Search form

NLAÑANE BÔT 10

Metoñ me argent mebaé

(Sam 81:4-6; Yl 2:1,15; 2 Minkte 13:12-16)

1Nti a nga kobô Môze a jô na: 2Tame bo metoñ me argent mebaé; wo ye bo me a argent a dañ afip. Wo ye belane me asu ya loon ékôane bôte yʼIsraél, a éyoñ wo kate nkôlane minkan. 3Eyoñ ba loñe me, éyoñe te bôte bese ba sulan e vôm ô né, anyiine *nda éndelé bendôbaʼane. 4Nge toñ ja kobô ve jia, bivete *meyoñ étam mbie bia ye sulan e vôm e né. 5Nge toñ ja dañ kobô ngu éyoñ ôsu, minkane ya e mfaʼa jôp da tôô mia ye kôlô si a ke; 6nge ja kobô avale te éyoñe baa, minkane ya nké mia ye kôlô si a ke. 7Eyoñ ékôane bôt ja sulan, mia ye bo te loñe toñe ngu. 8Bone bʼAron, betuni, mbe ba ye loñe metoñ. Jame di da ye bo mvinda ya biyoñ bise e miaé mienane mise. 9Nge si jenan ja ke bita a wosane besiñ, nge besiñ bete ba dañe mia, mia ye loñe metoñe ngu, a nalé ate a ye volô mia mi simesane Nti e Zambe wônan, a éyoñe te mia ye nyiiban e mo besiñe benan. 10Eyoñe ya *mebôk, e *môs ôsu ya ngon ése, nge na biyoñ bife ya beta mevak, mia ye loñe toñ éyoñe ya mveane mimvean mi ne ngumba a mi ya nlatane ngbwa, a amu nalé, ma ye fe simesane mia: ma me ne Nti, e Zambe wônan.

Nkôlane Sinayi

(Nlb 9:17-23; Dt 1:6-8; 1Ko 14:40)

11E ngone baa ya mbu baa é too melu mewôm mebaé, nsume *nkut ô nga kôlô *tabernakel ya *nda éndelé bendôbaʼane. 12Nde bone bʼIsraél be nga kôlô e *nkôte si ya sinayi avale Nti a nga tiñeti nkôlane wop. Nkut ô nga ke yametane *nkôte si ya Parañ. 13Nkôlan ya ôsu te ô nga boban avale Nti a nga bendé Môze. 14Nlinga ya minkane mi bone be Yuda ñwô ô nga taté dulu a minsamba mewosane mié: Nason e mone Aminadab a too évete jap. 15Nkane bita bone be Isakar ô nga tôñ valé, Natanaél e mone Suar a too évet. 16Nkane bita bone be Zabuloñ ô nga tôñe valé, Eliab e mone Elôn a too évet.

17Be nga mane té *tabernakel, bone be Gerson a Merari mbe be nga beʼe nye. 18Wôna nlinga ya minkane mi Ruben ô nga téé dulu a minsamba mewosane mié. Elisur, e mone Sédéur a too évet; 19nkane bita bone be Siméoñ ô nga tôñe valé, Sélumiél, e mone Surisadayi a too évet; 20nkane bita bone be Gad ô nga tôñe valé, Elisaf e mone Déuél a too évet.

21Bone be Kehat be nga beʼe biôm bia dañ étyi be fe be nga téé dulu. Bone be Lévi bevok be nga yiane lame *nda éndelé, be yangeʼe na bone be Kehat be so. 22Nlinga ya minkane mi bone bʼEfrayim ô nga téé dulu a minsamba mewosane mié, Elisama e mone Amihud a too évet; 23Nkane bita bone be Manasé ô nga tôñe valé, Gamliél e mone Pédasur a too évet, 24Nkane bita bone be Bényamin ô nga tôñe valé, Abidan, e mone Gidéôni a too évet.

25Nlinga ya minkane mi bone be Dan ô nga téé dulu a minsamba mewosane mié mise. Nlinga te ñwô ô nga tele e mvuse minkane mise, Ahiézer e mone Amisadayi a too évet; 26Nkane bita bone bʼAzér ô nga tôñe valé, Pagiél e mone Okran a too évet. 27Nkane bita bone be Néftali ô nga tôñe valé, Ahira, e mone Enan a too évet. 28Avale di nde minsamba mi bone bʼIsraél mi nga téé dulu

Môze a jeñe nlitizen asu dulu

(Nk 18 Bm 1:16; Nk 40:36-38)

29Ane Môze a nga jô Obab e mone Reuél, môte ya Madian, ntyia Môze na: Bi nga ke e vôme Nti a nga jô nye na: Ma ye ve mia. Ajô te zaʼa bia be mia bi ke a bia ye bo wo mvaé, amu Nti a nga bo ngakaʼa na a ye bo Israél mvaé. 30Obab a nga yalane Môze na: Maa ye ke ke; ve ma ye bulane e si jam, e vôme bôte bam be né. 31Môze a nga yalane na: Te liʼi bia, amu wo yem mevôm bia vule minkan e *nkôte si: ajô te wo ye bo nlitizene wongan. 32A nge bia be mia bia ye ke, bia be mia fe bia ye buʼubane mvaé Nti a ye bo bia.

33Ane be nga kôlô nkôle Zambe a wulu môse mila. Ewolo élate Zambe é nga wulu be ôsu môse mila a jeñe be vôme ya woʼon. 34Nsume nkute Zambe ô mbe be minlô yôp a *môs éyoñ be nga kôlô minkan.

35Eyoñ éwolo é nga téé dulu, Môze a nga jô na: Kôlôʼô si, a Zambe! A Zambe! A besiñe bôé be ntoo ve tyamelan! Ba ba siñe wo be ntoo ve tub asu dôé! 36Eyoñe be nga bôôé éwolo si, Môze a nga jô na: Bulaʼan a Zambe, a beta nyoñ éto jôé ézezañe bizuʼu menda me bôte yʼIsraél.

Bible en langue Bulu

© LʼAlliance Biblique du Cameroun, 2007

More Info | Version Index