Search form

LEVITIK 21

Metiñ ma fombô betuni a ényiñe jap

(Ez 44:20-25; Eza 52:11; Ml 3:3)

1Nti a nga jô Môze na: Kate bone bʼAron be ne betuni na: Ntuni a nji yiane ve émiene mvin a nnambane mbime môte wé. 2Vengevenge ve bôt be ne foʼo émbé: nyia, ésaa, mona fame wé, mona minga wé, monyañ, 3a kale jé é ngenan éndun é too nye bebé, éyoñ é ngenan te ke aluk; vʼane nguleya ve émiene mvin be kal éte. 4Ezezañ ya bôte bé, *ntuni a bili ésaé ntebʼôsu; ajô te a nji yiane ve émiene mvin amu nalé a ye samele nye. 5Eyoñ awu e né, betuni be nji yiane sôté éfase nlô nge tyeñe zel e mefefele mebaé yʼanyu, nge tene mimbak e menyôle map. 6Ba ye bo étyi asu Zambe wob a bo te ndaman étyi ya jôé Zambe wop, amu mbe ba ve Nti mimvean mia diʼibane nduan, bidi bi Zambe wop: ajô te ba yiane bo étyi. 7Ba ye bo te luʼu minga ébamba nge nyô a maneya same, nalé fe ba ye bo te luʼu minga nnôm a te suu: amu *ntuni a nʼétyi asu Zambe wé. a 8Môt yʼIsraél ase a ye semé étyi ya betuni amu mbe ba liti ma bidi mia ve Zambe wônan; ajô te *ntuni a ye bo étyi mfaʼa wé amu me nʼétyi, ma, Nti, me nga tobe Israél na a bo ayoñ e nʼétyi. 9Nge ngone *ntuni ja samele ébien a mboon ébamba, a samele ésaa: ajô te ba ye diʼi nye nduan.

10Ntuni nnen a ne évete betuni; a nga teléban étyi a ñwoʼone mbone *môs a nga taté bisaé bié, a ne nguleya jaé mengômesan me nʼétyi, ajô te a nji yiane tabe nsoé nlô, nge nyabe mengômesane mé. 11A ye bo te subu mbime bebé; nge ve émiene mvin toʼo éyoñ ésaa nge nyia be wuya. 12A ye bo te kui atane ya vôme wom a nʼétyi, nge ndaman étyi ya e ndaa Zambe wé: amu a nga teléban étyi a mbon ba woʼo ya Zambe wé. Ma me ne Nti. 13A ye luʼu vʼéndune ngon. 14A ye bo te luʼu nkus nge minga be nga suu, nge minga ébamba nge nyô be maneya samele, ve a ye luʼu éndune ngone ya ayoñe dé. 15A za bi mvoñe bôt é ne te *mfuban ézezañe bôte ya ayoñe dé: amu ma me ne Nti a telé nye étyi.

16Ane Nti a nga kobô Môze a jô nye na: 17Kobôʼô Arone na: É miaé mi bôt mia zu, teke môt éziñ ya mvoñe jôé a bili éyem éziñe nyôl a ye bi nkañesane ya subu bebé ataʼa metunaʼa na a ve ma bidi biam. 18Teke ñyeyem éziñ wo ye nyoñeban ésaé éte: toʼo ndindim, mfeñke abo, nyô jôé dé é bili éyem éziñ nge na abo, wo, jôm jia yʼété é ne ayab a lôte ji évok. 19Nyô abo nge wo bi ne mbuʼan; 20Nyô a ne akule mvus nge ôwuluwula, nyô a kone mis, nyô a kone mintyañ, nyô a kone mebata nyôl, nge nyô a ne *miak. 21Te ke wua ya mvoñe bôte *ntuni Aron a bili éyem éziñe nyôl a ye subu ataʼa metunaʼa bebé na a ve Nti mimvean mia diʼibane nduan; amu a bili éyem éziñ, nde a nji bi nkañesane ya bo bisaé *ntuni a yiane bo. 22A ne nguleya di metunaʼa me ne ma mvean, nalé fe bidi bia dañ étyi a bi bi nʼétyi. 23Vʼamu a ne ñyeyem, a ye bo te subu bebé éndelé é tyele e zañe *nda yʼétyi, nge subu a kui ataʼa metunaʼa. A nji yiane ndaman étyi ya *nda jam é nʼétyi amu me ne Nti a ma ma telé betuni étyi na be bo mʼésaé. 24Ane Môze a nga kalane Aron mejô mete, e bone bé a bone bʼIsraél bese.

Bible en langue Bulu

© LʼAlliance Biblique du Cameroun, 2007

More Info | Version Index