Search form

LEVITIK 5

1Nge môt éziñ a maneya wôʼô mbemen e be ba bese be ne bengaa ya jam éziñ, ve a bene kate jam a nga yen nge wôk, a ye beʼe étom yʼabé dé. 2Nge môt a nambe jôm éziñ é beʼe nsem e fuʼan: toʼo mbime tit é ne mvin, é too nyô yʼafan nge nyô ya nlam, nge mbime tite ja nyiʼitan é ne mvin, émien a ntoo fe mvin a a wuabaneya mekua été.

3Jam afe na: Nge môt a nambe môt éziñ a beʼe mvin ja kôan é too aval ese é né, ve jame te da kui be nye fuʼan; éyoñ a yemeya de, a ye beʼe mekua yʼété. 4Nalé fe na nge môt a kobô jam éziñ e fiañga yôp, émien te tuʼa tabe ntyele ya jam a kobô, éyoñe te a kane ngana ya bo mbia jam, nge ke mbamba jam, ve mvus a suʼulane yeme de, a ye beʼe mekua ya jame da yʼété.

5Ajô te môt a ye beʼe mekua ya jame da ya mam me maneya totebane ma, a ye mem *abé dé mfaʼa ôte. 6Asu ya nyoñe *njaman ya *abé dé, môt ate a yiane zuu ngale ntômba nge ékela, be ve je metunaʼa e be Nti: éyoñe te a ye nyoñe *njaman. A *ntuni a ye bo mame ya *njaman abé asu dé.

7Nge a nji bi jôme ya kuse ngale ntômba nge ékela e mo mé, a amu *abé e nga toé nye e mekua été, a ye ve Nti adu abaé nge bezum bebaé, ônon wua asu metunaʼa ya *abé, wu ôvok asu metunaʼa ma diʼibane ngumba. 8A ye zuu bie e be *ntuni, éyoñe te *ntuni a ye taté ve wu ô ne étyiʼa asu *njaman abé, a boʼo wô *tyiñ, ve teke té nlô. 9Ntuni a ye miame metyi e mimfine ya ataʼa metunaʼa: metunaʼa ya *njaman abé mme le. 10Onon ôvok wo ye bo étyiʼa ja diʼibane ngumba, aval ane ñyeʼelan ô né. Nalé ate nye *ntuni a ye bo asu môt ate mfaʼa ya mame ya *njaman ya *abé a nga bo: a *abé te da ye jambane nye. 11Nge a nji bi ngul ya kuse adu abaé nge zum ébaé amu *abé dé, a ye ve kili mbamba avut ébaé é bo metunaʼa ya *njaman abé. A ye bo te futi mbon été nge meyemete mʼélé me ne mbamba menyum, amu me ne metunaʼa asu *njaman abé.

12A ye zuu avute te e be *ntuni, a *ntuni a ye jalé mbamba avut ate e wo wé, e too jame ya simesan; a ye diʼi mbamba avut ate ataʼa metunaʼa yôb a bo jôm ja bebe e yôb ya metunaʼa ma diʼibane nduan asu Nti: mbamba avut ate a ntoo metunaʼa ya *njaman abé. 13Avale te nde *ntuni a ye bo asu môt ate mfaʼa mame ya *njaman ya *abé a nga bo, é nnambeʼe jame da ya mam mete, a *abé te da ye jambane nye. Jôm ja ye buk ja ye bo ane mveane ya mefup asu Nti.

Metunaʼa ya vaa mekua

(Nlb 5:5-8; Ez 33:14-16; 1 Yo 2:1-2)

14Ane Nti a nga kobô Môze na: 15Éyoñe môt éziñ a ye bo ékob é nʼanen a bo *abé e fuʼan a nyoñane biôm bi ne ntelan étyi e be Nti, a amu mekua mé mfaʼa Nti, a ye zuu nnôme ntômba be nga nyoñ e mbame biyem a to nyôle *mvoʼé ne selem, womien wo ye tote tañe besikel a yiane kui, ve sikel a yiane bo nyô ba belane nye *nda yʼétyi. 16Môt ate a ye fe bulane jôm é nga ndaman étyi ya *tabernakel a beté fe e ngabe tane ya tañe jôme te é ne kui; éyoñe te a kalane je *ntuni. Ntuni a ye bo mam ya *njaman abé asu dé a nnôme ntômba a nga veban ane étyiʼa ya vaa mekua, a mekua mete ma ye jambane nye.

17Nge môt éziñ a bo *abé a ntyaman abendé da ya mebendé me Nti e fuʼan, ve bo mam me nji yian a ye beʼe mekua a adite ya ékobe jé.

18A ye zu liti *ntuni nnôme ntômba asu metunaʼa ya vaa mekua; a ye nyoñe nye e mbame biyem, a too *mvoʼé ne selem a tañe jé é too avale womien wo ye tyik. Asu dé, *ntuni a ye bo mame ya *njaman ékobe jé a nga bo e fuʼan, a ékobe te ja ye jambane nye. 19Metunaʼa mete me ne ma ya vaa mekua. Môt ate a nga futi foʼo émien e mekua été asu Nti.

20Ane Nti a nga kobô Môze na: 21Éyoñe môt éziñ a ye bo *abé a bo jam e ne te yian mfaʼa Nti, éyoñ a laa môt a ne nye bebé minsos ajô jôm a nga naan e be nye, nge tañ éziñ a nga ve nye mo, nge wup, nge ñwôlane môt ba nye be too jôm a ngul, 22nge nkatane na a nji ke yene jôm é nga jañ, nge nkalane minkal mi nʼékotekot ajô nseme wua ya minsem mise môt a ne bo, 23éyoñ a ye bo *abé nalé a beʼe mekua, a ye bulane jôm a nga wup, nge wôlé a ngul, jôm be nga kee nye a baʼale, 24nge ke jôm éziñ nje a nga kalane je minkale mi nʼékotekot. A ye bulane je ngum a beté fe e ngabe tane yʼété, éyoñe te a kalane je môt a ne je e *môs ôbien a ye ve metunaʼa mé ya vaa mekua. 25Amu mekua mé mfaʼa Nti, a ye zuu *ntuni nnôme ntômba a too *mvoʼé ne selem, nyoñan e mbam été, tañe jé é too nyô wo ye ve: metunaʼa mete me ne ma ya vaa mekua. 26A *ntuni a ye bo mame ya *njaman asu Nti mfaʼa wé, a mekua mete ma ye jambane nye aval ese me né.

Bible en langue Bulu

© LʼAlliance Biblique du Cameroun, 2007

More Info | Version Index