Search form

LEVITIK 22

Bôt be nji yiane di mimvean mi nʼétyi

(Lv 7:19-21; 1 Ko 11:28-30; Nlb 18:8-19)

1Ane Nti a nga kobô Môze a jô nye na: 2Kobôʼô Aron a bone bé na be bo te nambe mimvean mi nʼétyi ya jôé dam: ma me ne Nti.

3Jôʼô be na: É miaé mia zu, nge môt éziñe ya *nda bôte betuni a ye subu bebé a mimvean mi nʼétyi bone bʼIsraél ba ve Nti a too te *mfuban, ba ye vaa nye te beta bo ésaé jam Ma me ne Nti. a 4Môt ase ya mvoñ Aron a kone *zam nge menyôlôk, a ye bo te di mimvean mi nʼétyi akekui a ntoo *mfuban. Avale te fe e né mfaʼa nyô a nambe môt a ne mbilane mvin amu nnambane mbim, a nyô meyôm me nga kui atan. b 5Môt a ye nambe jôm ja nyiʼitan a ntoo mvin, nge nambe môt a beʼe nsem wo selan, aval ese nsem ôte ô né 6môt ate a ye tabe te *mfuban a kui mamengôʼé; a ye bo te di mimvean mi nʼétyi, ve a ye wobane mendim. 7Eyoñe jôb e dimiya, a ye bo *mfuban, a éyoñe te a ye di mimvean mi nʼétyi, amu bidi bié le. 8A ye bo te di tit ja te wu ntui, nge mbilize amu é za ve nye mvin: ma me ne Nti.

9Betuni ba yiane bo e jam ma bendé be, toʼo ajô mam bidi. Nge ba ndaman étyi ya bidi, ba ye wu. Ma me ne Nti. A ma ma telé be étyi ésaé jam été.

10Môt ase a nji bo *ntuni a se nguleya di mvean ô nʼétyi. E môt a ne nneñ be *ntuni, a nyô a saé asu maʼan be nye ba ye bo te di mvean ô nʼétyi. 11Ve mbo ésaé *ntuni a nga kus a moné a ne ngul ya di, nalé fe nyô a nga bialé e *nda jé été; bebaane ba ye di bidi bié. 12E ngone *ntuni é nga luʼu môt a nji bo *ntuni, a ye bo te di ngab be nga kandé e mimvean mi nʼétyi été. 13Ve ngone *ntuni é ne nliʼane nkus nge na be nga suu te mon, é bulane bʼésaa aval ane melu a nga too mongô, é ne ngul ya di bidi bi ésaa. Ve nyô a nji bo *ntuni a se ngul ya di.

14Nge môt a di mvean ô nʼétyi e fuʼan, a ye yaʼane *ntuni e tañe mvean wo yiane kui a bete fe ngabe tane ya tañ éte. 15Betuni ba ye bo te ndaman étyi ya mimvean mi nʼétyi e mie bone bʼIsraél be nga kandé asu Nti.

16Nge ba di mie éyoñ be nji bo nkômesan, be betéya bone bʼIsraél étom bitul a nje ja sili nkôman. Ma me ne Nti, a ma ma telé betuni étyi ésaé jam été.

Ntobane *bityiʼa asu metunaʼa

(Dt 17:1; Ml 1:8, 13-14; 2 S 24:24)

17Ane Nti a nga kobô Môze a jô na: 18Kobôʼô Aron, bone bé a bone bʼIsraél bese a jô be na: Môt ase ya *nda Israél, nge mintabe yʼIsraél a ye ve Nti mimvean mia diʼibane ngumba, mi too jôm émien a nga tiñeti, nge jôm a ve ane nleme wé ôbien wo kômbô, 19a ye nyoñe nnôm a ne teke ayeñ e benyak, e bitoñ mintômba a bitoñe bikela été, éyoñe te ma ye bo nye mvaé.

20Mia ye bo te ve étyiʼa é bili éyem éziñ amu ma ye bo te kañese je asu denan.

21Nge môt a ve Nti éyeme ya beta mbam nge mone mbam ane mveane ya nlatane ngbwa, amu a tôé jam a nga tiñeti nge na a bo ane nleme wé ôbien wo kômbô, ja yiane bo *mvoʼé ne selem, éyoñe te ja ye nyoñebane *mvoʼé. 22Mia ye bo te ve éyeme é too ndim, mbuʼane vôm éziñ, ébuʼa ntyiʼan, é beʼe étut, é kone zamengôla nge bikôbaʼa, mia ye bo te ve je ane mvean wo diʼibane nduan asu Nti ataʼa metunaʼa yôp. 23Nge tit éziñ: nyak, ntômba nge ékela é bili éyem éziñ, nge na bibuʼa bié biziñ bi nji yaé ane da yian, be ne ve je ane mvean *nlem ôbien wo kômbô, ve saa ane mveane ya tôé ntiñetan. 24Mi nji yiane ve Nti tit mimbañ mi abin mi ne nkoʼon, ntyaʼan, ntéan nge ntyiʼan, a mia ye bo te tube betite *miak avale te e si jenan. 25A te kusane avale betite te e mo bikuu a ve ma be, ma, e Zambe wônan, ane *bityiʼa. Mvaan be nga vaa be bibuʼa ya nyôl wo futi be e ngabe betit be mbili ayeñ, ajô te me se fe nguleya kañese éyoñ mia ve ma be. d

26Ane Nti a nga kobô Môze a jô nye na: 27Éyoñe mone nyak, ntômba nge ékela a ndôme bialé, a yiane nyiñe fefele nyia tañe ngume sondô. Ataté môse muame, ma kañese na be ve ma nye ane mvean wo diʼibane nduan. 28Ve mi nji yiane wôé ngale nyak, ngale ntômba nge ngale ékela baa mon môse wua. 29Eyoñe mia ve Nti étyiʼa ya mvean akéva, mia ye ve je avale da yiane na é nyoñebane *mvoʼé.

30Ja ye diban e *môs ôbien ja te veban; mia ye di je jôm te kui mametyé: ma me ne Nti.

31Mia ye baʼale mebendé mam a bo me: ma me ne Nti.

32Mia ye bo te ndaman étyi ya jôé dam é nʼétyi, nalé ma ye bo étyi e bone bʼIsraél été: ma me ne Nti a nga tobe mia mi bo ayoñ e nʼétyi. 33A me nga vaa mia si yʼEjipte na me bo e Zambe wônan: ma me ne Nti.

Bible en langue Bulu

© LʼAlliance Biblique du Cameroun, 2007

More Info | Version Index