Search form

LEVITIK int

Mejô yʼatataʼa

Kalate Lévitik a ne kalate lale Môze a nga tili. A bili bekapitel mewôm mebaé a zamgbwa.

Kalate nyô a ne kalate metiñe Zambe a nga kalane Môze asu Môze émien, asu betuni a asu ayoñ Israél ese. Metiñ mete ma fombô metunaʼa (kapitel 1–7), betuni ba yian ésemé, dulu dabe ki e yiane bo éjijin (8–10), miñyeʼelan ajô mfuban (11–16), ntabane wo yian ayoñe bôt e ne ntelan étyi asu Zambe a nʼétyi (17–26), mintiñetane bôt be ne tiñeti Zambe a mimveane mevale meva (27).

Ñyeʼelan: Kalate Lévitik a kobô ajô nda éndelé bendôbaʼan a lôte biyoñ mewôm menyin; Nalé a so amu Zambe, anyu be Môze, a kômbô yeʼele bone bʼIsraél na ba yiane yeme belane nda éndelé éte, nalé ja ye foʼo bo e vôme Zambe ba be bôt ba tôban. Zambe émien a nji tabe valé be lôô nye minsôn a bives, ve vôm ate nye a ve môt afôla a éyoñe ya bi metôb a melat a Nye, mfulaʼan e zañe jé a môt.

Môt a nji nyiin e mfulaʼan ate été a émien. Ajô te Lévitik a liti bia bi yem tin ésaé ntuni a bili ayoñ Israél été; ntuni a ne ntebe zañ e zañe Zambe a môt, nalé fe e zañe môt a Zambe. Te na njô bôt a nkulu mejô be tebe, ntuni nyʼétam a mbe ntebe zañ a ne ntindane ya bo ésaé te. Ntuni étam nye a nyiin e nda éndelé bendôbaʼan; nyʼétam a subu ataʼa metunaʼa bebé mfaʼa ya liti mimveane bôt ba ve Zambe; nyʼétam a bo mingum mi mam miziñ, a tote bifia mengakaʼa ya njaman abé; nyʼétam a ne nguleya jô na bôt, betit a biôm bi ne mfuban, nge na te mfuban; nyʼétam a ve miñyeʼelan mia tôban a metiñe ya mbamba ntaban a mboone mam me Zambe. Nge ntuni a ne momo, élate fe é ne momo e zañe Zambe a bôt.

Eyoñe ntili kalate Hébre a loone Yésus na Ntuni Nnen, a kômbô liti na mfaʼa wé, Lévitik nye a nga taté kate jame di ôsusua na Yésus nye a ye bo ntebe zañ ate, Nyô a nʼétam a ntindane na Zambe a belane nye asu ya jamé bôt abé a ve bʼényiñ.

Ajô te kalate Lévitik, e metiñ, miñyeʼelan a mebendé été, a bo bebuni ya mevôm mese a biyoñ bise be yeme na mfulaʼane ya môt a bi a nya Zambe a ne foʼo jam da yian asu ényiñe jé.

Bible en langue Bulu

© LʼAlliance Biblique du Cameroun, 2007

More Info | Version Index