Search form

LEVITIK 2

Mimvean ya Mefup

(Lv 6:7-11; 7:9-14; Nlb 15:4-10)

1Nge mveane môt éziñ ô ne jôme ya mefup, mveane te wo ye bo mbamba avut; a ye sôé mbon été yôp a meyemete mʼélé ma nyume mvaé. 2A ye zuu avute te e be betuni, bone bʼAron; a ye jalé mbamba avut ate e wo wé été, mbon ô too nsôan été a meyemete mʼélé ma nyume mvaé; *ntuni a ye diʼi biôme bite bise ataʼa metunaʼa yôp, e too jame ya simesan. Ô ne mvean ya mefup wo diʼibane nduan, ô too mbamba menyum e be Nti. 3Jôm ja ye buk e mvean ôte ja ye bo asu Aron a bone bé; ngab ja dañ étyi e mimvean mia diʼibane nduan asu Nti nje le.

4Nge wo ve biôme ya mefub ñyaman e mbum été, wo yiane belan toʼo mbamba avut toʼo biwôlé bi ne te mvusan, mfuʼan a mbon, nalé fe biwôlé bi nʼékekep bi too te mvusan ve mbon ô too été.

5Nge mveane wôé wo so mefup, ñyañane fulafan, mveane te wo ye bo mbamba avut, mfuʼan a mbon, mvusu momo été, 6wo ye beʼe wô bifuse bifus, a sôé mbon été: ô ne mveane ya mefup.

7Nge mveane ya mefube wôé ô ne ñyaman étañ étyé yôp, mveane te wo ye bo mbamba avut mfuʼan a mbon.

8Wo ye zuu mveane ya mefub ôte ô ne mboon a biôm bite e be Nti, wo ye zu liti wô *ntuni a nye a ye bôé wô e fefel ataʼa metunaʼa. 9Ntuni a ye vaa ngab ja yiane veban é too jame ya simesan, a diʼi je ataʼa metunaʼa yôp. Ô ne mveane ya mefub wo diʼibane nduan, ô too mbamba menyum e be Nti. 10Ngab ja ye liʼi ja ye bo asu Aron a bone bé; é ne ngab ja dañ étyi e mimvean mia diʼibane nduan asu Nti.

11Teke mvean éziñ ya mefub wo ye bi mvusu, amu mia ye bo te diʼi jôm éziñ é ne mvusan nge na é bili wôé e biôm bia diʼibane nduan asu Nti été. 12Jôm é bili mvusu nge wôé mi ne ve je Nti foʼo vʼane mveane ya bembômô; ve ja ye bo te veban ane mveane ya mefub ô ne mbamba menyum. 13Wo ye futi nku e mimvean mise ya mefup; wo ye bo te liʼi mveane wôé ya mefub te nku ya élate Zambe wôé ajô te mimveane miôé mise mia yiane bi nku. a 14Nge wo ve Nti *bembômô ya mefup, wo ye zuu bezôzô be fôn mbubane nduan, mfefé nlisi ntyaʼan ô too mveane ya *bembômô bôé ya mefup. 15Wo ye sôé mbon été yôp a meyemete mʼélé ma nyume mvaé; ô ne mveane ya mefup. 16Ntuni a ye diʼi ngabe ya mefes me ne ntyaʼan, nalé fe mbon a meyemete mʼélé mese: ô ne mveane ya mefup wo diʼibane nduan asu Nti.

Bible en langue Bulu

© LʼAlliance Biblique du Cameroun, 2007

More Info | Version Index