Search form

NLAÑANE BÔT 22

Balam

(Dt 23:3-5; Yas 24:9-10)

1Bone bʼIsraél be nga kôlô a vule minkane minjeʼese mi Môab, e yordane yat, zôsôôô a Yérikô. 2Balak e mone Tipor, a nga yene mam mese Israél a nga bo Beamorééñ. 3A Môab a nga dañe ko woñ amu ézuʼu bôte yʼIsraél; nde Môab a nga dañe nyeñeban asu bone bʼIsraél. 4Nde Môab a nga jô bemvendé ya Madiane na: Ézuʼu bôte ji ja ye mane nyoñe jôm ése ja bômane bia, avalʼane benyak ba di biloʼo ya afôla éziñ. Balak e mone Tipor a mbe njô bôte ya Môab melu mete. 5Ndʼa nga lôme minlôman e be Balam, e mone Béor, a too e si jé Pétor, bebé a Yordan be loone nye a jô nye na: Ô lôô bôte be nga so Ejipte ba, be yianeya si ése. Be zuya tabe bebé vôme wom. 6Ajô te zaʼa volô ma, ma yeʼelane wo, ô yoʼé ma be, amu be ne ngu a dañe bia, ndôʼôtô ma ye bo nguleya bôé be a titane be si jam, amu ma yeme na môt ase wo botane nye, a bili foʼo ébotan, a na, môt ase wo yoʼé, a ye foʼo yoʼéban.

7Nde bemvendé ya Môab a bemvendé ya Madian be nga ke be bili mimvean asu Balam. Eyoñe be kuiya e be Balam, be nga kate nye mejô me Balak. 8Nde Balam a nga yalane be na: Bômbaʼane va a kui tyé, éyoñe te ma ye yalane mia avalʼése Nti a ye jô ma. Nde bivete ya Môab bi nga tabe e be Balam.

9Nde Zambe a nga zu e be Balam a jô nye na: Beza be ne e be wo ba? 10Balam a nga yalane Zambe na: Balak, e mone Tipor, njôô bôte ya Môab a lômeya be be jô ma na: 11tame yene bôt ba so Ejipte ba a mbe be yianeya si: zaʼa yoʼé me be: ma buni na éyoñe te ma ye bôé be a titane be. 12Nde Zambe a nga jô Balame na: Woo ye ke ke e nsamba wop; nalé fe woo ye ke yoʼé bôte bete, amu be ne njalan a ébotan. 13Mametyé Balam a nga kôlô si a jô bivete bi Balaʼa na: Kelan ôsu amu Nti a nji kañese na bia be mia bi ke nsamba. 14Ane bivete ya Môab bi nga kôlô a bulan e be Balak a jô nye na: Balam a bene zu e nsamba wongan.

15Ane Balak a nga beta lôme bivet bi too abui, a beta minkôñ a lôte bi ya ôsu. 16Nde bi nga kui e be Balam a jô nye na: Avale di Balak e mone Tipor a jô na: Môt a boʼo te beta kamane wo na ô zu be ma; 17amu ma ye ve wo duma ese da yian, ma ye fe bo e jam ése wo ye jô ma: zaʼak, ma yeʼelane wo, a yoʼé ma e bôte ba. 18Nde Balam a nga yalan a jô bebo bisaé be Balaʼa na: Toʼo na Balak a ve ma *nda jé é too njalan a argent a or, me se nguleya bo mone jam nge beta jam e too di da wosane Nti e Zambe wom. 19Eyoñe ji, ma yeʼelane mia na, mi tabe fe vana alu di, éyoñe te ma ye yem e jame Nti a ye beta jô ma. 20Ane Zambe a nga zu e be Balam a alu a jô nye na: Amu bôte ba ba te zu loone wo, kôlôʼô si mia be be mi ke; ve wo ye bo e jam ma ye jô wo; 21mametyé, Balam a nga kôlô si, a dañ éjakas a ke e nsamba bivete ya Môab. 22Ane Zambe a nga yaa amu a nga ke, nde éngele Nti a nga tebe nye ôsu zene yôp. Balam a nga too éjakase jé yôp a bebo bisaé bé bebaé. 23Eyoñ éjakas é nga yen éngele Nti a tele zene yôp a bili nsoé nkpwaté mekôn e wo, nde éjakas é nga kôlô zene yôp, a yale mefube bidi. Ane Balam a nga bibi éjakase na é suane *zen. 24Engele Nti a nga tebe ôsu *zen, e zañe mefube mindiʼi mi woon: nkaʼalé ô too li a li; 25Eyoñ éjakas é nga yen éngele Nti, ndʼé nga vutane mfin a tibi abo Balam e mfin, nde Balam a nga beta bibi je. 26Engele Nti a nga ke ôbe ôyap a tebe vôm a mbe ôfanefan teke afôla ya beta kôñelan e mbo nnôm nge e mbo ngal. 27Eyoñ éjakas é nga yen éngele Nti é nga ku Balame yôp. Eyoñe te Balam a nga dañe yaa, ndʼa nga bôm éjakas a e ntume wé. 28Ane Nti a nga kui éjakas anyu, ndʼé nga jô Balame na: Ma te bo wo jé ane wo bôme ma ndiñga éla? 29Balam a nga yalan éjakase na: Amu wo kolé ma ôbak; nge ma bili nkpwaté mekôn ve me wôéya wo éyoñ ébiene ji. 30Ndʼéjakas é nga jô Balame na: Ye me nji bo éjakase jôé, ô dañeya yôp biyoñ bise azukui môse wu? Ye me wôʼô tame bo wo nalé? Balame na: Momo!

31Ane Nti a nga kui Balame mis: ndʼa nga yen éngele Nti a tele zene yôp, nsoé nkpwaté mekôn ô too nye wo; ane Balam a nga vitibi, a kumbu asu e butu si. 32Nde éngele Nti a nga jô nye na: Amu je ô bômeya éjakase jôé biyoñe bilaa? O lôô me ne nsoone ya tebe wo e ngame yat, amu e *zen é ne wo ôsu ja kee wo e njañ. 33Ejakas ja te yene ma a saʼale ma biyoñe bilaa. Nge é nji ke ye saʼale ma, ve me wôéya wo a jôʼé je vevee. 34Ane Balam a nga jô éngele Nti na: Me boya *abé, amu me nji ke yeme na ô tele ma ôsu; éyoñe ji nge ma bo *abé e mise môé, ma ye bulane mvus. a 35Nde éngele Nti a nga jô Balame na: Mia be bôte bete kelan; ve da na, wo ye bo ve baʼalane mejô ma ye jô wo. Ane Balam ba be bivete bi Balak be nga ke.

Balam baa Balak ba tôban

(Nlb 24:10-13)

36Eyoñe Balak a wôʼôya na Balam a soya, ane a nga ke tôbane nye, a kui tisone Môab é ne akuʼu nné ôsôé Arnon. 37Nde Balak a nga jô Balame na: Ye me nji lôme bôte be wo na be loone wo? Amu jé ô nji zu be ma? Ye me nji bo nguleya belane wo a abui duma? 38Balam a nga yalane Balaʼa na: Éyoñe ji me ne be wo, za jam afe me beta jô? Ma ye kobô mejô Zambe a ye futi anyu dam. 39Nde Balam ba Balak be nga ke, ane be nga kui Kiryat-Ukôt. 40Ane Balak a nga tyiʼi beta biyem, a bone biyem nde fe a nga lôme Balam a bivete ba be be be nga too ngap. 41Mametyé, Balak a nga nyoñe Balam a bete nye e Bamôt-Bal, vôm a mbe nguleya yen éfase bôte yʼIsraél.

Bible en langue Bulu

© LʼAlliance Biblique du Cameroun, 2007

More Info | Version Index