Search form

Ebavevuvu 2

1Taidei anafaiweya gabama ke babi ada gaitoma matatabuna adiibuibubuna idedeku giluyabu. 2E, ada Yaubada yana ibubuna bademowa matatabuna giluyabuna ada yadayada anaveseveni wagaine giveyawai yana gugai matatabuna wagaidiya. 3Taidei faina, Yaubada yadayada anaveseveni-nai giawanuwakabubuyena ada givetabuna. Gisena anafaiweya faina yadayada-nai wagaine yana ibubuna bademowa giilovau ke giveyawai.

4Taidei gabama ke babi adiibubuna vaguvagu ifuifufuna. Tayuwe tova-nai wagaine Yaubada** babi ke gabama gibubudi, 5keke tamo gudana gida tabotabo babi wagaine, faina Yaubada keke maita wei gida kiveyegemoni gidalugaga babi wagaine. Ada keke tamo kaliva gida miyami ke babi gida vegugaiye. 6Aku gufa gifolufolu babi matatabuna giivevebutana.

Kaliva ke vavine nagona ifuifufudi.

7E ada Yaubada babi wagaine-deya kaliva gibubuna, ada Yaubada yawai givedamana kaliva kabuawana wagaidiya ke yawaina givelena ada kaliva-nai wa aluwaluwana giyegemona. 8Ada Yaubada bakula seyana gikidewedewena fafali ivewagana Ideni wagaine, fafali-nai gadedeku kauwana ebalakavina wagaine.** Wadedeku kaliva-nai gibubuna ani gisena. 9Ada Yaubada ai moyaina tulina tulina gikivetabodi ke wadedeku itabotabo, ai-dina adiita iwakadi ada inayoyo aga guwadi kaduwe adikani iwakadi. Kaduwe Yaubada ai luwei gikivetabodi bakula nefanine-mwane, ai seyana guwana ani yawai-vagata anatovelavela kaliva wagaidiya, aku ai velugana guwana ani kaliva gikivealamanidi ke ina alamanena iwakana ke koyona.

10Gufa seyana gimadumadu Ideni wagaine-deya faina bakula-nai givevebutana, gufa tayuwe Ideni wagaine giyegemo ke muliya giidina ada lagadi laufuli iyegemona wagaine-deya. 11Ada gufa nagona anayegana Pisoni. Bana gimadu nikunikuniga Avila anafafali matatabuna wagaine, wadedeku gola gimiyamiya. 12Tayuwe gola-nai iwaka-vagaina, faina keke tamo gavana nodi gidalomwani. Kaduwe ai gidalina magana iwakana ke kabala anayegana onikisa iwaka-vagaina wadedeku imiyamiya. 13Gufa anavelu anayegana Gioni. Gufa-nai gimadu nukunikuniga Kusa anafafali matatabuna wagaine. 14Gufa anaveto anayegana Taigilisi. Taidei gufa-nai gimadumadu kauwana ebalakavina wagaine fafali-nai ivewagana Asuli. Ada gufa anavelaufuli anayegana Yufeletisi.

15E ada Yaubada kaliva-nai gisena bakula Ideni wagaine ada gina itaveyabina ke kadu babi gina vefaisewana. 16Ada kaliva anaveimeya givelena, givona, “Gawaawaegeni unakani gava ai guwaguwa bakula taidei wagaine. 17Aku kekeba-mowa ai guwana unakani banae iwakana ke koyona adiebalamana anaai. Kai tayuwe ai-nai guwana una kanina, yadayada-nai wagaine velemoena unaalika.”

18E ada Yaubada givona, “Keke iwakana kaliva anakaibe-mowa gina miyami, aku seyana anakwayabu gana bubuna ke gina lubodana.” 19Ada Yaubada bademowa babi wagaine kevakeva matatabuna ke mwatugu manugidi matatabuna gibubudi, ani gialiyedi Adama** wagaine ke gina nogala gavana kaliva gina veyeganedi. Ada gavana givewagana seyana seyana wayawaina, inogamenai anayegana. 20Taidei anafaiweya Adama yegana giveleyabudi, kevakeva melamelala matatabuna, mwatugu manugidi, ada kevakeva walawalaa matatabuna wagaidiya.

Aku keke tamo anakwayabu gida nuwaga analauboda tauna faina. 21E ada Yaubada kaliva gigai gienowavulu. Tova-nai kaliva gidaudau aku lumalumana seyana gisiwakawakana, ada mwatugu-nai gikibodana vido wagaine. 22Ada tayuwe lumaluma-nai gisiwakawakana kaliva vovona wagaine ani wagaine-deya vavine seyana gibubuna. E ada muliya vavine-nai gialiyena kaliva wagaine.

23Ada kaliva gimwala ke givonaga,

“E au bademowa, luluna iya luluku wagaine-deya

ada vovona iya vovoku wagaine-deya!

Gavewagana ‘vavine’, faina bana

giyegemona kaliva vovona wagaine.” **

24Tayuwe faina kaliva seyana seyana inana ke tamana gina miyasegedi aku vavinena nodi ina miyaluga ke ina vevovo seyana.

25Ada kaliva ke vavine nodi konekonediyavo, aku adiselu keke ida vevovomumu.

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index