Search form

LEVITIK 4

Etyiʼa ya nyoñe njaman

(Hé 5:1-3; 7:26-28; Lv 16:3, 11-14)

1Ane Nti a nga kobô Môze a jô na: 2Kobôʼô bone bʼIsraél na: Éyoñe môt éziñ a ye bo *abé e fuʼan a ntyaman abendé da ya mebendé me Nti, ve bo e jam é ne te yian:

3Nge *ntuni a ne *ñwoʼone mbon nye a nga bo *abé, a a zule mekua e be bôt amu *abé te, a ye ve Nti étoñe nnôme nyak é too *mvoʼé ne selem amu *abé a nga bo asu ya nyoñe *njaman. 4A ye zuu nnôme nyak anyiine *nda éndelé bendôbaʼane, ôsu Nti, a ye beté wo wé e nlô nnôme nyak ate, a tyiʼi nye *tyiñ asu Nti. 5Ntuni a ne *ñwoʼone mbon a ye nyoñe metyi me nnôme nyak a zuu me e *nda éndelé bendôbaʼan été; 6a ye dubʼônyu vié e metyi, a a ye miame me biyoñe zamgbwal asu Nti, éndelé é tyele e zañe *nda éndelé bendôbaʼan éfas é lôô vôm a nʼétyi. 7Ntuni a ye woʼo metyi e minlaʼa mi ataʼa metunaʼa ya ôlobinda a nyume mvaé e ne asu Nti, e *nda éndelé bendôbaʼan été; a ye miame metyi me nnôme nyaʼa mese e mbôkaʼa yʼataʼa metunaʼa ma diʼibane ngumba e nʼayiine *nda éndelé bendôbaʼan. 8A ye vaa avoñ ese ya nnôme nyak da veban asu *njaman abé, avoñ ése é yale *miñya a avoñ ese e ne *miñya, 9mimbañ mi ôtam mibaé a avoñ da bômane mie, di é yale mevel a ndalebôbô é yale ések, nje a ye kandé bebé a mimbañ mi ôtam: 10a vaa bie e be nnôme nyak, aval fe ane étyiʼa ya nlatane ngbwa, *ntuni a ye diʼi bie ataʼa metunaʼa ma diʼibane ngumba. 11Vʼékôbe nnôme nyak, minsône mié mise, nlô wé, mimbiaé mié, *miñya mié a mebi mé, 12a ye kee ngume nyaʼa ôse e minkan atan, e vôm ba kut asup, a diʼi wô nduan e njaʼa yôp: a wo ye mane dik avis asube yôp.

13Nge bôte bese yʼIsraél mbe be nga bo *abé e fuʼan te na bebien be yeme nalé a ntyaman abendé da ya mebendé me Nti ve bo mam me ne te yian a ve bebiene mekua, 14a éyoñ *abé te e kulaneya, bôte bese ba ye ve nnôme nyak e metunaʼa asu *njaman abé a zuu nye ôsu ya *nda éndelé bendôbaʼan. 15Bemvendé be bôt ya nsamba ba ye beté mo mab e nlô nnôme nyak asu Nti, a ba ye tyiʼi nnôme nyaʼa *tyiñ asu Nti. 16Ntuni a ne *ñwoʼone mbon a ye zuu metyi me nnôme nyak e *nda éndelé bendôbaʼan été; 17Ntuni a ye dubʼônyu vié e metyi a miame me biyoñe zamgbwal asu Nti, ôsu éndelé ja kandé vôm a nʼétyi a vôm a dañ étyi. 18A ye woʼo metyi e minlaʼa mi ataʼa metunaʼa e ne asu Nti e *nda éndelé bendôbaʼan été. Metyi ma buk a ye sôé mese mbôkaʼa ataʼa metunaʼa ma diʼibane ngumba, nde e nʼanyiine *nda éndelé bendôbaʼan été. 19A ye vaa avoñ ese e be nnôme nyak ate a diʼi de ataʼa metunaʼa yôp. 20A ye belane nnôme nyak ate avale fe a belane nyô a veban asu *njaman abé; a ye bo avale da. Avale di nde *ntuni a ye bo asu *njaman abé wop, a *abé te da ye jambane be.

21A ye kee nnôme nyak e minkan atan a diʼi nye avale a nga diʼi nnôme nyaʼa ôsu. Metunaʼa mete me ne asu *njaman abé ya bôt.

22Nge évet éziñ yʼayoñ nje ja ye bo *abé e fuʼan a ntyaman abendé da ya mebendé me Nti, e Zambe wé, ve bo mam me nji ke yian a ve émiene mekua, 23éyoñ a yemeya *abé a nga bo, a ye ve nnôm ékela a too *mvoʼé ne selem. 24A ye beté wo wé e nlô nnôm ékela, a tyiʼi nye e vôm be wôʼô tyiʼi étyiʼa ja diʼibane ngumba asu Nti: Etyiʼa te é ne asu *njaman abé. 25Ntuni a ye nyoñe metyi ya étyiʼa ja veban amu *njaman abé a ônyu vié, a ye woʼo me e minlaʼa mi ataʼa metunaʼa ma diʼibane ngumba. 26A ye diʼi avoñ ese ataʼa metunaʼa yôp avale fe ba bo avoñ étyiʼa ya nlatane ngbwa. Avale te nde *ntuni a ye bo mfaʼa évet éte asu *njaman ya *abé dé, a da ye jambane nye.

27Nge môt éziñ yʼayoñ a bo *abé e fuʼan a ntyaman abendé da ya mebendé me Nti ve bo mam me nji ke yian a wua émien e mekua été, 28nge ba bo nye na *a yem abé a nga bo, a ye zuu ngale ékela a too teke ayeñ asu *abé a nga bo. 29A ye beté wo wé e nlô étyiʼa ja te veban asu *njaman abé; a ye tyiʼi éyem éte *tyiñ vôme metunaʼa ma diʼibane ngumba. 30Ntuni a ye nyoñe metyi ya étyiʼa éte a ônyu vié a woʼo me e minlaʼa mi ataʼa metunaʼa ma diʼibane ngumba a sôé metyi mevoʼo mese e tin ataʼa metunaʼa si. 31A ye kandé avoñ ése avale ba kandé avoñ étyiʼa ya nlatane ngbwa, a ye diʼi de ataʼa metunaʼa, a da ye bo di mbamba menyum e be Nti. Avale te nde *ntuni a ye bo mame ya *njaman abé asu môt ate, a *abé te da ye jambane nye.

32Nge a ve ngale ntômba asu *njaman abé, a ye ve nyô a ne *mvoʼé ne selem. 33A ye beté wo wé e nlô étyiʼa ja veban asu *njaman abé; a ye tyiʼi je *tyiñ é ne étyiʼa asu *njaman abé e vôm ba wôé *bityiʼa bia diʼibane ngumba. 34Ntuni a ye nyoñe metyi ya étyiʼa asu *njaman abé a ônyu vié, a ye woʼo me e minlaʼa mi ataʼa metunaʼa ma diʼibane ngumba a sôé metyi mevoʼo mese e tine ataʼa metunaʼa si. 35A ye kandé avoñ avale ba kandé di ntômba e metunaʼa ya nlatane ngbwa, a a ye diʼi de ataʼa metunaʼa e too jôm ja bebe e étyiʼa ja diʼibane nduane yôp asu Nti. Avale te nde *ntuni a ye bo mfaʼa môt ate asu *njaman ya *abé a nga bo, a *abé te da ye jambane nye.

Bible en langue Bulu

© LʼAlliance Biblique du Cameroun, 2007

More Info | Version Index