Search form

NLAÑANE BÔT 18

Bisaé a mengap ma yiane betuni a bone be Lévi

(1 Minkte 23:13,24-32; Nlb 8:14-19; Lv 7:7-14,29-36; Ez 44:28-30 Lv 27:30-33; Ml 3:8-10)

1Nti a nga jô Arone na: Womien, bone bôé a *nda bôte jôé, mia ye beʼe adite ya ékob ése é ne boban e *nda é nʼétyi été: womien a bone bôé mia ye beʼe adite ya ékob ése é ne boban ésaé betuni jenan. 2Mia be bobenyoñ zaʼan, mvôʼô Lévi, ayoñ ésoo, nalé ba ye bo nlatan a wo a volô wo ésaé ôsu ya *nda éndelé é bili éwolo élat. 3Ba ye baʼale mebendé môé a baʼale *nda éndelé ése; ve ba ye bo te subu bebé a biôme mebelan bi nʼétyi, nge subu bebé ataʼa metunaʼa, mia be be mi zaa wu. 4Ba ye baʼabe a wo, a ba ye baʼale *nda éndelé bendôbaʼan asu ésaé ése yʼété. Te ke nneñ éziñ a ye zu mia bebé. a 5Mia ye baʼale vôme yʼétyi a ataʼa metunaʼa, éyoñe te ayaa Nti da ye bo te beta kui e be bone bʼIsraél. 6O lôô, me nyoñeya bobenyoñ, bone be Lévi, ézezañe ya bone bʼIsraél, Amu be ne mvean e be Nti, nde be vebaneya be mia asu ya bo ésaé ya *nda éndelé bendôbaʼane. 7Womien a bone bôé, mia ye baʼale bisaé ya éto betuni jenan asu jam ese da fombô ataʼa metunaʼa, a jôm ése é ne e *nda été, éndelé ya zañe yat, mia ye bo ésaé yʼété. Esaé betuni jenan é ne e ji me veya mia. Nneñ ase a ye subu bebé a ye wôéban.

8Ane Nti a nga jô Arone na: Ô lôô, me veya wo ô baʼale mimvean mia veban asu dam, ma ve mie e be wo a bone bôé, nalé fe jôm ése bone bʼIsraél ba telé étyi, bi ne mia mveban amu mi ne *ñwoʼone mbon, a jame te e ntoo njôan ya nnôm éto. 9E ngabe jôé nyô, ézezañe ya biôme bia dañ étyi bi ne te diʼibane nduan; mimveane miabe mise, mimveane ya avut mise, metunaʼa mabe ya *njaman abé mese, a metunaʼa ya mmeman *abé ba ye ve ma; biôm bia dañ étyi bite bia ye bo émbiôé a bi bone bôé. 10Wo ye di bie avalʼane biôme bia dañ étyi; fam ése ja ye di bie; bi ne biôm bi nʼétyi mfaʼa wôé.

11E ngabe jôé fe nyô: jôm ba kandé e mimvean ya bone bʼIsraél ô laté a jôm ése ba ye ve a mboone jame ya telé jôme te étyi mfaʼa Nti, ma ve wo bie a bone bôé be ne befam a bobebinga bôé, jame te e too atiñe ya nnôm éto. Môt ase a ne *mfuban e *nda jôé, a ye di bie. 12Ma ve wo *bembômô ba ye ve Nti; jôm ése ja dañe mvaé e mimbon, ji ése ja dañe mvaé e mfefé woon a fôn. 13Bembômô bibuma ya si ba ye zu ve Nti ba ye bo émbôé. Môt ase a ye bo *mfuban e *nda jôé a ye di be. 14Jôm ése é ne ntiñetan e be Nti Israél été, ja ye bo énjôé. 15Ntôle ya nsôn ôse ba ye ve Nti, bôt a betit, wo ye bo éñwôé, ve wo ye nyoñe ngôtô ya ntôl ôse ya môt, nalé fe ngôtô ya ntôle ya tit é nji bo *mfuban. 16E tañe ja kôté mie, wo ye nyoñe je ataté éyoñe ntôl ô ntoo ngone jia. Avale womien wo ye yen, tañ éte ja ye bo besikel be argent betan, avale sikel vôme yʼétyi a né, nalé a ne na begram awôm. 17Ve wo ye bo te nyoñe ngôtô asu mon ôsu nyak ja taté biaé, nge nyô ngale ntômba a taté biaé, nge nyô ngal ékela a taté biaé: amu *bityiʼa bi nʼétyi mbie le. Wo ye miame metyi mabe ataʼa metunaʼa yôp a diʼi avoñe dap ane mimvean mia diʼibane nduan mi too mbamba ényum e be Nti. 18Minsône miap mia ye bo émiôé avale fe ane ôngôn ba telé étyi, a avalʼane énam *abé ya mbo nnôm. 19Ma ve ataté womien, bobefame bôé a kui bobebinga bôé, ane njôane ya nnôm éto, e jôm ése bone bʼIsraél ba ye kandé e mimveane miap mi nʼétyi ba ve Nti. Elate te é ne ji é ne tekʼatyamé nnôm éto mfaʼa Nti, asu dôé a mvoñe bôte jôé. 20Ane Nti a nga jô Arone na: Wo ye bo teke ngap e si jap, a wo ye bo te bi ngap e zañe jap; ma me ne ngabe jôé a éliʼi jôé e zañe bone bʼIsraél. 21Eliʼi ma ve bone be Lévi Israél été, é ne *ngab awômô ése, maʼane ya ésaé ba bo, ésaé ya *nda éndelé bendôbaʼane. 22Bone bʼIsraél ba ye bo te beta subu bebé a *nda éndelé bendôbaʼane, be za beʼe mbeʼe ya *abé éziñ a wu. 23Bone be Lévi ba ye bo ésaé ya *nda éndelé bendôbaʼane, a ba ye beʼe adite ya ékobe jap. Njôane wu ô ne wu ya nnôm éto e miaé mienan mise; ba ye bo te nyoñ élik ézezañe bone bʼIsraél. 24Eliʼi ma ve bone be Lévi é ne mengab awômô bone bʼIsraél ba ye vaa asu Nti; ajô te me nga jô ajô dabe na: Ba ye bo te kʼélik e zañe bone bʼIsraél.

25Ane Nti a nga kobô Môze a jô na: 26Wo ye kobô bone be Lévi a jô be na: Éyoñe mia ye nyoñe *ngab awômô e be bone bʼIsraél, nje ma ve mia ane élik é soʼo be be, mia ye kandé mvean asu Nti, *ngab awômô ya ngab awômô; 27a jôme mia kandé te, ja ye lañebane mia ane fôn ba vaa afup a avalʼane njalane fandé woon ba vaa e vôm ba miate bibuma. 28Avale te nde mia fe mia ye kandé mvean asu Nti ô soʼo e mengab awômô mia nyoñ e be bone bʼIsraél, a mia ye kee Aron *ntuni mvean mia te kandé asu Nti. 29E mimvean mise ba ye ve mia, mia ye kandé ngab éziñ asu Nti; e mfaʼa ya jôm ése é nʼabeñ, mia ye kandé ngab é ne ntelan étyi. 30Wo ye jô be na: Éyoñe mi kandéya ngabe ja dañe mvaé, *ngab awômô ja ye lañeban e mfaʼa bone be Lévi avalʼane nkôane bidi ya mefup, a avalʼane nkôane mendim bibuma. 31Mia ye di *ngab awômô éte e vôm éziñ mia be bôte ya *nda bôte jôé; amu e maʼane menane le, mvolane ya ésaé mia bo e *nda éndelé bendôbaʼane. 32Teke *abé éziñ da ye nnambe mia éyoñe mi maneya kandé e ngap ja dañe mvaé, mi nji ke ndaman étyi ya mimveane mi bone bʼIsraél mi nʼétyi, a mia ye bo teke wu.

Bible en langue Bulu

© LʼAlliance Biblique du Cameroun, 2007

More Info | Version Index