Search form

NLAÑANE BÔT 19

Evele nyak; mendim ma fubu

(Hé 9:13-14; 10:22; Lv 14:1-9; Ez 36:25)

1Ane Nti a nga kobô Môze baa Arone na: 2Njôan ya atiñe Nti a nga ve ñwô wuna na: Kobôʼô bone bʼIsraél na, be zuu évele ngale nyak, é too *mvoʼé ne selem, teke ayeñ, é ngenan te beʼe mbeʼe. 3Mia ye kalane je Eléazar *ntuni, nye ki a ye kuʼi je e minkan atan, a ba ye tyiʼi je ôsu vié. 4Eléazar Ntuni a ye nyoñe metyi ya ngale nyaʼate a ônyu éyoñe te a miame me biyoñe zamgbwa ôsu *nda éndelé bendôbaʼane. 5Ba ye mane diʼi nyak mise mé me lôô. Ba ye diʼi ékôbe jé, minsône mié a metyi mé a mebi mé. 6Ntuni a ye nyoñe njaʼa élé sédre, élé izôp a évele nsinga a wua bie ézezañe nkabaʼa nduan wo diʼi nyak. 7Ntuni a ye sôbe mengômesane mé a woʼo nyôle jé mendim; éyoñe te a ye bulane minkan, ve a ye tabe te *mfuban a kui mamengôʼé. 8Môt a ye diʼi nyak a ye sôbe mengômesane mé a mendim a wobane fe mendim, a a ye tabe te *mfuban akekui mamengôʼé. 9E môt a ne *mfuban a ye kôane asube ya nyak a kee de e minkan atan, e vôm a ne mfuban; ba ye baʼale asube te asu ékôane mendim ma wosane mvin. Metunaʼa ya *njaman abé le. 10Môt a te kôane asube ya nyak a ye sôbe mengômesane mé a a ye tabe te *mfuban a kui mamengôʼé. Njôane ya nnôm éto ñwô le asu bone bʼIsraél, asu *ntabe a too be zañ.

11Môt a nnambe mbim, avale mbim ese, a ye tabe te *mfuban tañe melu zamgbwa. 12A ye tun émien a mendim mete e môse lale a e môse zamgbwale, éyoñe te a ye bo *mfuban. Ve nge a bo te tuneban ataté môse lale a e zamgbwale, aa ye ke bo *mfuban. 13Môt ase a ye nnambe mbim ve teke tun émien, a ve *tabernakel Nti mvin, ba ye vaa môt ate Israél été; amu be nji ke miame nye mendim ma wosane mvin, a mvine jé é ngenan e be nye.

14Atiñ nde di: Nge môt a wu e *nda éndelé été môt éziñ a too été, môt ate a ye beʼe mvin tañe melu zamgbwa; 15élabaʼa ése é yoo teke ébutaʼa été ja ye bo te *mfuban. 16Môt ase a ye nnambe môt a te wu nkpwaté mekôn e nlame mvus, nge nnambe mbim, bivese bi môt nge soñ, môt ate a ye tabe tee *mfuban tañe melu zamgbwa. 17Asu môt a ne tee *mfuban, ba ye nyoñ asub asu étyiʼa ya *njaman abé é nga diʼiban, a fulane de a benya mendim élabaʼa éziñ été. 18Môt a ne *mfuban a ye nyoñ abusa izôp a dube de mendim; éyoñe te a ye miame me e *nda éndelé, e bilabaʼa bise, e be bôte bese be ne valé, e be môt a nnambe bivese bi môt, e môte be nga wôé, mbim nge avus. 19Môt a ne *mfuban nye a ye miame mendime mete e be môt a ne tee mfuban; a ye bo jame te e môse lale a e môse zamgbwale, a a ye fubu nye e môse zamgbwale. A ye sôbe mengômesane mé a wobane mendim; wôna mamengôʼé, a ye bo *mfuban. 20Môt a nji bo *mfuban a a nji tuneban, ba ye vaa nye ékôane bôt été, amu a maneya ndaman étyi ya vôme Nti a nʼétyi; amu be nji ke sôé nye mendim ma wosane mvin, nde a ne mvin. 21Njôane ya nnôm éto e mfaʼa wop ñwô le. Môt a miame mendim ma wosane mvin a ye bo tee *mfuban a kui mamengôʼé. 22Jôm ése môt a ne te *mfuban a nnambe é ntoo te *mfuban a môt a nnambe nye a ye bo te *mfuban a kui mamengôʼé.

Bible en langue Bulu

© LʼAlliance Biblique du Cameroun, 2007

More Info | Version Index