Search form

NLAÑANE BÔT 2

Mvulane minkan

(Nlb 10:11-28; 24:1-6; 1 Ko 14:33,40)

1Nti a nga kobô Môze ba Aron na: 2Bone bʼIsraél ba ye vule minkan môt ase e mfôme nlinga bita wé ô né, e minlinga ya menda me bôte mabe si; ba ye vule minkan, mbômaʼane bebé a *nda éndelé bendôbaʼane.

3Ba ba ye vule minkan e mfaʼa jôp da tôô, ba ye tabe e nlinga ayoñe Yuda si a nkane bita wé. Evete ya Yuda é ne Nason e mone Aminadab. 4Nkane bita wé ô bili bôt be ne nlañan toyini mewôme zamgbwa a mintete misaman. 5Evete jap é ne Netaniél e mone Suar. 6Nkane bita wé ô bili bôt be ne nlañan toyini mewôm metan a ényin a bôte mintete minyin. 7Bone be Zabuloñ mbe ba ye tôñe valé. Evete jap é ne Eliab e mone Elôn. 8Nkane bita wé ô bili bôt be ne nlañan toyini mewôm metan a zamgbwa a mintete minyin. 9Bôte bese ba ye tabe e nlinga Yuda si, be too nlañan ane *minsamba mewosan miap mi né, be ne toyini ntet a mewôme muam a ésaman a mintete minyin, mbe ba ye taté téé dulu.

10Nlinga bita Ruben wo ye teléban e mfaʼa ya nké. Evete bone be Ruben é ne Elisur e mone Sédéur. 11Nsamba mewosane wé ô bili bôt be ne nlañan toyini mewôm menyin a ésaman a mintete mitan. 12Bone be Siméoñ ba ye vule minkan e fefele jé. Evete jap é ne Selumiél e mone Surisadayi; 13nkane bita wé ô bili bôt be ne nlañan toyini mewôm metan a ébu a mintete mila. 14Bone be Gad ba ye tôñ valé. Evete jap é nʼElisaf e mone Réuél. 15Nkane bita wé ô bili bôt be ne nlañan toyini mewôm menyin a étan, mintete misaman a mewôm metan. 16Bôte bese be ne nlañan ba ye tabe e nlinga Rubene si be ne toyini mewôme metan a jia, mintete minyin a mewôm metan. Ba ye téé dulu e nsamba baa.

17Nda éndelé bendôbaʼane ja ye téé dulu nsamba bone be Lévi ô too ézezañe ya mi mi bôte bevok. Avale minsamba mi ne ntaʼan, avale te mia ye téé dulu, môt ase été jé, môt ase a tôñe fe nlinga wé.

18Nlinga Efrayim wo ye tebe mfaʼa jôp da dim a minsamba mewosane mié. Evete bone bʼEfrayim é ne Elisama e mone Amihud. 19Nkane bita wé ô bili bôt be ne nlañan toyini mewôm menyin a mintete mitan. 20Bone be Manasé ba Vule minkan e fefele jap. Evete jap é ne Gamliél e mone Pédasur. 21Nkane bita wé ô bili bôt be ne nlañan toyini mewôm mela a ébaé a mintete mibaé. 22Bone be Bényamin ba ye tôñe valé. Evete jap é ne Abidan e mone Gidéôni. 23Nkane bita wé ô bili bôte be ne nlañan toyini mewôm mela a étan a mintete minyin. 24Bôte bese be ne nlañan be too e nlinga bita Efrayime si be ne toyini ntet a muam a ntete wua. Ba ye téé dulu e nsamba lale.

25Nlinga Dan wo ye tebe mfaʼa yʼakôé a minsamba mewosane mié. Evete bone be Dan é ne Ahiézer e mone Amisadayi. 26Nkane bita wé ô bili bôt be ne nlañan toyini mewôm mesaman a ébaé a mintete zamgbwa. 27Bone bʼAzér ba ye vule minkan e fefele jap. Evete jap é ne Pagiél e mone Okrañ. 28Nkane bita wé ô bili bôte toyini mewôm menyin a jia a mintete mitan. 29Bone be Néftali ba ye tôñe valé. Evete jap é ne Ahira e mone Enan. 30Nkane bita wé ô bili bôt be ne nlañan toyini mewôm metan a éla a mintete minyin. 31Bôte bese ya minkane mi Dañ be ne nlañan be ne toyini ntet a mewôm metan a zamgbwa a mintete misaman. Mbe ba ye suʼulane téé dulu a minlinga miap.

32Bôt be nga lañeban e be bone bʼIsraél, avale menda me bôt me né, mbe le. Ba bese be nga lañeban a vule minkan, ane *minsamba mewosan mi né, be mbe toyini mewôm mesaman a éla, mintete mitan a mewôm metan. 33Bone be Lévi be nji ke lañeban e bone bʼIsraél été, avale Nti a nga bendé Môze.

34Bone bʼIsraél be nga wulu e *zôsôô e mebendé Nti a nga bendé Môze été. Ajô te be nga vule minkan e minlinga miabe si; ajô te be nga téé dulu môt ase e mvus ayoñe dé a bôte ya *nda jé.

Bible en langue Bulu

© LʼAlliance Biblique du Cameroun, 2007

More Info | Version Index