Search form

NLAÑANE BÔT 1

Nlañane bôt e *nkôte si ya Sinayi

(Nlb 2; 26:1-57; Nli 7:4-8)

1Nti a nga kobô Môze e *nkôte si ya Sinayi, e *nda éndelé bendôbaʼan été, e ngone baa alu da ya nkôlane wobe yʼEjipte, a jô nye na: 2Boʼok élañe bôte bese yʼIsraél avale *meyoñ a menda me bôte map me né; bôte bese ba ye lañeban wua wua. 3Mia Aron mia ye lañe bôte bese yʼIsraél be ne nyoñe biôme mewosan, ataté ba be ne mimbu mewôm mebaé a kui ba ba lôte valé, avalʼane minkane bita miap mi né. 4Mia be môte wua ya ayoñ ese mia ye bo ésaé, môt ate a too évete ya *nda bôte jé. 5Biyôlé ya bôte mia be be mia ye bo ésaé mbie bi: mfaʼa Ruben: Elisur e mone Sédéur;

6Mfaʼa Siméon: Selumiél, e mone Surisadayi;

7Mfaʼa Yuda: Nason e mone Aminadab;

8Mfaʼa Isakar: Netaniél, e mone Suar;

9Mfaʼa Zabuloñ: Eliab e mone Elôn;

10Mfaʼa bone be Yôsep: e be Efrayim: Elisama, e mone Amihud; e be Manasé: Gamliél e mone Rédasur;

11Mfaʼa Bényamin: Abidan, e mone Gidéôni;

12Mfaʼa Dan: Ahiézer, e mone Amisadayi.

13Mfaʼa Azér: Pagiél, e mone Okran.

14Mfaʼa Gad: Eliasaf, e mone Déuél;

15Mfaʼa Néftali: Ahira, e mone Enan.

16Bivete ya menda me bôt bi nga toban, bi too fe bivete bezimbi yʼIsraél. 17Ane Môze a Aron be nga nyoñ e bôt be nga tobane ba e nsamba wop. 18E *môs ôsu ya ngone baa, be nga sulane bôte bese, bone bʼIsraél bese, ataté mimbu mewôm mebaé, a ke ôsu, be nga tiliban, môt ase e jôé dé, avale *meyoñ a menda me bôte map me né. 19Môze a nga lañe be e *nkôte si ya Sinayi, avale Nti a nga bendé nye.

20Mfaʼa mvôʼô Ruben, e ntôle mone Israél, bindane biap avale *meyoñ a menda me bôte map me né, be lañe bôte bese môé wua wua, ataté ba be ne mimbu mewôm mebaé, a ke ôsu, ba bese be mbe ngule ya nyoñe biôm mewosan, 21ba be nga lañeban e mvôʼô Ruben be mbe bôte toyini mewôm menyin a étan, mintete misaman a mewôm metan.

22Mfaʼa bone be Siméon, bindane biap avale *meyoñ a menda me bôte map me né; nge wo lañe biyôlé bi bôte bise jia jia, ataté mimbu mewôm mebaé a ke ôsu, ba bese be mbe nguleya nyoñe biôm mewosan. 23Ba bese be nga lañeban e mvôʼô Siméon be mbe toyini mewôm metan a ébu a mintete mila.

24Mfaʼa bone be Gad, avale menda me bôte map me né, bindane biap ane meyoñe map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôme mewosan, 25ba be nga lañeban e mvôʼô Gad be mbe toyini mewôm menyin a étan, mintete misaman a mewôm metan.

26Mfaʼa bone be Yuda, avale menda me bôte map me né, bindane biap ane meyoñe map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôme mewosan, 27ba be nga lañeban e mvôʼô Yuda be mbe toyini mewôme zamgbwal a ényin a mintete misaman.

28E be bone bʼIsakar, avale menda me bôte map me né, bindane biap ane meyoñe map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôme mewosan, 29ba bese be nga lañeban e mvôʼô Isakar be mbe toyini mewôm metan a ényin a mintete minyin.

30E be bone be Zabuloñ, avale menda me bôte map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôme mewosan, 31ba be nga lañeban e mvôʼô Zabuloñ be mbe toyini mewôm metan a zamgbwal a mintete minyin.

32E be bone be Yôsep: ba bʼEfrayim ôsusua: bindane biap ane *meyoñ a menda me bôte map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôme mewosan, 33ba bese be nga lañeban e mvôʼô Efrayim be mbe toyini mewôm menyin a mintete mitan.

34Bone be Manasé, avale menda me bôte map me né, nge biyôlé bi ne nlañan ataté mimbu mewôm mebaé a ke ôsu, ba bese be mbe nguleya nyoñe biôme mewosan, 35ba be nga lañeban e mvôʼô Manasé be mbe toyini mewôm mela a ébaé a mintete mibaé.

36Bone be Bényamin, avale menda me bôte map me né, bindane biap ane meyoñe map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôm mewosan, 37ba be nga lañeban e mvôʼô Bényamin be mbe toyini mewôm mela a étan a mintete minyin.

38Bone be Dan, avale menda me bôte map me né, bindane biap ane meyoñe map me né, nge wo lañe biyôlé ataté mimbu mewôm mebaé a ke ôsu, ba bese be mbe nguleya nyoñe biôme mewosan, 39ba bese be nga lañeban e mvôʼô Dan be mbe toyini mewôm mesaman a ébaé a mintete zamgbwal.

40Bone bʼAzér, avale menda me bôte map me né, bindane biap ane meyoñe map me né, nge biyôlé bia lañeban ataté mimbu mewôm mebaé a ke ôsu, ba bese be mbe nguleya nyoñe biôme mewosan, 41ba bese be nga lañeban e mvôʼô Azér, bôte toyini mewôm menyin a jia a mintete mitan.

42Bone be Néftali, bindane biap avale *meyoñ a menda me bôte map me né, nge biyôlé bia lañeban ataté mimbu mewôm mebaé a ke ôsu ba bese be mbe nguleya nyoñe biôme mewosan, 43bese be nga lañeban, e mvôʼô Néftali, bôte toyini mewôm metan a éla a mintete minyin.

44E bôte Môze, Aron a bivete yʼIsraél awôm a bibaé be nga lañ mbe le. Nda bôt ése ya menda me bôte map môte wua. 45Ba bese ya bone bʼIsraél be nga lañeban, avale menda me bôte map me né, ataté mimbu mewôm mebaé a ke ôsu, ba bese yʼIsraél be mbe nguleya nyoñe biôme mewosan, 46bese be nga lañeban bôte toyini mintete misaman a éla, mintete mitan a mewôm metan.

Esaé bone be Lévi

(Nlb 3; Nk 32:26-29)

47Bone be Lévi, ane ayoñe bʼésaa bap e né, be nji ke lañeban ba be bôte bevok. a

48Nti a nga kobô Môze na: 49Wo ye bo te lañe bone be Lévi, nge nyoñe tañe bôte jap e bone bʼIsraél bevok été. 50Vaʼa bʼésaé ya baʼale *nda é nʼétyi, e vôme mekoʼo yʼélat me bôô, a biôme mebelan bivoʼo bise bi nʼété. Ba ye beʼe *tabernakel a biôme mebelane bié bise; ba ye bo ésaé yʼété, a tabe nye e mbômaʼane. 51Eyoñe mia ye kôlô minkan, mbe ba ye mane koé *tabernakel ate. Eyoñe ya mvulane minkan, mbe fe ba ye mane tooé nye. Nge môte mfe a subu nye bebé, a yiane wôéban. 52Bone bʼIsraél ba ye vule minkan, môt ase e vôme nlinga bita wé wo kebelan, avale minsamba mewosane miap mi né. 53Ve bone be Lévi ba ye vule minkan mbômaʼan a *tabernakel a bo ésaé jap, nalé ayaa dam da ye bo te zu e be bone bʼIsraél.

54Bone bʼIsraél be nga bo foʼo vʼavale Nti a nga jô Môze.

Bible en langue Bulu

© LʼAlliance Biblique du Cameroun, 2007

More Info | Version Index