Search form

LEVITIK 17

Vôme ya ve metunaʼa

(Dt 12:1-18; 1 Ko 10:31)

1Nti a nga kobô Môze a jô na: 2Kobôʼô Aron, bone bé a bone bʼIsraél bese a jô be na: Jame Nti a nga bendé nde di: 3Nge fam éziñ ya *nda bôt Israél ja tyiʼi nnôme nyak, étoñe ntômba nge ngal ékela e minkan été nge atan, 4te na a zuu nye anyiine *nda éndelé bendôbaʼan na a ve nye Nti ôsu ya Tabernakel wé, ba ye lañe môt ate étome metyi. A nga kuli metyi, ajô te ba ye vaa nye ézezañe bôte bé été. 5Nalé ate bone bʼIsraél ba ye zuu mimveane miap e be Ntuni, asu be Nti, anyiine *nda éndelé bendôbaʼan, sa na be ve mimveane miab atan; éyoñe te fe ba ye ve Nti mimveane ya nlatane ngbwa. 6Ntuni a ye sôé metyi yʼété ataʼa metunaʼa Nti yôp, anyiine *nda éndelé bendôbaʼan; a ye diʼi avoñ e bo mbamba ényum e be Nti: 7nalé ate bone bʼIsraél ba ye bo te beta ve mimveane miab e be biveʼelaʼa beyôm bikela ya mimbia minsisim a bo bijabô a be. Miaé mise ya bone bʼIsraél ba ye baʼale mvinda nyô. a 8Nde wo ye jô be na: Nge fame ya *nda bôte Israél nge nyô ya mintabe mi too ézezañe jab a ve mimvean mia diʼibane ngumba nge mimveane mife, 9ve te zuu mie anyiine *nda éndelé bendôbaʼan na a ve Nti mimvean, ba ye vaa nye e bôte bé été.

Etyi te di metyi

(Met 9:4; Lv 7:26-27; Dt 12:23-25)

10Nge môt éziñe ya *nda bôte Israél nge nyô mintabe mi too ézezañe jap a di metyi mʼéziñ, asu dam da ye ke môt ate e ngame yat a vaa nye ézezañe bôte bé. 11Amu ényiñe ya minsôn é ne e metyi. Me nga ve mia me ataʼa metunaʼa yôp, nalé ate ma ye volô mbulane nsem asu ényiñe jenan, amu ényiñ é ne e metyi été, nde metyi me ne nguleya bulu nsem. 12Ajô te me nga jô bone bʼIsraél na: Teke môt éziñ ya be mia a ye di metyi. A *ntabe ô too mia zañe fe wo ye bo te di metyi. 13Nge môt éziñe ya bone bʼIsraél nge mintabe mi too e zañe jab a bi tit e nsôm nge ônon wo diban, a ye taté kuli vie metyi a buti me yôb a mbuluk. 14Amu ényiñe ya nsôn ôse é ne e metyi. Ajô te me nga jô bone bʼIsraél na: Teke metyi ya nsôn éziñ mia ye di amu ényiñe ya nsôn ôse é ne metyi mé: môt ase a ye di me, ba ye vaa nye. 15Môt ase ya bebialébialé nge mintabe a ye di tit metyi me nji kui atan: é too ñwuan abuk nge mbilize, a ye sôbe mengômesane mé, a émien a ye wobane mendim, a tabe fe te *mfuban a kui mamengôʼé, mvuse valé nye a ye bo *mfuban. 16Nge a bo te sôbe mengômesane mé nge wobane mendim, a ye beʼe mekua yʼékobe jé.

Bible en langue Bulu

© LʼAlliance Biblique du Cameroun, 2007

More Info | Version Index