Search form

NLAÑANE BÔT 3

Elañe bôt a bisaé bone be Lévi

1 Minkte 24:1-19; Hé 5:4

1Mvoñe bôt Aron a Môze, melu Nti a nga kobô Môze e nkôle Sinayi yôp nje nyô.

2Biyôlé bi bone bʼAron: Nadab, ntô, Abiyu, Eléazar a Itamar. 3Be nga teléban étyi ane betuni, be taté fe mboon ésaé. 4Ve Nadab a Abiyu be nga wu e mise me Nti, e *nkôte si ya Sinayi; be nji ke biaé. Eléazar ba Itamar be nga bo ésaé yʼétyi, Aror ésaa wop a too be évet. a

5Ane Nti a nga kobô Môze na: 6Loʼone bone be Lévi, a futi be éjôé Arone si be bo ma ésaé. 7Ba ye bo ésaé jap ôsu ya *nda éndelé bendôbaʼan, be volôʼô Aron a ngume nsamba bôt ôse yʼIsraél, ba ye bo bisaé bia fombô vôm a nʼétyi. 8Ba ye baʼale biôm mebelan bise ya *nda éndelé bendôbaʼan a biôme bone bʼIsraél ba yiane baʼale. 9Wo ye ve bone bʼIsraél e bʼAron a bone bé; ba ye veban e be be señe ya bone bʼIsraél bese. 10Wo ye bendé Aron ba be bone bé na, be baʼale bisaé biabe yʼétyi; môt ase a ne nneñ a ye subu bebé vôm a nʼétyi, a ye wôéban. b

11Ane Nti a nga kobô Môze na: 12Me nyoñeya bone be Lévi Israél été, e señe ya mintôle ya bone bʼIsraél, ajô te bone bʼIsraél ba ye bo émbam.

13Amu ntôl ôse wo taté bialé ô ne éñwom; e môse me nga wôé mintôle mise yʼEjipte, ñwô me nga telé mintôle mise yʼIsraél étyi e mfaʼa wom: ataté mi ya bôt a kui mi ya betit, mia ye bo émiam, ma me ne Nti.

Elañe bôt ôsu ya bone be Lévi

(1 Minkte 6:1-33; Nlb 4; Ef 4:11-16)

14Nti a nga kobô Môze e *nkôte si ya Sinayi a jô na: 15Lañe bone be Lévi avale menda me bôt a mebume map me né; wo ye lañe befam bese, ataté ngone jia a ke ôsu. 16Nde Môze a nga lañe be avale Nti a nga bendé, avale Môze a nga nyoñ abendé. 17Biyôlé bi bone be Lévi bi: Gerson, Kehat a Merari. 18Bone be Gerson ane mebume map me né: 19Amram, Yisehar, Ebroñ a Uziél; 20bone be mérari ane mebume map me né: Mali a Musi. Mebum me Lévi mme le, ane menda me bôte map me né. 21Mebume Libni a Simeyi ma téé e be Gerson: ajô te be ne mebume ya be Gerson. 22Ba be nga lañeban, befam bese ataté ngone jia a ke ôsu, be mbe toyini zamgbwa a mintete mitan. 23Mebume me Gerson me nga vule minkan e mvuse *tabernakel e mfaʼa jôp da dim. 24Evete jap é mbe Eliasaf e mone Laél. 25E *nda éndelé bendôbaʼane, be nga ve bone be Gerson be baʼale biôm avale di: *nda été a atan, ébutaʼa ja buti *nda ése, éndelé ja tyebe anyiine *nda, 26biyé asu mimfine ya nseñ; éndelé anyiine ya nseñ; mbômaʼane *tabernakel a nyô ya ataʼa metunaʼa a minkole mise ya *nda éndelé: mbe be nga yiane baʼale biôm bite bise. 27Bone be Amram: Yisehari, Ebroñ a Uziél ba so e be Kehat. 28Befam bese ataté ngone jia a ke ôsu, be mbe toyini muam a mintete misaman. Be nga bo ésaé ya baʼale biôm bi nʼétyi. 29Mebume me bone be Kéhat me nga vule minkan e *tabernakel e mfaʼa ya nké. 30Evete jap é mbe Elisafam e mone Uziél. 31Be nga baʼale éwolo élat, e tawôlô ba beté belet é nʼétyi, ébi bifufup, metaʼa metunaʼa, biôm ba boo bie ésaé e vôm a nʼétyi, éyé ya e zañe *tabernakel a biôme bise yʼété. 32Evete bivet e bone be Lévi été é mbe Eléazar e mone Aron Ntuni; a nga bo ésaé ya fombô e ba be mbe be baʼaleʼe vôme yʼétyi.

33Mebume Mali a Musi ma so e bone be Merari. 34Befam bese be nga lañeban ataté ngone jia a ke ôsu be mbe toyini ésaman a mintete mibaé. 35Evete jap é mbe Turiél e mone Abihayil. Be nga vule minkan e *tabernakel akôé. 36Bone be Merari be nga baʼale mebame ya *tabernakel, mimbôñe mié, mekône mé a metine mé, biôme mebelane bié a biôm bife bise bi tii a *tabernakel. 37Be nga baʼale fe mekône ya nseñ mbômaʼane tine jap, mefanaʼa map a minkole miap.

38Môze, Aron a bone bé be nga vule minkan ôsu *tabernakel mfaʼa jôp da tôô; be nga baʼale vôme yʼétyi e señe bone bʼIsraél, môt ase a ye veʼele subu bebé vôm yʼétyi te na a ne môte ya *nda bôte betuni a nga ye foʼo wôéban.

39E bone be Lévi bese Môze a Aron be nga lañ, avale Nti a nga bendé, ane mebume map me né, befam bese ataté ngone jia a ke ôsu, be mbe toyini mewôm mebaé a ébaé.

Nkôtane mintôle mise

(Nlb 8:5-22)

40Ane Nti a nga jô Môze na: Lañe mintôle mi ne befam e bone bʼIsraél été, ataté ngone jia a ke ôsu; éyoñe te wo tili mie e ngume vôm avale biyôlé biap bi né. 41Bone be Lévi ba ye bo e mfaʼa wome mamien, e señe mintôle mise ya bone bʼisraél, avale te fe mimbame biyeme miap éjiane mintôle biyem mise mi bone bʼIsraél. 42Nde Môze a nga lañe mintôle mise ya bone bʼIsraél avale Nti a nga bendé nye. 43Mintôle befam be nga lañ, ane môé map me né, ataté ngone jia a ke ôsu, mise mi mbe toyini mewôm mebaé a ébaé, mintete mibaé, mewôme zamgbwa a mila.

44Nde Nti a nga kobô Môze na: 45Nyoñe bone be Lévi éjiane mintôle mise ya bone bʼIsraél, nalé fe mimbame biyem mi bone be Lévi éjiane ya mimbame miap; bone be Lévi be nʼémbam: ma me ne Nti. 46Asu ya kôté mintôle mi bone mintete mibaé, mewôme zamgbwa a mila ya bone bʼIsraél ba dañe bone be Lévi, 47Wo ye nyoñe bifase bi sikel bitan e nlô ya môt ase. Wo ye nyoñe bie ane sikel ya vôme yʼétyi a né, nye a ne begram awôm. 48Eyoñe te wo ye kalan Aron a bone bé moné ate asu ya kôté e tañe bôt bone bʼIsraél ba dañe bone be Lévi. 49Ane Môze a nga nyoñe moné asu ya kôté e bôte bone be Lévi be nji bo nguleya tyendé. 50A nga nyoñe moné asu mintôle mi bone yʼIsraél mite, tañe besikel toyini jia, mintete mila, mewôm mesaman a betan, avale sikel ya vôm yʼétyi a né. 51Eyoñe te a nga kalane nye e mo mʼAron a bone bé avale Nti a nga bendé nye.

Bible en langue Bulu

© LʼAlliance Biblique du Cameroun, 2007

More Info | Version Index