Search form

NLAÑANE BÔT 21

Israél a dañe bôt ya Kanaan; benyo ba lôban abui

(Nlb 33:40; Eza 49:24-26; 2 Bb 18:4)

1Eyoñe njôô bôte ya Arad, môte ya Kanaan a mbe a too Négéb, a nga wôʼô na Israél a kuuya e zene yʼAtarin, a nga wosane nye a bi bôte bé minkôm. 2Ane Israél a nga tiñeti *atiñ e be Nti a jô na: Nge wo ve ayoñe bôte di e mo mam, bitisone biap bia ye tyamban bise. 3Nde Nti a nga wôʼô *tyiñ Israél a ve bôte ya Kanaan e mo map; be nga mane jiane be, bebien a bitisone biap: Nde be nga yôlé vôm ate jôé na Orma.

4Ane be nga kôlô e nkôle Hor, a lôte zene ya évele mañ asu ya saʼale sii Edom. Vʼézezañe *zen, minlem mi nga bili bôt atek. 5Amu ateʼe nleme te, nde bôt be nga kobô Zambe a Môze *abé a jô na: Amu jé mi nga soo bia Ejipte na bi mane zu jañ e *nkôte si va? Amu bidi momo, mendime fe momo, a bi kateya di mana bidi bi zaé nyô. 6Ane Nti a nga lôme benyo be bili nsu ô nʼényan abui, nde be nga lôbe bôt a abui e nga wu Israél été. 7Nde bôt be nga ke be Môze a jô nye na: Bi boya *abé amu bi kobôya wo a Nti *abé. Ajô te yeʼelaʼane Nti na benyo ba be ke bia ôyap. Nde Môze a nga yeʼelan asu bôt. 8Ve Nti a nga jô Môze na: Boʼok éveʼela nyo ja lôan a tyelé je ôlé; môt ase nyo é lôbeya, nge a fombô je, a ye nyiñ. 9Nde Môze a nga kôme nyo a mvot, a tyelé je ôlé; a e môt ase nyo é nga lôp a a fombô nyo mvot éte, a nga nyiñ.

Nyoñane si ya Yordane yat

(Nlb 33:41-47; Dt 8:2)

10Ane bone bʼIsraél be nga kôlô a vule minkane Obôt. 11Akôlô ya Obôt, nde be nga vule minkan e lyé-Abarim, *nkôte si ô ne bebé a sii Môab, mfaʼa jôp da tôô. 12Akôlô ya valé, be nga vule minkan e mbiʼili Zéréd. 13Akôlô ya valé be nga vule minkan ôsôé Arnone yat, wo lôt e *nkôte si, a kui e si Beamorééñ. 14Avale da jôban e kalate bita bi Nti été na: Vahéb e mfaʼa ya Sufa, a mimbale mié, Arnon 15a mimbale mié, nsaʼa wé ô ne e mfaʼa ya Ar a ñwô ô ne nné si Môab.

16Akôlô ya valé be nga kui e Bir. Vôm ate Nti a nga jô Môze na: Sulaʼane bôte na me ve be mendim.

17Eyoñe te bone bʼIsraél be nga yia e jia jina na:

Mendim me vame ñhe menjeñ, a nkutane mefas!

18Bivet bi nga faʼa me a minkukume mi nga vundi me.

A mintume miabe ya éjôé a mintume bejô bôte miap.

19Akôlô ya *nkôte si nde be nga ke Matana; akôlô ya Matana be nga kui Nahaliél; akôlô ya Nahaliél be nga kui Bamôt. 20Akôlô ya Bamôt be nga kui mbiʼili ô ne afane ya Môab abôbône nkôle Pisga; mbiʼili te wo lumbu mfaʼa ya *nkôte si.

Israél a tabe e sii Beamorééñ

(Dt 2:24-37; 3:1-20; Yas 24:8)

21Ane Israél a nga lôme minlôman e be Sihoñ, njô bôte Beamorééñ a jô nye na: 22Ma kômbô lôte si jôé; bia ye bo te tulane mefube bidi, nge mefube mindiʼi mi woon, a bia ye bo te nyu mendime ya menjeñ, ve bia ye tôñe tetela *zen akekui bi lôteya si jôé. 23Ve Sihoñ a nji kañese na Israél a lôte si jé; ane Sihoñ a nga sulan e bôte bé bese a ke tôbane Israél e nkôte si; a nga kui e Yahat a wosane Israél. 24Nde Israél a nga bôé nye a meyo me nkpwaté mekôn a nyoñe si jé ataté ôsôé Arnon a kui ôsôé Yabôk, a kui nnéa bone bʼAmmon, amu nnéa bone bʼAmon a mbe ngu. 25Israél a nga nyoñe bitisone bite bise. Israél a nga tabe e bitison Beamoréén bise, e Hesboñ a bitisone bise bia wôʼô a Hesboñ. 26Amu Hesboñ a mbe tisone Sihoñ, njô bʼAmorééñ; a nga bo bita a njô bôte ya Môab a nga too te na mfefé njô bôt ô nyoñ éto, nde a nga wôlé nye si jé ése a kui ôsôé Arnon. 27Ajô te betili bevok ba jô na:

Zaʼan e Hesboñ a beta lôñeban!

A beta kômban, tisone Sihoñ!

28Amu nduane ya Hesboñ é kuiya;

Nkabaʼa nduane tisone Sihoñ

ô maneya mine Ar-Môab,

a bivete bikôndôʼô bi Arnon.

29Ngoʼo wo, a Môab!

Mi jañeya a bôte ya Kemôs!

A boya bone bé na be tup,

a kuaneya bobebinga bé minkôm e be Sihoñ!

Njôô bôte Beamorééñ.

30Bi maneya lume be bibaé minfane biañgan.

Ataté Hesboñ a kui Divôn biôme bise bi maneya wu.

Bi maneya sa biôm a kui Nôfa.

E biôm bise bi né a kui Madaba.

31Ane Israél a nga tabe e si Beamorééñ. 32Môze a nga lôme bôt be ke looé Yaézer, be nga nyoñe fe bitison bi mbe éjôé jé si a titane Beamorééñ be nga to été.

33Nde be nga tyendé *zen a ke mfaʼa zene ya Basañ. Ane Og, njô bôte ya Basañ ba be bôte bé bese be nga ke tôbane be na be wosane be Edré. 34Ane Nti a nga jô Môze na: Te ko nye woñ; amu me veya nye e mo môé, émien, bôte bé bese a e si jé, wo ye bo nye aval ô nga bo fe Sihoñ, njô bôte Beamorééñ a nga too Hesboñ. 35Ane Môze a nga bôé nye, émien, bone bé a bôte bé bese, teke liʼi ve môte wua, nde be nga nyoñe si jé.

Bible en langue Bulu

© LʼAlliance Biblique du Cameroun, 2007

More Info | Version Index