Search form

NLAÑANE BÔT 4

Bisaé bone be Lévi

(Nlb 3:27-32)

1Nti a nga kobô Môze a Aron a jô na: 2Lañe bone be Kehat tañ ézezañe ya bone be Lévi avale mebum a menda me bôte map me né, 3ataté mimbu mewôm mela a ke ôsu a kui mimbu mewôm metan, ba bese ba yiane bo ésaé éziñ e *nda éndelé bendôbaʼane.

4Esaé bone be Kehat be nga yiane bo e *nda éndelé bendôbaʼane nje ji, ésaé ja fombô jôm ése ja dañ étyi. 5Eyoñe bone bʼIsraél ba ye taté dulu, Aron a bone bé ba ye taté vaa éyé é tyele e zañe *tabernakel a buti je éwolo élate yôp; 6ba ye buti ékôb abañ éyé te yôp, a yalé éndelé éfe yôp é too nyôle blum e vôm ase; ba ye suʼulane some mimbôñe mi éwolo élat. 7Ba ye beté éndelé é ne nyôle blum e tawôlô belet yʼétyi ja bebe, a telé bone bisua bilaé, bidoʼo bisua a bone mekob asu mmiamane beôlobinda été yôp; 8Ba ye yalé évele éndelé e biôm bite yôp a suʼulane buti mfinga bikôb bi abañ été yôp; ba ye suʼulane some mimbôñe ya tawôlô. 9Ba ye nyoñ éndelé é ne blum a buti je ébi bifufub asu éfufup, belambe bé, mebase mé ya dim éfufup, bikutan asube bié a mevieʼe me mbon me ne asu ésaé jé; 10Ba ye vuluku ébi bifufube te a biôme mebelane bié bise e mfinga bikôb biʼabañ été a beté je ôlañe yôp. 11Ba ye buti éndelé é ne blum ataʼa metunaʼa e ne mboon a or yôp a vuluku de ékôb abañ été; éyoñe te ba suʼulane futi mimbôñe mié. 12Ba ye nyoñe biôme mebelane bise ya *nda yʼétyi, a futi bie éndelé é ne nyôle blum été, éyoñe te ba suʼulane futi bie ôlañ été. 13Ba ye vaa asube ya ataʼa metunaʼa a beté éndelé é ne nyôle mfô été yôp; 14Ba ye beté biôm mebelan bise yʼété yôp; metyeʼe me nduan, bilum, bisobelé a bilaé, biôm mebelan bise yʼataʼa metunaʼa, ba ye buti ékôb abañ été yôp, mvus éte, ba ye suʼulane futi mimbôñe yʼataʼa metunaʼa. 15Eyoñ Aron a bone bé be maneya buti jôm ése é nʼétyi, a biôm mebelan bise ya vôm a nʼétyi, bone be Kehat ba ye beʼe bie éyoñ awolo ya kôlô e kpwaneya. Ve ba ye bo te nnambe jôm é nʼétyi, be za viane wu. Esaé bone be Kehat, e *nda éndelé bendôbaʼane, nje le. 16Eléazar e mone Aron *ntuni, nye a ye baʼale mbon ba futi e belambe yʼébi bifufup, ôlobinda a nyume mvaé, mveane ya mefup bôt ba ve éyoñ ése a mbon ba woʼo bôt éyoñ ba telébane bito; a ye baʼale *tabernakel ase a jôm ése é nʼété, vôm yʼété a biôme mebelane bié bise.

17Ane Nti a nga kobô Môze a Aron na: 18Wo ye baʼale e jame di na, mebum me bôt me bone be Kehat me tabe kom ése ézezañe bone be Lévi bevoʼo été, 19nde ba ye bo te wu, nge ba nnambe biôm bi nʼétyi. Ajô te mia ye bo avale di: Wo Aron a bone bôé, mia ye kee môt ase ya be be e vôme wé a liti nye e jam a yiane bo nge jôm a yiane beʼe. 20Ajô te ba ye bo te fombô toʼo ve monʼétun éyoñ, biôm bi ne ntelan étyi, nalé a za dutu be awu.

Bone be Gerson

(Nlb 3:21-26; 1Ko 12:4-1,28-30)

21Nti a nga kobô Môze na: 22Lañe fe tañe bone be Gerson avale mebum a menda me bôte map me né; 23wo ye lañe be ataté mimbu mewôm mela a ke ôsu a kui mimbu mewôm metan, e *nda bendôbaʼane. 24Esaé bone be Gerson, ésaé jap a mbeʼe wop mbie bi: 25ba ye beʼe bindelé ya *tabernakel a *nda éndelé bendôbaʼane, ébutaʼa bikôbe beyôm mintômba jé a ji ékôp ja yalé ngume *tabernakel ôse, éndelé ja tyebe anyiine *nda éndelé, 26a bindelé bi tyele mfaʼa ya nseñ a éndelé ya anyiine mimbé ya nseñ mbômaʼan a *tabernakel a ataʼa metunaʼa, minkole miap a biôme mebelane biap bise. Ba ye fe bo bisaé bise yʼété. 27Aron a bone be Gerson: mbeʼane biôm a bisaé bivoʼo bise ba yiane bo. Aron a bone bé mbe ba ye kate be jam ba yiane bo a jôm ba yiane beʼe. 28Esaé menda me bôte ya bone be Gerson ba yiane bo e *nda éndelé bendôbaʼane nje le, nalé fe biôm ba yiane baʼale. Itamar e mone Aron *ntuni nye a ye bo évete jap.

29Wo ye lañe bone be Merari ane mebume map me né a ane menda me bôte map me né; 30wo ye lañ ataté bôt be ne mimbu mewôm mela akui mewôm metan, ba bese be ntoo nguleya saé e *nda éndelé bendôbaʼane.

31Biôm ba yiane baʼale mfaʼa ésaé ya *nda éndelé bendôbaʼane mbie bi: bityimbi ya *tabernakel, mimbôñ, mekôn a metine ya été; 32mekôn ma bômane nseñ, metine map a mefanaʼa map, minkole miap, biôm mebelan bise yʼété a jôm ése é ne ntelan mfaʼa ya ésaé jap. Mia ye ve môt ase biôm a yiane baʼale. 33Esaé mvôʼô Merari nje le: ésaé jap ése ya *nda éndelé bendôbaʼane, Itamar e mon Aron *ntuni a too ntebʼôsu wop.

34Môze, Aron a bivete bi bôt be nga lañe bone be Kehat, ane mebum a menda me bôte map me né. 35Ba bese be mbe nguleya saé e *nda éndelé bendôbaʼane be too mimbu mewôm mela a lôte valé, a kui mimbu mewôm metan. 36Ba be nga lañeban avale mebume map me né be mbe toyini ébaé, mintete zamgbwa a mewôm metan. 37Bôte bese be nga lañeban e mvôʼô Kehat mbe le, bese be nga saé e *nda éndelé bendôbaʼan. Môze a Aron be nga lañe be avale Nti a nga bendé Môze.

38Bone be Gerson be nga lañeban avale mebume map a menda me bôte map me né, 39ataté mimbu mewôm mela alôte valé, a kui mimbu mewôm metan, ba bese be mbe nguleya saé e *nda éndelé bendôbaʼane. 40Ba be nga lañeban avale mebume map a menda me bôte map me né, be mbe toyini ébaé, mintete misaman a mewôm mela. 41Bôte ya mvôʼô Gerson be nga lañeban mbe le. Bese be nga saé *nda éndelé bendôbaʼane. Môze baʼAron be nga lañe be avale Nti a nga bendé Môze.

42Bôte ya mebum me bone be Merari be nga lañeban, avale mebum a menda me bôte map me né, 43ataté mimbu mewôm mela alôte valé, a kui mimbu mewôm metan, ba bese be mbe nguleya saé e *nda éndelé bendôbaʼane, 44ba be nga lañeban avale mebume map me né be mbe toyini éla a mintete mibaé. 45Bôte be nga lañeban e mvôʼô Merari mbe le. Môze a Aron be nga lañe be avale Nti a nga bendé Môze.

46E bôte bese ya mvôʼô Lévi mbe Môze, Aron a bivete yʼIsraél be nga lañ, avale mebum a menda me bôte map me né, 47ataté mimbu mewôm mela a lôte valé, a kui mimbu mewôm metan, be too nguleya bo ésaé bevolô a bebeʼe biôme ya *nda éndelé bendôbaʼane, 48be mbe toyini muam, mintete mitan a mewôme muam. 49Be nga lañe be avale Nti a nga bendé Môze, môt ase a bili ésaé jé a mbeʼe wé.

Bible en langue Bulu

© LʼAlliance Biblique du Cameroun, 2007

More Info | Version Index