Search form

NLAÑANE BÔT 20

Awu Miriam, mendime ya Mériba, melebe me Môze

(Dt 32:48-52; Yk 1:19-20; 3:13-18)

1Ekôane bôt ése ya bone bʼIsraél be nga kui e *nkôte si ya sin e ngon ôsu a bôt be nga tabe e Kadés. Vôm ate nye Miriam a nga wu a e nne fe a nga jambe valé. a 2Bôt be nga yi mendim; nde be nga sulane na ba tebe Môze ba Aron e ngame yat. 3Bôt be nga jeñe Môze ntañete be jôʼô na: Ngoʼé nge bi too ye wu na Nti! Emien a bibi bia bia be bobejañ. 4Amu jé mi nga zuu bia e *nkôte si wu, e bia bi ne ayoñe bôte Nti? Ye amu na bi mane zu jañ a mimbame biyeme miangan? 5Amu jé mi nga vaa bia Ejipte? Ye asu ya zuu bia angônda vôme nyô? Teke jôm be ne bé va, e vana teke bilé bi figié, nge mindiʼi mi woon nge bilé bi grenadié, mendim mebiene ya nyu momo. 6Nde Môze ba Aron be nga kôlô e vôme bone bʼIsraél be nga too a ke anyiine *nda éndelé bendôbaʼane, a ku mesu me buti si. Ane étôtoʼo Nti é nga yené e be be, 7nde Nti a nga jô Môze na: 8Nyoñe ntume wôé a sulane bone bʼIsraél; wo ye kobô akôme di bebien be lôô, a da ye ve mendim; yaa wo ye bo na mendim me vam akôme di a ve bone bʼIsraél a mimbame miabe mendime ya nyu! 9Nde Môze a nga ke nyoñe ntume wé e *nda Nti, avale a nga nyoñ abendé.

10Nde baa Aron be nga loon ékôane bôt, be tebe ôsu ya akôme Nti a nga jô de a kate be na: Vôʼôlaʼan a mia bebene njôan! Ye bi ne nguleya kuli mia mendim me soʼo akôme di? 11Nde Môze a nga bete wo a bibi akôm biyoñ bibaé a ntume wé. Awolo te ebien nde abui mendim é nga vam akôme te, a bone bʼIsraél be nga bo nguleya vaa évé jap, nalé fe mimbame biyem. 12Ve Nti a nga jô Môze a Arone na: Mi nji ke tabe ma ndi, mi nji ke jôʼé na étyi jam é yené e mise bone bʼIsraél! Ajô te ñhe saa fe mia mia ye wulu e bôte ba a kui be e si ma ve be b 13Mfaʼa ya beta jam ate, ba kobô ajô mendime ya Mériba, e ne na, mendime ya ntañete, amu bone bʼIsraél be nga jeñe Nti mintañete, ve Nti a nga belan éyoñe te mfaʼa ya liti étyi jé.

Bone bʼIsraél ba kômbô tulan e sii bone bʼEdom

(Bm 11:16-18; Dt 2:1-8; Hé 13:1-2)

14Israél a too Kadés, nde Môze a lôme minlôman e be njôô bôte ya Edom be jô nye na: Avale di monyoñ, Israél, a jô na: Wo yem minjuʼu mise mi kuiya be bia. 15Betate be nga ke Ejipte, a bi nga tabe wé a ayap. Ve bôte yʼEjipte be nga tibili bia, biabebien a bʼésaa bangan. 16Nde bi nga yôn e be Nti, ane a nga wôʼô tyiñe jangan a lôme éngele wé a vaa bia Ejipte. Ajô te bia bi ne Kadés dene ba, tisone ya akuʼu da ya si jôé. 17Ma kômbô lôte si jôé; bia ye bo te tyii e mefube bidi été nge mefube mindiʼi mi woon, a bia ye bo te nyu mendime ya menjeñ me ne mfaʼan; bia ye tôñe nnôma *zen, teke yale mbo nnôm, nge mbo ngal, akekui bi maneya lôte si jôé. 18NdʼEdom a nga yalane nye na: Woo ye ke lôte be ma! Nge mi veʼele zu lôt, ma ye bo mia bita! 19Nde bone bʼIsraél be nga jô nye na: Bia ye tôñe ve *zen étam; nge bia nyu mendime môé, mamien a mimbame biyeme miam, ma ye yaʼan; ajô é nji ke bo valé; jôkéʼé ma me lôte vʼa mebo. 20NdʼEdom a nga yalane na: Woo ye ke lôt! NdʼEdom a nga ke tôbane nye a beta nsamba bôte mewosan. 21Ajô te Edom a nga bene na Israél a lôt e si jé, nde Israél a nga tyii zene fe.

Awu Aron

(Nlb 33:37-39: Dt 32:48-52; 34:1-8)

22Ane Ekôane bôt ése ya bone bʼIsraél be nga kôlô Kadés a kui e nkôle Hor. 23Ane Nti a nga jô Môze a Aron e nkôle Hor, e nné si Edome na: 24Aron a mbeme wu. E ne bebela na, a ye bo te nyiin e si ma ve bone bʼIsraél, amu mi nji ke bo abendé dame mewôk anjeñe ya Mériba. 25Ajô te a ntoo ve nyoñ Aron a mone wé Eléazar a bete be e nkôle Hor. 26Vaʼa Arone biôme bié a jalé bie Eléazar e mone wé. Vôm ate nye Aron a ye nyoñeban a wu. 27Ane Môze a nga bo avale Nti a nga bendé nye. Nde be nga bet e nkôle Hor ékôane bôt ése é lôô. 28Ane Môze a nga vaa Aron mengômesane mé a jalé me mone wé Eléazar. Nde Aron a nga wu vôm ate, abôbône nkôle yôp. Môze ba Eléazar be nga ke e nkôle si. 29Ekôane bôt ése é nga yene na Aron a wuya, nde *nda bôt Israél ése é nga yôn Aron tañe melu mewôm mela.

Bible en langue Bulu

© LʼAlliance Biblique du Cameroun, 2007

More Info | Version Index