a asu ngum nsamba bôt ôse yʼIsraél.

18A ye kui atan mfaʼa ataʼa metunaʼa e ne ôsu Nti, a bulu nsem asu ataʼa metunaʼa; a ye nyoñe metyi me nnôme nyak a metyi me nnôm ékela, éyoñe te a futi me mbômaʼan a minlaʼa mi ataʼa metunaʼa. 19A ye miame metyi ataʼa metunaʼa yôp tañe biyoñe zamgbwal; a ye fubu de a telé de étyi amu mvine bone bʼIsraél.

20Eyoñe Aron a maneya fubu vôme wom a nʼétyi, a a maneya fe fubu *nda éndelé bendôbaʼan a ataʼa metunaʼa, a ye bo na be zuu nnôm ékela vevee. 21A ye beté mo mé mebaé e nlô nnôm ékela a vee, éyoñe te a ye mem minsem mi bone bʼIsraél mise; melo mab a minkobane miab e nnôm ékela yôp, a beté nye mie nlô, éyoñe te a lôme nye e *nkôte si a wo ya fam é ne nkômesan ya bo jame te. 22Nnôm ékela a ye ke e vôm a ne teke bôt a beʼe minseme miabe mise. Eyoñe be maneya lôm ékela e vôm a ne teke bôt, 23Aron a ye bulan e *nda éndelé bendôbaʼan, a vaa mengômesane me ndombo a nga jaé éyoñ a nga nyiin e vôme wom a nʼétyi a liʼi me valé. 24A ye wobane mendim e vôme wom a nʼétyi éyoñe te a beta jaé mengômesane mé émien. Eyoñe te a ye kui atan a ve mimveane mié mia diʼibane ngumba a mimvean mi bôt mia diʼibane ngumba; a ye bulu nsem asu dé émien a asu bôt. 25A ye diʼi avoñ étyiʼa ya *njaman abé, ataʼa metunaʼa yôp.

26Môt a nga kee nnôme ntômba a ne asu Azazél e *nkôte si, a ye sôbe mengômesane mé a wobane mendim, éyoñe te a suʼulane bulan e minkan. 27E nnôme nyak a ne asu *njaman abé a e nnôm ékela a ne asu *njaman abé mbe *ntuni a nga belane metyi e vôm a nʼétyi asu ya bulu minsem, ba ye kee be e minkan atan a diʼi bikôbe biap, minsône miab a mebi mab e nduan. 28Môt a ye diʼi biôme bite a ye sôbe mengômesane mé a wobane fe mendim, wôna a ye suʼulane bulane minkan.

29Mvinda nyô ja ye bo nyô ya éyoñ ése mfaʼa wônan: e ngone zamgbwale é too melu awôm nje mia ye liti miabebiene njuk; mia ye bo te bo ésaé éziñ, toʼo bialébialé toʼo *ntabe ô to ézezañe jenan. b 30Amu *môs ôte ba ye bulu nsem asu denan, nalé mia ye bo mfuban; mia ye tuneban mfaʼa ya minseme mienan mise asu be Nti. 31Môs ôte wo ye bo mia Sabat, *môs awoʼon a mia ye liti miabebiene njuk: mvinda ya melu mese nje le.

32Ntuni ba ye woʼo mbon wo a ve nye nguleya tyendé ésaa ésaé é nʼétyi été nye a ye bulu nsem. A ye jaé bifumulu mengômesan, mengômesan me nʼétyi; 33A ye bulu nsem asu vôm ya Etyi a né, asu *nda éndelé bendôbaʼan a asu ataʼa metunaʼa, a a ye bulu nsem asu betuni a asu nsamba bôt ôse. 34Mvinda ya éyoñ ése mfaʼa wônan nje le. Avale te nde ba ye bulu minsem mise mi bone bʼIsraél, mbu ôse éyoñe jia. Be nga bo e jame Nti a nga bendé Môze.

Bible en langue Bulu

© LʼAlliance Biblique du Cameroun, 2007

More Info | Version Index