Search form

Ebavevuvu 13

Ebelamo ke Lota ivetutudaka.

1E ada Ebelamo Itipita-deya gitauya gilaka Negevi, vavinena ke yana gibamomo matatabuna ada kaduwe Lota nodi inau. 2Ebelamo givekaikaiwabu lakaina siliva ke gola ada kevakeva melamelala moyaidi wagaidiya. 3Ada aimo Negevi wagaine-deya gitauya ke ginumiyamiyanau fafali seyana seyana wagaidiya anaetowava giyegemona Bedeli, fafali-nai wagaine tuwaina yana manuwa sinininila gimaduvemididina, fafali-nai Bedeli ke Ai aku nefanine. 4Ada wadedeku ebavebolavoi anadidiga tuwaina gimadububuna ani wagaine kaduwe Yaubada wagaine gioduodu-vagila.

5Tova tayuwe wagaine Lota banae tamana nodi inunudadana. E aku Lota kaduwe yana kevakeva moyaidi, sifi, goti, bulumakau ada kaduwe yoo lakaina, vavinena, natunavo ke togugaiyavo. 6Ada fafali anamwatugu keke adifaiweya tova-nai adiselu iveve ebaga tamwai, faina yadi kevakevayavo moyai-vagaina ada kevakeva adiga anafafali keke adifata. Taidei faine keke gida luboda ina miyaluga. 7Ada taidei faina gavekwavekwageya giyegemona Ebelamo yana kevakeva aditoitaveyabinayavo ke Lota yana kevakeva aditoitaveyabinayavo wagaidiya. Aku tayuwe tova-nai wagaine kaduwe meKenani ada mePelisaiti fafali-nai wagaine imiyamiya.

8Ada tova-nai Ebelamo gikaiyanogala e ada natuna Lota givonena, “Keke analauboda oyeni ke iyayeku kana gavekwavekwageya. Kaduwe ya kevakevayavo aditoitaveyabina ke yaku kevakevayavo aditoitaveyabina keke analauboda nodi ina gavekwavekwageya, faina ide au seya-moena. 9Ada gilubodana kana vetutudaka yada luveya wagaine. Fafali matatabuna magiginiya gimiyamiya ani awaawaegena wagainiya. Ada kai o unavaina waimaulideya aga iya ganavaina waaiyatagideya. Kai o unavaina waaiyatagideya aga iya ganavaina waaimaulideya.”

10Ada Lota giitadadana ani giitana Yolidani laubeuna matatabuna gufa moyaina ada tovotovogina ginau Sowa waina, vaita Yaubada yana bakula Ideni anafaiweya, kaduwe vaita gufa Naeli laubeuna Itipita wagaine anafaiweya. Taidei muliya-yo Sodoma ke Gomola Yaubada giluveyawaliyedi.11Ada Yolidani laubeuna matatabuna Lota tauna faine givenuwadadanena e ada gitauya ginau kauwana ebalakavine waina. Taidei anafaiweya kaliva adiselu ivetutudaka. 12Ada Ebelamo au gimiya fafali Kenani wagaine, aku Lota bana gimiya laubeu anamelala lakaidi adimwatuguya, ada yana manuwa sinininila givemidididi Sodoma melala lakaina lilivane. 13E aku Sodoma anakalivayavo yadi koyona lakai-vagaina ada tova moyaina ikoyona-vavagila Yaubada matane.

14Ada Lota giawala muline, Yaubada givonena Ebelamo, givona, “Unaitadadana fafali matatabuna wagaidiya. Unaita wayavalaseya, wabolimaneya, kauwana ebalakavine ke kauwana ebaolune. 15Faina babi matatabuna tainei uitana aimo ya tubudelideliyavo ganavele-vagaidi. 16Kaduwe ya tubudelideli gana kiveinalina vaita taliya anamakama, ada kai gaito seyana anafaiweya makama gina veyawana mamauwe aga ya tubudelideli gina veyawadi. 17Una mididi ada babi una vagadadanina anavemanawe ke anavelalafa, faina babi-nai o gaveleveleni.”

18E ada Ebelamo yana manuwa sinininila gililina ada givekukuwa ginau Ebiloni ada Mamili yana ai lakaidi imidimididi lilivadiya givemelala. Ada wadedeku ebavebolavoi anadidiga seyana gibubuna ke gioduodu Yaubada wagaine.

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index