Search form

LEVITIK 25

Mbu si ja yiane woʼon

(Dt 15:1-15)

1Ane Nti a nga kobô Môze e nkôle Sinayi a jô na: 2Kobôʼô bone bʼIsraél a jô be na: Éyoñe mia ye nyiin e si ma ye ve mia, mia ye jôʼé si é woʼon nté éziñ amu ma. 3Tañe mimbu misaman mia ye bé mefube menan, tañe mimbu misaman, mia ye fe sebe ndiʼi woone ya mefube menan a faté bibuma yʼété. 4Ve mbu zamgbwale ô ne *sabat, awoʼon e ne ngumba asu si, *sabat mfaʼa Nti: wo ye bo te bé afube dôé, nge sebe afube ndiʼi woone dôé. 5Wo ye bo te kôan bidi bia faa bibien e bekusa bôé, nge tyiʼi bisanté bibuma ya afube ndiʼi woone dôé e ne te nseban: amu mbu ôte wo ye bo mbu awoʼon e ne ngumba asu si. 6Amu awoʼone si ja ye bi da ye bo mia na mi bi jôme ya di: Womien, mbo ésaé wôé a ne fam, nyô a ne minga, mbo ésaé a nyoñe maʼan a beyeñ be too be wo. 7Biôm bise bia yô si éte bia ye fe bo bidi asu mimbam biyeme miôé a betite ya si jôé.

Mbu ya nkôtan

(Eza 61:1-3; Lk 4:16-21; Lv 27:17-24)

8Mia ye jôʼé mimbu zamgbwal tañe biyoñ zamgbwal mi lôt, nalé a ne na mimbu mewôm menyin a ébu, 9wôna e *môs awômô ya ngone zamgbwale wo ye bo môse ba bulu minsem, ajô te mia ye loñe toñ a ayenga aval ane si jenan ése ja ye wôk. 10Nalé ate mia ye telé mbu mewôm metane étyi a bôte bese ya si ba ye nyoñ éto fili jap. Mia ye yôlé mbu te jôé na mbu mefôn. Eyoñe te, môt ase ya be mia a ye bo ngul ya bulan e *nda bôte jé a nyoñe mesi mé. 11Mbu mewôm metane wo ye bo mia mbu mefôn, mia ye bo te bé jôm, nge kôane jôm é nga faa mefub te na é nga béban, a mia ye bo te faté bibuma ya afube ndiʼi woon é ne te nseban. 12Amu mbu mefône le: mia ye yene wô étyi. Mia ye di bidi mefube mebien ma ye yô. 13Mbu ôte, môt ase a ye bulane nyoñe mesi mé. 14Nge mia kuane monyoñe jôm éziñ, nge kuse jôm éziñ e mo mé, te litane nye njuk. 15Eyoñ mia ye kus nge kuan, mia yiane simesan mimbu mi lôteya, ataté mbu mefôn ô nga suʼulan, a fombô fe mimbu ya kôane bidi mi liʼiya a kui mbu mefôn wo zu. 16Tañe nkuan ja ye bet nge mimbu mi ngenan abui a kui mbu mefôn yʼôsu; a tañe nkuan ja ye sis nge mimbu mite mi liʼiya tyôtyoé. Amu tañe biyoñ ya nkôane bidi nje ba kuan. 17Môt éziñ ya be mia a ye bo te dian e môte mbok, a wo ye ko Zambe wôé woñ, amu me ne Nti e Zambe wônan.

18Boʼon ane metiñe mam ma jô a tukaʼa baʼalan miñyeʼelan mia so be ma, éyoñe te mia ye nyiñ teke woñ éziñ e si éte: 19Si ja ye yô bidi bié, mia ye di a jaé a mia ye tabe été teke woñ éziñ e *nlem. 20Nge mia sili miabebiene na mbu zamgbwale ôse bia ye di jé amu bi nji bi nkañesane ya bé nge kôane bidi ya mefube mangan, 21yemane na ma ye botane mia mbu samane na ô yô bidi mi ne belane bie tañe mimbu mila. 22Mia ye beta bé bidi mbu muame, ve mbu ôte mia ye nyiñ a bidi mi nga kôan mbu samane; mia ye nyiñ a minnôme bidi mite a kui mbu ébulu, mbu mia ye kôane bidi ya mbu muame. 23Ba ye bo te kuane si akuanakuan, amu si é nʼénjam, amu mi ne e vôme wom ane mintabe a ane beyeñ. 24Ajô te e si ése ma ye ve mia, atiñe da ve nkañesane ya beta kôté éfuse si be nga kuan da ye veban.

25Nge monyoñ a ntoo azoé a a kuan éfuse ya si jé, môt a bili nkañesan ya kôté, nalé a ne na évuvuman ja dañe nye bebé, a ye zu kôté éfuse si monyañ a nga kuan. 26Nge môt a nji bi môt a yiane kôté éfuse si jé, vʼémien a yene mezene ya kôté je, 27a ye lañe mimbu ataté éyoñ a nga kuane si, e tañe moné ja yian a mimbu mi liʼiya a kui mbu mefôn nje a ye bulane môt a nga kus éfuse si, a émien a ye bulane nyoñe je. 28Nge a bo te bi mezene ya kôté éfuse si jé, éfuse si a nga kuan ja ye bo jôme môt a nga kuse je a kui mbu mefôn, e mvuse éte nje môt a nga kuane si a ye bulane nyoñe je. 29Nge môt a kuane *nda ya tison é ne mbômaʼan a mimfin, a ye bi ngule ya kôté je éyoñe ngume mbu ô lôteya, ataté *môs a nga kuane je; ngule ya kôté *nda ja ye tabe ngume mbu. 30Ve nge *nda éte, nyô é ne tison é ne mbômaʼan a mimfin ja bo te kôtéban te na ngume mbu ô kpwaan, *nda éte ja ye bo nyô môt a nga kuse je a bôte ya mvoñe bôte jé. Ja ye bo te kôlô e mo mab e mbu mefôn. 31Menda ya minlam mi nji bo mbômaʼan a mimfin ma ye bo aval ane bifuse mesi ya si éte; be ne ngul ya kôté me éyoñ ése, a dañedañe na ma ye vas e mo me môt a nga kuse me e mbu mefôn. 32Belévit be bili ngule ya kôté menda ya bitisone biab éyoñ ése. 33Toʼo e mone Lévite mbok nye a nga kuse *nda jia yʼété, ja ye bulane bo e ndaa môt émien a ne je e mbu mefôn amu menda mete étam mme me ne ngab Belévit be bili ézezañe bone bʼIsraél. 34Be se ngul ya kuane mefub me ne mefôla ma bômane bitisone biab amu me ne mefube mab nnôm éto.

Mvolane minzôzoé mi bôt

35Nge monyoñ a kuiya azoé e fefele jôé a biôme ya nyiñe bie bi nga jemban, wo ye volô nye toʼo a ne *ntabe nge nneñ, nalé mia nye mia ye nyiñ. 36Wo ye bo te sili nye nsenge ngʼabet, amu wo ye ko e Zambe wôé woñ, a mia monyoñ mia ye ke ôsu a tabe vôme wua. 37Wo ye bo te kôlé nye moné a nsenge nge kôlé nye bidi biôé ô siliʼi nye abet. 38Ma me ne Nti, e Zambe wôé a nga soo mia si yʼEjipte, a ve mia si ya Kanaan na me bo e Zambe wônan.

Bone bʼIsraél be ne belo ba yiane kôtéban

39Nge monyoñ a ntoo *nzôzoé e fefele jôé a a kañese kuan émien be wo ane mbo ésaé, wo ye bo te ve nye bisaé bi *ôlo. 40A ye tabe be wo ane mbo ésaé a nyoñe maʼan, aval ane nneñ; a ye saane wo a kui e mbu mefôn. 41Eyoñe te a ye kôlô be wo, émien a bone bé, a a ye bulan e *nda bôte jé, éliʼi bʼésaa bé. 42Amu be ne bebo bisaé bam me nga vaa si yʼEjipte. Ba ye bo te kuane be ane ba kuan alo. 43Wo ye bo te belane nye a njet ése, ve wo ye ko Zambe wôé woñ. 44Wo ye nyoñ *ôlo a mbo ésaé minga wé e be *meyoñ ma bômane mia: é nne mia ye kus *ôlo a mbo ésaé minga wé e be be. 45Mi ne fe kuse be be soʼo e be bone bikule bi nga zu tabe si jenan, nge so *meyoñ me ne e si jenan me téʼé be be: ba ye bo jôme jenan. 46Eyoñ mi wuya, mia ye liʼi be ane élik e be bone benan; mia ye baʼale be ane belo nnôm éto. Ve mfaʼa bobenyoñ, bone bʼIsraél, môt éziñ ya be mia a ye bo te tibi monyañe yôb a njet ése.

47Nge *ntabe, nge nneñ a too e *nda jôé a bili akum a monyoñe wôé ki a kui azoé e fefele jé a kuan émien e be *ntabe ate nge e be nneñ a too e *nda jôé, nge e be môte mfe ya ayoñe *ntabe ate, 48monyoñ ate a ne ngul ya kôtéban éyoñ be maneya kuse nye. Wua ya bobenyañ a ne ngul ya kôté nye. 49Ndômenyañ nge mona ndômenyañ, nge wua ya bivuvuman bia dañe nye bebé, a ne ngul ya kôté nye. Nge a bi mezen, a ne fe ngul ya kôté émien. 50Eyoñe te ba môt a nga kuse nye ba ye lañ ataté mbu a nga kuan émien a kui mbu mefôn. Tañe moné a ye yaʼan ja ye luʼan a tañe mimbu é liʼiya a kui mbu mefôn. Tañe moné ya mbu ôse ja ye bo ane nyô ba yaʼane mbo ésaé.

51Nge mimbu mi ngenan abui, a ye bulane beta ngabe ya tañ be nga kuse nye. 52Ve nge mimbu mi liʼiya tyôtyoé a kui mbu mefôn, éyoñe te a ye bo tañ, a a ye bulan, asu ngôtô wé, tañe ja yian a mimbu mite. 53Nté ôse a ngenan a too e be môt a nga kuse nye, masa wé a ye belane nye ane mbo ésaé a nyoñe maʼan, a te kañese na masa ate a tibili nye a njet mise môé me lôô. 54Ve nge a bo te kôtéban a zene jia ya mezene ma, a ye kôlô e mbu mefôn, émien a bone bé.

55Amu bone bʼIsraél be ne bebo bisaé bam, bebo bisaé bam me nga vaa si yʼEjipte: ma me ne Nti e Zambe wônan.

Bible en langue Bulu

© LʼAlliance Biblique du Cameroun, 2007

More Info | Version Index