Search form

NLAÑANE BÔT 15

Minyeʼelan asu mimvean avut a mimbon

(Nlb 28:3-14)

1Ane Nti a nga kobô Môze a jô na: 2Kobôʼô bone bʼIsraél, a jô be na: Éyoñe mia ye kui e si ma ve mia na mi lôñe bitabaʼa bienan, 3a mia ye ve Nti mimvean mia diʼibane nduan, mi too mimvean mia diʼibane ngumba, nge mimvean ba ve asu ya tôé *atiñ, nge mvean ane *nlem wo kômbô, nge na e mebôʼô menan été, asu ya kulu jôm é ne mbamba menyum e be Nti, é soʼo e beta mimbam nge bone mimbame biyeme bienan été, 4môt a bo Nti mimveane mié, a ye fe zuu kili avut éla, mfuʼan a lita mbone jia a étun, 5a lita woone jia a étun asu mone ntômba ase a veban e mimvean mi ne ngumba, nge mimvean asu nlatane ngbwa. 6Nge étyiʼa é ne nnôme ntômba, ba ye zuu fe kili avut ésaman, mfuʼan a lita mbon ébaé, 7a lita woon ébaé; ma ye nyeʼe mbamba ényume ya ôtita yʼété. 8Nge nnôme nyak nye ba ve asu mimvean mi ne ngumba, nge mimvean asu nlatane ngbwa, asu ya tôé *atiñ, nge asu ya te ngume jam, 9ba ye zuu fe kili avut ébu, mfuʼan a lita mbon éla, 10a lita woon éla: ma ye nyeʼe mbamba ényume ya ôtita yʼété.

11Avale te da yiane boban éyoñ étyiʼa é ne nnôme nyak, nnôme ntômba, étoñe ntômba nge étoñ ékela. 12E tañe betit ése mia ye ve, mia ye baman tit ése yʼété a mimvean avut mi ne njôan. 13Bone bʼIsraél bese ba ye tôñe minjôane mite éyoñ ba ye ve ma mimvean mi ôtita ô ne mbamba menyum. 14Beyeñ be too be mia nté éziñ e si jenan, nge ba menda me bôte map me tabeya miaé miaé, mia be be bese mia ye tôñ avale minjôane da nge ba kômbô ve ma mimvean mi ôtita ô ne mbamba menyum. 15Miñyeʼelan mia ye bo avale da asu bôte bese, asu mia bone bʼIsraél a asu beyeñ, a miaé mise mia ye bo miñyeʼelane mite ésaé. Ma Nti, ma belane bone bʼIsraél avale da fe ane beyeñ: 16metiñ a miñyeʼelan bi ne avale da asu denan a asu dap.

17Ane Nti a nga jô Môze na: 18A kalane bone bʼIsraél minjôane mi: éyoñ mia ye nyiin e si ma kee mia 19a di bidi ya vôm ate, mia ye vaa ngab éziñ a ve me je. 20Mia ye yame mon éwôlé ya mimvean a ébañ avut be ndôme mane fuk, mia ye zuu ma je ane ba zuu mveane mefes, éyoñ be ndôme mane tyaʼa nlisi. 21Ajô te mia ye ve ma éwôlé ôsu mia ye taté yam. Nyeʼelane wu ô ne fe asu miaé mise mia zu.

22Nge mia kop e mfuʼan a bo te baʼale mebendé mete mese mme Nti a nga ve Môze, 23mam mese Nti a nga bendé mia a Môze, ataté môse Nti a nga ve Môze mebendé, a kui miaé mienan mi nga tôñe mvus; 24nge mbia mboon a nga yené e mfuʼan, bôte bese te yeme mboone te; ékôane bôt ése ja ye ve étoñe nnôme nyak asu mveʼan ô ne ngumba, ô too mbamba menyum e be Nti, mbundaʼan a mvean avut a mbon avale nyeʼelan yʼété ô né; a ye fe ve nnôm ékela asu metunaʼa me *njaman abé. 25Ntuni a ye bulu nsem asu ékôane bôt ése ya bone bʼIsraél, wôna ba ye nyoñe *njaman: amu ékobe te é ne fuʼan, a be soya mvean wo diʼibane nduan asu be Nti; be soya fe étyiʼa asu be Nti mfaʼa *njaman abé amu fuʼan ékobe wop. 26Ekôane bôt ése yʼIsraél ja ye nyoñe *njaman nalé fe *ntabe a too e zañe jap, asu bôte bese, amu ékobe te é ne fuʼan.

27Nge môte wua nye a te bo *abé e fuʼan, a ye ve ngal ékela a ntoo mbu wua ane metunaʼa asu *njaman abé. 28Ntuni a ye bulu nsem asu be Nti ajô môt a nji vañe bo abé; éyoñ a maneya bulu nsem asu dé, a ye nyoñe *njaman. 29Eyoñe môt a nji vañe bo jam, atiñe da da ye bo ésaé mfaʼa bialébialé a mfaʼa *ntabe a too e zañe jap. 30Vʼéyoñe bialébialé nge *ntabe a vañe bo jam, a taya Nti; ba ye vaa môt ate e zañe bôte bé. 31A biaséya mejô me Nti a a tyameya atiñe dé: ba ye vaa môt ate a a ye beʼe adite ya ékobe jé.

Melebe ma tôñ e môt a tyame sabat

(Dt 6:6-9; Mt 23:5)

32Valé bone bʼIsraél be ngenan e *nkôte si, nde be nga koone môt a tyaa njaʼa e môse *sabat. 33Bôt be nga koone nye a tyaa njaʼa be nga zuu nye be Môze, Aron a ékôane bôt ése. 34Nde be nga kôme baʼale nye amu jam be nga yiane bo nye e nji ke kateban. 35Ane Nti a nga jô Môze na: Môt ate a yiane wôéban; bôte bese ba ye lume nye *mekok e minkan atan. 36Ane bôte bese be nga kee nye e minkan atan a lume nye *mekok, nde a nga wu avale Nti a nga bendé Môze.

37Ane Nti a nga jô Môze na: 38Kobôʼô bone bʼIsraél na: E miaé ôse été, ba ye bo mezeʼele e ñwôndé ya mengômesane map. 39Mezeʼele mete me ne asu ya simesane mebendé me Nti a bo me; mia ye bo te tôñe minkômbane ya minleme mienan nge mi me mise menan, mi za dutu mia na mi bo bijabô. 40Avale di mia ye simesane mebendé mam, a mia ye bo me, éyoñe te mia ye bo étyi asu e Zambe wônan. 41Ma me ne Nti, e Zambe wônan, nyô a nga soo mia Ejipte na a bo e Zambe wônan. Me ne Nti, e Zambe wônan.

Bible en langue Bulu

© LʼAlliance Biblique du Cameroun, 2007

More Info | Version Index