Search form

NLAÑANE BÔT 12

Miriam a Aron ba kobô Môze menyiñ

(Dt 24:9; 2 Minkte 26:16-21; Dt 34:10-12)

1Miriam a Aron be nga kobô Môze *abé, amu a nga luʼu ngone ya Kus; 2nde be nga jô na: Ye Nti a nga kobô ve Môze étam? Ye a nji fe kobô bia? Ane Nti a nga wôk ane ba kobô. 3Môze a mbe étua évôvoé, a lôte bôte bese be nga too si.

4Ane Nti a nga loone Môze, Aron a Miriam a jô be na: Mia belaa kuan atan a ke e *nda éndelé. Nde be nga ke. 5Ane Nti a nga sis nsume *nkut été a tebe anyiine *nda éndelé, a loon Aron ba Miriam. Nde bebaane be nga ke, 6a Nti a nga jô be na: Vôʼôlaʼan e jam ma zu jô mia. Eyoñe môte wua ya be mia a ne *nkulu mejô, ma Nti ma yené e be nye, a ma kobô nye a zene ya miñyenan a biyeyem. 7Ve a nji bo nalé mfaʼa mbo ésaé wom Môze, nyô a nyoñe njuʼu ya bôte bame bese ane da yian. 8Ma kobô nye ne ngeññ teke ntebe zañ; ma yené e be nye a a yen ane ma yené e be nye. Amu jé mi nji ko woñe ya ve Môze mbo ésaé wom bijô?

9Ane Nti a nga bulan njalan a ayaa. 10Eyoñe nsume *nkut ô nga kôlô *nda éndelé yôp, nyôle Miriam é nga yian a bifumulu mebat avalʼane sut. Mebate mete me mbe mebate me *zam. Eyoñ Aron a nga fombô nye, a nga yene nye a ntoo nzezam. 11Nde a nga kobô Môze na: Bi ne njalan a mekua. Ve ma yeʼelane wo na te ve bia *melep bia yiane me amu asuʼu dulu dangan. 12Miriam a boʼo te funane minkeñelé mi *bon mia bialé mi too ñwuan a minsône miap mi too ndiʼan éfas éyoñ ba bialé. 13Ane Môze a nga yeʼelane Nti a jô na: A Nti, ma yeʼelane wo na ô saé nye! 14A Nti a nga yalane nye na: Nge ésaa a tui nye menden asu nga ôson ô nga ye bi nye tañe ngume sondô? Ajô te be kuliʼi nye e minkan atan tañe ngume sondô fe! E mvuse ya valé étam nje a ye bi nkañesane ya bulan été. 15Eyoñe te be nga vaa Miriam e minkan tañe ngume sondô. Ve bone bʼIsraél be nji taté dulu te na Miriam a bulane nyiine minkan. 16Eyoñe mam mete me maneya, Israél a nga kôlô Osérôt a ke vule minkan e *nkôte si ya Parañ.

Bible en langue Bulu

© LʼAlliance Biblique du Cameroun, 2007

More Info | Version Index