Search form

Ebavevuvu 15

Yaubada yana vonadabadaba Ebelamo wagaine.

1Gaitoma-dina muline, Yaubada Ebelamo givonena enoita wagaine, givonaga,

“Ebelamo, keke una matauta.

Iya ya veve, ya laufata aimoina lakai-vagaina.”

2Aku Ebelamo givona, “O Yaubada, gavana ya nuwakabubu ginagai faikuya? Keke-mowa, faina tova kabisona ganaalika aku keke tamo natuku, ada Eliesa kwanaDamasiko ani banae laoviku matatabu-moena ginavaina. 3Una itana, keke maita biyabiyama uda veleku, ada tainei faina yaku togugai yogoyogona kaliva gitubuga aku unuma wagaine ani banae toni laova wagaikuya.”

4Ada Yaubada kaduwe givona-vagila Ebelamo wagaine, givona, “Taidei kaliva-nai Eliesa ani keke bana laovi anatoyaudi, aku aimo kwamana kaliva seyana tauni wagainiya-deya gina yegemona ani banae toni laova wagainiya.”

5E ada Yaubada Ebelamo gigai giyegemona wamelaleya ada givonena, “Una itavedadaga gabameya. Afata ailabama una veyawadi? Keke. Aku aimo ya tubudelidelimomo adiyoo ailabama anafaiweya.” 6Ada Ebelamo vona tayuwe ginogalina ke Yaubada givetumaganena, ada yana vetumagana faina Yaubada giawaveiwakanena, banae Ebelamo toyegayegana.

7Ada kaduwe givone-vagilena givona, “Iya Yaubada-kuna melala Uli fafali Kalidiya wagaine-deya gaabini ke gaaliyeni taidei fafali-nai gana veleni wagaine unamiya, ada una vetoinavuvunena.”

8Aku Ebelamo givona, “O Yaubada, gavaiyamu gana alamane vaita taidei fafali-nai au velemoena aimo yaku babi?”

9E ada Yaubada givonena, “Unanau ada kevakeva-dina unavaidi una aliyedi, taidei anafaiweya: bulumakau vavine seyana, goti vavine seyana ke sifi kaliva seyana, aku seyana seyana anamalamala toiye, ada kaduwe bunebune seyana ke kabututula natudi seyana.” 10Ada Ebelamo kevakeva-dina matatabuna gialiyedi Yaubada wagaine, wadedeku giluvealikadi ada toiye gidabalugedi ke gisevogavogaladi, aku manuga ani keke gida dabalugedi. Ada gisedi anafaiweya aku mwatugu nefanidiya. 11Ada gisedewedewedi giavaina, muliya manuga waiyabu iela kevakeva alialikadi ida kanidi ani Ebelamo givenegadi inau.

12Ada bademowa kauwana gioluolu, ani au Ebelamo gienowavulu gienoalialika-mowa, aku yuyuvana bakibaki gibwatavuna. 13E ada Yaubada Ebelamo givonena, “Unaalamanena velemoena vaita aimo ya tubudelideliyavo ina vewakawaka seyana fafali wagaine wada keke taudiyavo, ada ina vetogugai yogoyogodi, ke malamala fowa analedi (400) wagaidiya ina vemiyakoyokoyodi. 14Aku aimo yoo-dina ina vetogugaiyedi yogoyogodi ani gana vematavulogedi faina, ada muline ya tubudelideliyavo ina yegemo wayadi giba lakai-vagaina nodi. 15Aku o tauni fainiya ani aimo unamiya tova manamanawena ke muline kukuyeya unaalika ada ina tavuni. 16E ada malamala 400 gina avaidi muline, ya tubudelideliyavo ina yewadi idedeku, faina Amoli yana tubudelideliyavo keke gana maduvenegadi analaba ina koyona lakaina. Muliya gana vematavulogedi ada gana venegadi.” **

17Ada kauwana bademowa giolu ke giyuyuvana, au gaitoma seyana vaita wela ani wagaine gilusiyosiyo ada odama giyabeyabela giyegemona ke ginau kevakeva-dina nefanidiya. 18Tova-nai wagaine Yaubada veyavo anavona dabadaba gibubuna Ebelamo wagaine, givona, “Ya tubudelideliyavo wagaidiya babi taidei gana veledi, tainei Itipita anagufa wagaine-deya ada ginau analaba Yufaleitisi gufa lakaina. 19Taidei fafali-dina badi meKenaiti, meKenisaiti, meKadomaiti, 20meItaiti, mePelisaiti, meLifaiti, 21meAmolaiti, meKenani, meGegasaiti ada meYebusi, ani yadi fafali. Malinai taidei unuma-dina yadi babi, aku aimo tova gielaelai ya tubudelideliyavo gana veledi.” Taidei anafaiweya Yaubada givona Ebelamo wagaine.

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index