Search form

LEVITIK 19

Avale Zambe a kômbô na be bo nye ésaé

(1 Pi 1:14-16; Lv 20:26; 26:1-2; Dt 24:19-22)

1Ane Nti a nga kobô Môze a jô na: 2Kobôʼô ékôane bôt ése yʼIsraél na: Mia ye bo étyi, amu ma Nti, e Zambe wônan, me nʼétyi. 3Môt ase ya be mia a ye semé nyia a ésaa a baʼale fe besabate bam, ma me ne Nti Zambe wônan.

4Mia ye bo te kôñelan e be azezambe nge bo miabebien biveʼelaʼa bi azezambe a nyeman étyé. Ma me ne Nti e Zambe wônan.

5Eyoñe mia ve Nti mimveane ya nlatane ngbwa, vaʼan mie avale da yiane na mi nyoñebane *mvoʼé be ma. 6Ba ye di étyiʼa e môse ja veban nge *môs wo tôñe valé. Jôme ja buk a kui môse lale ja ye diʼibane nduan. 7Nge ba di je e môse lale, étyiʼa te é ntoo jôm é ne te *mfuban a me se nguleya kañese je. 8Môt a ye di je a yiane yeme na a ndaman étyi ya jôm é ne ma mvean a émien a ye beʼe mekua ya ékobe jé; môt ate a ye vaseban e zañe bôte bé.

9Eyoñe mia ye kôane bidi e si jenan, wo ye liʼi vôm éziñ yʼété teke kôane bidi ya valé, nalé fe na wo ye bo te bulan ke kôane jôm é ne nliʼane mvus. 10Wo ye bo te kolé bisanté bi ne nliʼan afube mindiʼi dôé, nge toʼé mefese mese me ne nkuan été. Wo ye liʼi éngôngole môt a *ntabe biôm bite. Ma me ne Nti, Zambe wônan.

11Mia ye bo te wup; môt ase ya be mia a ye bo te laane môt ba nye be too minsos nge duʼu nye. 12Mia ye bo te kane ngana minsos a jôé dam, amu ô za ndaman étyi ya jôé e Zambe wôé. Ma me ne Nti.

13Wo ye bo te wôlé môte mia nye mi too jôm a ngu nge wube jôm éziñ. Wo ye bo te baʼale maʼan me mbo ésaé e *nda jôé a kui mametyé. a 14Wo ye bo te kobô ndôndok nkobô *nkpwala a ésas, a te bôé ndindim jôme ya kolé wô ôbak ôsu. Ve wo ye ko Zambe wôé woñ, ma me ne Nti.

15Te boon ékotekot ntyiʼane mejô été: te ko môt a nʼatek éngôngol é ne te yian nge semé beta môt ésemé é ne te yian, ve mia ye tyiʼi bôte mia be be mi too mejô teke ôbangam. 16Wo ye bo te ndeñe mfuk e bôte bôé été. Te veʼele bo na môte mia nye mi too a nyoñe meleb yʼawu amu bibôta mejô biôé asu betyiʼi mejô: ma me ne Nti. 17Te siñe monyoñ e nleme wôé été, ve ô vaʼa nye bijô nalé wo ye bo te beʼe mekua ya *abé dé. b

18Te kune womien a te baʼale bone ya ayoñe dôé ôvitiʼi *nlem, ve wo ye nyeʼe e môt a too wo bebé ane wo nyeʼe womien: ma me ne Nti.

19Mia ye fe baʼale memvinda ma, te kañese na mevale me tite mebaé me yam; nalé fe te miase mvoñ mevale mebaé afube dôé été; a wo ye bo te jaé ngômesan é too ntiñan a minsiñga mevale mebaé.

20Nge fam éziñ ja fulane minga, nge minga ate a ne mbo ésaé a bili *atiñ aluk a fame fe ve a nji bi éto fili, ba ye lume bebaé vʼaleman, ve saa melebe yʼawu, amu minga ate a nji bi éto fili. 21Amu mekua mé, fam ja te jôʼôbô minga ate ja yiane zuu nnôm ékela e be Nti, anyiine *nda éndelé bendôbaʼan asu mveane ya mvaane mekua. 22Eyoñe te *ntuni a ye bulu nsem asu dé asu Nti, amu *abé a nga bo; a ye bulu nseme te a nnôm ékela a nga veban asu mveane ya mvaane mekua, wôna *abé a nga bo da ye jambane nye.

23Eyoñ mi nyiiya si ya Kanaan a bé bilé bia wum bibuma mevale mese, mia ye yene bibuma yʼété bi too te *mfuban tañ mimbu mila a mia ye bo te di bie. 24Bibuma bia ye wum e mbu nyini, mia ye ve ma bie ézezañe abôʼô mevaʼa été. 25Mbu tane mia ye di bibuma ya bilé bite, nge mia bo nalé nkôane bidi wônan wo ye nenenen, ma me ne Nti, e Zambe wônan.

26Te diane minsôn mi tit e vôm émiene ya mi nga kuli je metyi. Te boone mame ya majik nge bo mame ya bemviʼi. 27Te tyembane ntyiʼi e minlô nge tyeñe mekuʼu ya zele jôé. 28Te tenane mimbak e menyôle ane ndeme ya meyep, nge kpwele bikanga e bikôbe bienan: ma me ne Nti.

29Te sili ngo jôé si éyoñ wo tindi je na é bo ébamba amu na ngume si ôse ô za nyiin ébamba été a bo mbia jôm e mise me Nti. d 30Mia ye baʼale besabate bam a semé vôme wom a nʼétyi: ma me ne Nti.

31Te kean e be ba ba loone minsisim bekôn nge biʼi mam ma ye boban melu ôsu, mi za ve miabebien mvin a be: ma me ne Nti, e Zambe wônan. 32Wo ye tebe tetele asu ya nyô nlô ô ntoo ne fuum a semé éto nnôme jé. Wo ye ko Zambe wôé woñ: ma me ne Nti.

33Nge *ntabe wo zu tabe e si jenan mia be be, te belan wô ane e ne te yian. 34Mia ye belan e *ntabe ô too be mia ane bialébialé ya zañe jenan; wo ye nyeʼe nye ane womien, amu mi nga too mintabe e si yʼEjipte: ma me ne Nti e Zambe wônan.

35Mia ye bo te bo ékotekot toʼo e ntyiʼane mejô été, toʼo éyoñ mia veʼe nté a ndam, nge adit nge abim. e

36Mia ye belane minlôt mi ne zôsôôô, metyi minlôt me ne zôsôôô, nkoé ô ne zôsôôô, a viek ô ne zôsôôô: ma me ne Nti e Zambe wônan, Nyô a nga soo mia si yʼEjipte. 37Mia ye baʼale memvinda mam mese a minjôane miam mise a bo mie: ma me ne Nti.

Bible en langue Bulu

© LʼAlliance Biblique du Cameroun, 2007

More Info | Version Index