Search form

NLAÑANE BÔT 9

Abôʼô Pak e *nkôte si ya Sinayi

(Yas 5:10-11; 2 Minkte 30; 35:1-19)

1Ane Nti a nga kobô môze e *nkôte si ya Sinayi a jô na: 2Bone bʼIsraél ba yiane jem abôʼô Pak éyoñ é ne ntelan. 3Mia ye jeme de éyoñ é ne ntelan, nalé a ne na e *môs awôm a nyini ya ngone nyô, e zañe ngôʼé ébaé; mia ye jeme de aval ane memvinda a minjôan yʼété bi né. 4Nde Môze a nga kobô bone bʼIsraél na be jem abôʼô Pak. 5Ane be nga jeme de e ngon ôsu é too melu awôm a menyin, e zañe ngôʼé ébaé, e *nkôte si ya Sinayi. Bone bʼIsraél be nga bo avale Nti a nga bendé Môze. 6Ve bôt be nga nnambe mbim be nji bo *mfuban môs ôte. A amu nalé, be nji bi nkañesane ya jeme Pak. Be nga ke yene Môze a Aron; 7be nga jô Môze na: Bi nji bo *mfuban amu nnambane mbim, ye bia yiane zuu mveane wongan e be Nti avalʼane bone bʼIsraél bevoʼo bese, amu ngum éyoñ ô ne ntelan mfaʼa jame te? 8Môze a nga yalane be na: Yañgaʼan me taté yem e jame Nti a jô ajô denan. 9Nde Nti a nga kobô Môze na: 10Kobôʼô bone bʼIsraél na: Nge môt éziñ ya be mia, nge miaé mienan mia zu a nji bo *mfuban amu nnambane mbim, nge na a ne e dulu ôyap, a ye jem abôʼô Pak amu duma Nti. 11Jame te da ye boban e ngone baa é too melu awôm a menyin, e zañe ngôʼé ébaé; Pak éte ja ye diban a belet é ne te mvusan a biloʼo bi nʼayô. 12Ba ye bo te naane bikaʼé a kui mametyé a ba ye bo te buʼu éves éziñ. Ba ye jeme Pak avalʼése é ne nkôman. 13Nge môt a ne *mfuban a a nji bo dulu, ve a vañe bene jeme Pak ba ye vaa nye e bôte bé été, amu a nji liti Nti mvean éyoñ ja yian: môt ate a ye beʼe mekua ya *abé dé. 14Nge *ntabe a too e be mia a jeme Paʼa Nti, a ye wulu avalʼe ne njôan a mbendan ajô Pak. Njôan wo ye bo wua e be mia asu *ntabe a bialébialé.

Nsume nkut

(Nlb 10:11-36; Yo 10:4-27; Mt 6:10)

15E *môs be nga telé *tabernakel, nsume *nkut ô nga yametane *nda éndelé é nga bili biôme yʼélat. Ataté mamengôʼé a kui mametyé, nsume nkute te ô nga faé. 16Nalé a nga boban éyoñ ése: nsume *nkut ô nga solé *nda a faé a alu. 17Eyoñ ése nsume *nkut ô nga kôlô e vôme *nda éndelé é né, bone bʼIsraél be nga bôlé vôm ate a ke tabe e vôme be nga yene nsume *nkut ô maneya beta yametan. 18Ajô te bone bʼIsraél be nga bôlé éyoñe Nti a jôya, a vule fe minkan éyoñe Nti a jôya. Be nga tabe vôm éziñ nté ôse nsume *nkut ô mbe e *tabernakel yôp. 19Nge nsume *nkut ô nga tabe a ayap e *tabernakel yôp, bone bʼIsraél be nga bo Nti mewôk, teke kôlô vôm ate. 20Ve nge ô nga tabe abe melu, éto a nkôlan bi nga boban avale Nti a nga bendé. 21Nsume *nkut ô nga tabe vôm éziñ vʼataté mamengôʼé a kui mametyé, nge na ve môse wua a alu da: ve nné ane wo kôlô, bone bʼisraél fe be kôlô. 22Nge wo tabe e *nda éndelé yôp mimôs mibaé, ngume ngon, nge lôte valé, bone bʼisraél teke kôlô te na nsume *nkut ô kôlôya. 23Ntaban a nkôlane bone bʼIsraél bi nga boban vʼa abendé Nti. Be nga bo bisaé biap mfaʼa Nti avale Emien a nga bendé Môze.

Bible en langue Bulu

© LʼAlliance Biblique du Cameroun, 2007

More Info | Version Index