Search form

LEVITIK 24

Nkôman ébeʼe belambe a minnoñ mi belet

(Nk 27:20-21; Nlb 8:1-4; Za 4:2-14; Nk 25:23-30)

1Ane Nti a nga kobô Môze a jô na: 2Bendéʼé bone bʼIsraél na be zuu wo mbon ôlive a ne ntyaʼan ô too *mfuban abui asu ébeʼe belambe, nalé belambe ba ye yôñ éyoñ ése. 3Aron a ye telé ébeʼe belambe e *nda éndelé bendôbaʼan, asu éndelé ja solé éwolo yʼélat; belambe ba ye yôñ ataté mamengôʼé a kui mametyé ôsu viam. Atiñe ya éyoñ ése nde le asu miaé mienan mise. 4Aron a ye telé belambe ôsu viam, ébeʼe belambe é ne nkôman a nya or yôp, nalé ba ye yôñ melu mese.

Belet mimvean

5Ane Nti a nga jô Môze na: Nyoñe nteʼan avut a yame belet é ne njiñelete awôm a ébaé, jia ése yʼété é too kili ésaman. 6Wo ye bôé je minnoñ mibaé ôsu viam, e tawôlô nya or yôp, nnoñ ôse belet ésaman. 7E nnoñe belet ôse yôp, wo ye bôé bifuse meyemete mʼélé ma nyume mvaé a diʼi bie éjiane belet bi bo jôme ya simesan ba diʼi nduan ôsu Nti. 8E môse *sabat ôse, ba ye bôé mevale me belet mete ôsu viam, a bone bʼIsraél be ne ntindan ya bo nalé éyoñ ése. 9Belet éte ja ye bo nyô Aron a bone bé ba ye di e vôm a ne étyi, amu ja ye bo be e mvean ô nʼétua étyi ézezañe mimveane mia diʼibane nduan ôsu Nti. Ngab éte é nʼénjab éyoñ ése.

Fonos amu mbiasane Zambe a mintéane mié

(1 Bjb 21:9-13; Nlb 15:32-36)

10Môs éziñ ntañete ô nga boban e minkan e zañe môte yʼIsraél a mona môte yʼEjipte a nga biaé baa ngon yʼIsraél jôé na Kelômit, ngone Dibri ya ayoñe Dan, a nye a nga zu tabe Israél. 11E mone ngone yʼIsraél nyô a nga kobô jôé Zambe ébiasé a yoʼé de. Nde be nga zuu nye be Môze. 12Be nga kee nye e vôm ba tuʼa baʼale nye, be yangeʼe a kui éyoñ Nti Emien a toteya meleb ma yiane nye.

13Ane Nti a nga kobô Môze na: 14Kuliʼi nkobô ébiasé ate atan, ba bese be nga wôk ane a kobô ba ye beté mo map e nlô wé, a bôte bevoʼo bese ba ye lume nye *mekok. a 15Wo ye kobô bone bʼIsraél na: Môt ase a ye ta Zambe wé, a ye beʼe mekua yʼabé dé. 16Môt a ye kobô jôé Nti ébiasé a ye wôéban: bôte bese ba ye lume nye mekok; toʼo a ne *ntabe nge bialébialé, a ye foʼo wu amu a nga kobô jôé Zambe ébiasé. 17Môt a wôé môte mbok nye fe a ye wôéban. 18Môt a wôé éyeme môte mbok a ye ve éfe é vee. 19Nyô a balé e môte mboʼ aveñ, ba ye fe balé nye aval aveñe te. 20Mbuʼan wo tañe mbuʼan, dis da tañe dis, asôñ da tañ asôñ; ba ye bulane nye aval *abé a nga bo môte mbok.

21Môt a wôé éyem a ye bulan éfe, ve nyô a wôé môt a ye fe wôéban. 22Ntabe a bialébialé ba ye wulu a nkobe metiñe wua amu ma me ne Nti e Zambe wônan. 23Nde Môze a nga kobô bone bʼIsraél; ane be nga kuli nkobô ébiasé ate e minkan atan a lume nye *mekok. Nalé bone bʼIsraél be nga bo ane Nti a nga bendé Môze.

Bible en langue Bulu

© LʼAlliance Biblique du Cameroun, 2007

More Info | Version Index