Search form

LEVITIK 6

Miñyeʼelan mevale meva e be betuni Ñyeʼelan ajô *bityiʼa bia diʼibane ngumba

(Lv 1; Nlb 28:3 akk; Lv 2)

1Ane Nti a nga kobô Môze a jô na: 2Bendéʼé Aron a bone bé na: Atiñ da fombô *bityiʼa bia diʼibane ngumba nde di: Bityiʼa bia diʼibane ngumba bia ye tabe, e di ataʼa metunaʼa ngum alu a kui mametyé, nduane ya ataʼa metunaʼa ja ye yôñ été. 3Ntuni a ye jaé alôʼô ndombo dé a jaé fe mekuba me ndombo e nyôle jé; a ye vaa asube da kutane nduane ja diʼi *bityiʼa ataʼa metunaʼa yôp a kute de e fefel ataʼa metunaʼa. 4A ye vaa mengômesane mé a jaé mefe asu ya kee asup e minkan atan, e vôm a ne te mvin. 5Nduan ja ye yôñ ataʼa metunaʼa yôp, ja ye bo te dim. Mametyé mese, *ntuni a ye futi nduane njaʼa, a bôé *bityiʼa bia diʼibane ngumba été yôp, a a ye diʼi avoñ étyiʼa ya nlatane ngbwa. 6Nduan ja ye yôñ éyoñ ése teke dim.

7Atiñ da fombô mveane ya mefub nde di: Bone bʼAron ba yiane ve wô asu Nti mesu me lôô be ataʼa metunaʼa. 8Ntuni a ye kandé, e mveane ya mefub été, ngum doé mbamba avut; mbon a meyemete mʼélé ma nyume mvaé me bete e mveane te yôp, a a ye diʼi biôme bite ataʼa metunaʼa yôp, bi too jôme ya simesan é ne mbamba menyum e be Nti. 9Aron a bone bé ba ye di *mebukaʼa ya mveane te wo so mefup, ba ye di me e vôm a nʼétyi, e nseñe ya *nda éndelé bendôbaʼan. 10Ba ye bo te yame *mebukaʼa mete a mvusu. E ngabe me nga ve be e *bityiʼa biam bia diʼibane nduan nje le. Jôme te é nʼétua étyi aval ane metunaʼa ya *njaman abé a ma ma vaa mekua. 11Fam ése ya bone bʼAron ja ye di *mebukaʼa mete. Mvinda ya biyoñ bise nje le asu miaé mienan, mfaʼa ya *bityiʼa bia diʼibane nduan asu Nti, jôm ése ja ye nambe bie ja ye teléban étyi.

12Ane Nti a nga kobô Môze na: 13Mvean Aron ba be bone bé ba ye ve Nti e môse ba ye teléban ñwô wu: kili mbamba avut éla: mveane ya biyoñ bise ñwô le, éfase jia mametyé, éfas évok mamengôʼé. 14Mveane te wo ye yamban e fulafan été a mbon; wo ye zuu wô ane mveane ya mefup, ñyamane bifus, ô too mbamba menyum e be Nti. 15Ntuni ya bone bʼAron a ye woʼobane mbon ya tyendé nye e nye a ye bo mveane ya mefub ôte. E ne mvinda ya biyoñe bise e be Nti. Mveane te wo ye diʼibane ngumba. 16Mveane *ntuni ôse ya mefup wo ye diʼibane ngumba; wo ye bo te diban.

Ñyeʼelan ajô metunaʼa asu njaman

(Lv 4; Hé 13:10,13)

17Ane Nti a nga kobô Môze na: 18Kobôʼô Aron ba be bone bé na: Atiñ da fombô metunaʼa ya *njaman nde di: E vôme ba tyiʼi étyiʼa ja diʼibane ngumba nye ba ye tyiʼi étyiʼa ja veban asu *njaman ôsu Nti: é ne jôm é nʼétua étyi. 19Ntuni a ye ve étyiʼa asu *njaman, a ye di je; ba ye di je e vôm a nʼétyi, e nseñe *nda éndelé bendôbaʼane. 20Jôm ése ja ye nambe minsône mié ja ye teléban étyi. Nge metyi me nga fas a nambe ngômesan, a ye sôb afôla metyi me nga kabetan e vôm a nʼétyi été. 21Ba ye bôé vieʼ ékoon be nga yamʼétyiʼa te; nge ô ne wu mvot, ba ye sé a suʼusu wô mendim. 22Fam ése ya betuni ja ye di je, é ne jôm é nʼétua étyi.

23Ve ba ye bo te di étyiʼa ése é ne asu *njaman abé nje be nga zuu metyi e *nda éndelé bendôbaʼan asu mboone mame ya *njaman abé e vôm a nʼétyi: ja ye diʼibane nduan.

Bible en langue Bulu

© LʼAlliance Biblique du Cameroun, 2007

More Info | Version Index