Search form

NLAÑANE BÔT 16

Ayaa e be bone be Koré

(Nlb 26:8-11; Sam 106:16-18; Hé 10:31)

1Koré e mone Yisehar, ndaé Kehat, ndile Lévi, ba Datan a Abiram e mone Eliab, Oron e mone Pélét, belale be too e bone be Ruben, 2be nga bôndé feʼe ya wosane Môze ba be bôte mintete mitan a mewôm metane ya bone bʼIsraél, bivete ya bôt, ba be mbe be zaʼak e bikôan be too bôte ya duma. 3Nde be nga sulane vôme wua na be tebe Môze a Aron e ngame yat a jô be na: Abime mboone te e yianeya! Kee bôte bese be nʼétyi a Nti a too fe ézezañe jap, amu jé mi mia bete miabebiene yôp a dañe ngum ayoñ Israél ôse?

4Eyoñe Môze a nga wôʼô nkobô te, a nga ku asu e buti si. 5Nde a nga kobô Koré a nsamba bôte wé ôse na: A akiti mametyé, Nti a ye liti e môt a nʼéñwé a e môt a nʼétyi, a a ye zuu môt ate bebé bʼEmien. A ye bo na e môt ase Emien a ye top, môt ate a ye subu nye bebé. 6Boʼon avale di: nyoñane daʼa, Koré a nsamba bôte wé ôse, 7a akiti futaʼane nduan a ôlobinda e daʼa été, Nti Emien a lôô: e môte Nti Emien a ye top nye a ye bo étyi. Amu mboone wu ô lôteya nné, a bone be Lévi! 8Nde Môze a nga jô Koré na: Vôʼôlaʼan a mia bone be Lévi! 9Ye e ne mone jame na Zambe yʼIsraél a nga telé mia e fefel ékôane bôt ése yʼIsraél, a bo na mi subu nye bebé asu ya belane mia ésaé ya *tabernakel Nti, a telé mia ôsu ya bôte na mi baʼale be? 10A nga bo na mi subu nye bebé, wo a bobenyoñe bese, bone be Lévi a wo, vʼéyoñe ji mi nga sili fe ésaé betuni! 11A amu ajô te nde wo, a nsamba ôse mia bo ngame ya wosane Nti! Za a ne Oron ane mia kobô nye *abé menyiñ?

12Ane Môze a nga lôme bôt be ke loone Datan, Oran, Abiram, bone bʼEliab. Be nga yalane na: Bi se nguleya zu! 13Ye e ne mone jame na wo vaa bia si e vôme menyañ a wôé bia len asu ya zu mane jaa bia e *nkôte si va? Ye wo ye ke ôsu a jôô bia? 14Ô nji ke nyiñeli bia e si menyañ a wôé bia len, sa ke mefube bidi a mefube mindiʼi mi woon mme ô nga ve bia ane ngab. Ye wo buni na e bôte ba be ne mindindim? Ajô te bia ye bo teke zu? 15Ajô te Môze a nga dañe wôʼôlun a jô Nti na: Te fombô mveane wop. Me nji nyoñe be toʼo vʼéjakase jia a, me nji ke bo môt éziñ yʼété *abé.

16Ane Môze a nga jô Koré na: Womien a nsamba bôte wôé ôse, zaʼan asu be Nti a akiti mia bʼAron. 17Môt ase ya be mia a ye nyoñ ésua ôtu wé a futi ôlobinda été, éyoñe te môt ase ya be mia a ye zuu ésua ôtu wé asu be Nti. Bisua bi ôtu bise bia ye bo mintete mibaé a mewôm metan; mia Arone fe mia ye nyoñ, môt ase, ésua ôtu jé. 18Nde be nga nyoñ, môt ase, ésua ôtu jé, be nga futi nduan été, be tele fe mendeʼe mʼôlobinda e bisua été, ane baa be Môze a Aron be nga tebe anyiine *nda éndelé bendôbaʼan. Nde étôtoʼo Nti é nga faé e bʼékôane bôt ése. 19Ane Koré a nga sulane bôte bese be tebe be ngame yat anyiine *nda éndelé bendôbaʼane. Nde étôtoʼo Nti é nga faé e bʼékôane bôt ése.

20Ane Nti a nga kobô Môze a Arone na: 21Kôlaʼan ézezañe ya bôte bana été, a ma ye jiane be éyoñe jijia. 22Nde be nga ku mesu me butu si a jô na: A Zambe, wo ô nga ve ényiñ e be minsisime ya avale nsôn ése! Ye wo yaa ékôane bôt ése amu *abé ya môte wua?

23Nde Nti a nga kobô Môze na: 24Kobôʼô ékôane bôte na: Kôlaʼan a mialane mevôm mese, ôyap a étabaʼa Koré, Datan a Abiram. 25Ane Môze a nga kôlô si a ke e be Datan a Abiram; bemvendé yʼIsraél fe be nga tôñe nye mvus. 26Nde a nga kobô ékôane bôte na: Kelan ôyap a menda bindelé minkpwala bi bôte mi a te nnambane jôm éziñ é nʼénjap, mi za wu ébamane ya *abé dap. 27Ane be nga mialan e mevôm mese, ôyap a *nda Koré, Datan a Abiram. Datan a Abiram be nga kui atan a tebe anyiine menda bindelé map, ba be e binga bap, bone bap a bendaé bap.

28Ane Môze a nga jô na: Jame di nde mia ye yeme na Nti nye a nga lôme ma na me bo e mam mese ma, a na, me nji bo jam éziñ é soʼo be mamien. 29Nge bôte ba be wui ane bôte bese ba wu, nge ba tôban e mam bôte bese ba tôbane me, wôna saake Nti nye a nga lôme ma; 30Ve nge Nti a bo mfefé jam, nge si ja kui anyu dé a mine be a biôme biabe bise, a sise vôme ya miñwuan bevevee, éyoñe te nje mia ye yeme na Nti nye e bôte ba be maneya soñe na a yaa.

31Mejô mete me ngenan te mane nye anyu, nde si vôm be nga tele é nga salé. 32Nde é nga yoé anyu dé a mine be, bebien, menda map, a bôte be Koré bese a akume dab ese. 33Be nga ke vôme ya miñwuan bevevee, bebien a jôm ése é mbe énjap; ane si é nga buti be a be nga jañ ézezañ ékôane bôt. 34Israél ase a nga bômane be éyoñe a nga wôʼô ñyône wop, a nga tup, a jôʼô na: Si é za fe mine bia! 35Ane nduan é nga so be Nti a mane diʼi e bôte mintete mibaé, mewôm metan be nga liti ôlobinda e bisua bi ôtu été.

Bible en langue Bulu

© LʼAlliance Biblique du Cameroun, 2007

More Info | Version Index