Search form

NLAÑANE BÔT 5

Ntitane bôt be ne mvin

(Nlb 12:10-25; Nli 21:27; Lv 5:20-26; Nlb 18:8-20; Lk 19:8)

1Nti a nga kobô Môze na: 2Bendéʼé bone bʼIsraél na, be titane nzezam ôse ô kôlô minkan, nalé fe nyô ase a kon ôkon éziñ e biôm bi fam nge minga, nge na a ntoo mvin amu nnambane mbim. 3Toʼo fam nge minga mia ye titane be minkan, amu be za ve minkan mi bo mvin. 4Nde bone bʼIsraél be nga bo nalé. Be nga titane mevale me bôte mete minkan: be nga bo avale Nti a nga jô môze.

5Nti a nga beta kobô Môze na: 6Kobôʼô bone bʼIsraél na: Nge fam nge minga a bo e môte mboʼo *abé da ya mebé môt a ne bo émien, a a nji fe bo zôsôôô e mise me Zambe, a a ve fe émiene mekua, 7môt ate a ye mem *abé a te bo, a bulane fe jôm a te nyoñ e be môt émien a nee je a abet e too e ngabe tañe ya tañe jôme te ja kui. 8Nge môt a ne jôme te a wuya te liʼi môt éziñ e *nda bôte jé a too nyô a yiane nyoñe ntañe te, jôme te ja ye veban e be Nti, nalé a ne na e be *ntuni. E môt a nga sebʼétom a ye fe ve nnôme ntômba asu metunaʼa ya *njaman ya *abé dé: éyoñe te *ntuni a ye bo bisaé ya *njaman abé mfaʼa wé. 9E ngabʼése ba vaa e mvean ô nʼétyi ñwô bone bʼIsraél ba ve, ngab éte é ne asu *ntuni. 10Jôm ése môt a telé étyi, ba kalane je *ntuni a jôm ése môt a ve *ntuni, *ntuni a ne nyoñe je é bo énjé.

Atiñ da fombô minga ba nyiñe ajô mejian

(Ml 3:5; Hé 13:4; Sam 26:2)

11Nti a nga kobô Môze na: 12Kobôʼô bone bʼIsraél a jô be na: Nge fam é bili minga, a minga ate a bo nnôm bijabô, 13vôme fame fe ja jôʼôbô nye asoé, nnôm te yem, nnôm a nji bi ndem amu ngaa éziñ a nji bo, a môt éziñ a nji dilane nye, 14ve nnôm a soʼosane nye mfaʼa ya ntabane wé. E ne fe kui na fam ja simesane na ngal a boya *mejian, ve nalé a too momo. 15Fam éte ja ye zuu ngal e be *ntuni a bili mvean asu ngal ate: kili avute fôn éla. A ye bo te sôé mbon avute te yôp nge sôé menyum, amu mvean ôte ô ne asu minsoʼosan ya *abé éziñ da yiane kuliban atan. 16Ntuni a ye bo na a subu bebé a tebe tetele e mise me Nti. 17Ntuni a ye nyoñe mendim me nʼétyi e vieʼe tyia été, a ye nyoñe mbuluk e si ya *tabernakel a futi wô e mendim été. 18Ntuni a ye bo na minga ate a tebe tetele e mise me Nti, a ye vaa jôm é butu nye nlô, éyoñe te a kee nye mveane ya ésoman, nalé a ne na, mvean ya zes ñwô ô nga veban amu minsoʼosan mi nnôm. Ntuni émien a ye bi mendim me nʼayô ma soo biyoʼé. 19A ye yemete minga ate na ba nye be tote bifia bina na: Nge e nji ke bo bebela na mia fam mia te jôʼôbô, a na ô maneya samele womien amu meduʼan wo te duʼu nyo nnôm, biyoʼé mendim me nʼayôle ma soo me me boʼo te nnambe wo. a 20Ve nge ô maneya samele womien a duʼu nyo nnôm, nge fame fe é maneya jôʼôbô wo, 21Nti a vaʼa wo *melep: a boʼo wo nkôkôm, a bo na abume dôé e vus, nalé bôte ya si jôé ba ye nyoñe wo anʼéveʼelaʼa éyoñ ba tot ajô biyoʼé; 22Mendim ma soo biyoʼé ma me nyiʼine wo e *miñya a vuse wo abum a bo wo nkôkôm. Wôna minga ate a ye yalane na Amen! Ya, é boʼo nalé! 23Ntuni a ye baʼale bifia ya biyoʼé bite ntilan, a ye dube jôm é ntoo ntilane te mendim me nʼayôle mete asu ya tyame bifia bite. 24Eyoñ a ngenan te kalane minga mendim mete na me nyiʼine nye e *miñya, 25*ntuni a ye taté beta nyoñe mveane ya ésoman e mo mé a liti wô Nti a mboone jame ya nlitan, éyoñe te a zuu wô ataʼa metunaʼa. 26A ye kandé mveane te tañe ngum akule wo ane jam ya simesan, a diʼi wô ataʼa metunaʼa yôp. Mvus éte, a ye bendé minga na a nyu mendim. b 27Eyoñ a ye nyu me, avale di nde da ye boban: nge minga a nga samele foʼo émien a bo nnôm bijabô, mendim me nʼayô ma soo biyoʼé ma ye nyiine nye e *miñya a vusu nye abum, a bo nye nkôkôm. Ataté éyoñe te bôte ya si jé ba ye tote nye ane éfunan éyoñe ba tote bifia biyoʼé. 28Ve nge minga a nji ke samele émien, nge a nji bo mekua, biyoʼé bia ye bo te kui be nye a a ne nguleya biaé *bon. 29Atiñ da fombô bisoman nde le. Atiñe te e ne asu minga a wulu *abé, nyô a samele émien éyoñ a bo nnôm bijabô, 30nge na nyô nnôm a soʼosane mbia dulu, nnôm a telé ngal e mbôñ ajô e mise me Nti, a *ntuni nye a bo mam mese yʼété. 31Nnôm a *abé dé nge a bili foʼo mekua.

Bible en langue Bulu

© LʼAlliance Biblique du Cameroun, 2007

More Info | Version Index