Search form

Ebavevuvu 24

Aisake ada Libeka.

1Ebelaamo au givesilakai-mowa ada yana gugai matatabuna wagaidiya Yaubada givonanuwakabubuyena ke gilemena. 2E ada seyana tova yana togugaiyavo aditonagona, banae yana giba matatabuna aditoitaveyabina ani gidouwe gielai ke givonena, “Ide kamiyamiya meKenani adimwatuguya, aku keke nuwanuwaku natuku vineKenani ginanagi. E ada nima unasena ubuku dibune,** 3ada nuwanuwaku una vonadabadaba Yaubada matane, Banae gabama ke babi aditoibubuna wagaine. Una vonadabadaba vaita keke natuku una venagi meKenani vevine wagaidiya-deya, 4aku unanau yaku fafaliya ke tauku yaku gabumomo natudiyavo wagaidiya ada Aisake vavinena seyana una vagaule una aliyena.”

5Ada togugai-nai gitolidadanena, “Aku kai vavine-nai keke gina fasima nodi anaela aga gavaiyamu? Gilubodana natu ganaabi gana yewena fafali-nai uelai wagaine-deya?”

6Ani Ebelaamo givonena, “Unaitaveyabini, keke natuku unaabi unanauwe wadedeku.” 7Ada kaduwe givona, “Kauveya ani Yaubada gabameya gimiyamiya. Ada Banae kamaku unumina ke yaku fafali ebatubugiku wagaidiya giabiku giyegemoneku ke givonadabadaba velemoena wagaikuya, givonaga, 'Aimo ya tubudelidelimomo wagaidiya babi taidei gana veledi.' Tayuwe faina yana anelose gina imili gina nagoyeni, e ada meyameyaganina natuku vavinena una vagaule una aliyena. 8Aku kai vavine-nai keke gina fasima nodi wanaela aga oyeni aimo yavuyavu vonadabadaba-nai una bubuna wagaikuya faine. Aku natuku ani keke unaabi unanauwe wadedeku.” 9E ada togugai-nai nimana gisena yana kauveya Ebelaamo ubuna dibune ada givonadabadaba wagaine vaita veimeya taidei gina gugaiyena.

Togugai ginau Aisake vavinena gina vagaulena.

10Ada togugai-nai ginau yana kauveya Ebelaamo wagaine ke gaitoma matatabuna iwaka-vagaidi givenuwadadanedi givaidi, ada ginau Ebelaamo yana kameli wagaidiya, kameli teni givaidi gialiyedi ada gikidewedewedi. Kidewadewa giavaina, gitauya ginanau Elami Naalaimu, wada Neoli yana melala wagaine. 11Ginau-deeeya ada tova-nai giyegemona melala-nai lilivane au kameli giveimeyedi ienobala gufa kavu lilivane. Tainei bademowa givelavilavi ada vevine yadi tova inana gufa inakoi.

12E ada givebutu giveola, givona, “O Yaubada, yaku kauveya Ebelaamo yana Yaubada, bademowa bana yana nuwanuwa ualamanena. Ada meyameyaganina uda kiveyegemonena tunutunugina matakuya, ke nuwakalikali una vewala yaku kauveya Ebelaamo wagaine. 13Uitana iya gamidimididi taidei gufa kavu lilivane, aku melala anakalivamomo natudiyavo akeakedu ielaelai gufa inakoi. 14Ada vavine seyana gana vonenaga, 'Gufa maita uda veleku gadayuga,' ada kai vavine gina vona, ‘Iwakana, unayuga ada kaduwe ya kameliyavo gana veyudi,’ wadedeku gana alamanena tayuwe vavine-nai uvenuwadadanena ya togugai Aisake faine. E ada taidei wagaine gana alamanena bademowa nuwakalikali uvewala yaku kauveya wagaine.”

15Ada veoveola giluyabuna muline gidaita-ni Libeka giyegemona melala wagaine ke gielaelai gufa anatuwava giavaavalana. Banae tamana Betuweli, Ebelaamo taina Neoli vavinena Milika nodi natudi. 16Banae Libeka aiwaka founa ada matabolana, keke tamo tova gavakaliva vovona gida kiluvaluva. Ani mine-nai giobu gufa kavu wagaine gufa gikoi gilaka, 17ani Ebelaamo yana togugai gimaduga-mowa ginau wagaine ada givonena, “Meyameyaganina gufa maita gadayuga ya tuwava wagaine?”

18Ada Libeka gilufata, givona, “Iwakana yaku kauveya, unayuga,” ke maduga-mowa gufa watuwavina giavalakakili givele giyuga.

19Ada giyuga-yabu, vavine givona, “Kadu gufa ganakoi veiva ya kameliyavo faidiya, analaba inayuga bademowa adifaiweya.” 20E ada gufa gimadubiwa-moena kabala italawakana kevakeva yadi ebayuga faina ani wagaine aku gimadu giobu kavu wagaine kadu gufa gikoina, ada gufa gikoi veiva analaba yana kameliyavo matatabudi iyuga adifaiweya. 21Ada vavine yana gugai wagaine togugai-nai keke maita yana ifufu, aku aimo giitavenuvenuwadadanena ke ginuwanuwa, ‘Kai anaita yaku ela-nai anaiwakana gamenai Yaubada giveleku.’

22Ada bademowa kameli iyuga-yabu, au Ebelaamo yana togugai nimana giobu yana foseya ada kabuwafola gola seyana ke nimakwasi gola luwei ani givaidi gina velena. Taidei giba-dina toiye fatadi lakaina. 23Aku togugai-nai gitolidadanena, givona, “O gaito natuna? Kai uda vemwamwala aga uda voneku, gavaiyamu, tamo tutulagolota faimeya bogi seyana gaga adaveyawai tama yana manuweya?”

24Ada bonana gifatana, givona, “Iya Betuweli natuna, Milika ada Neoli nodi natudi.” 25Ada kaduwe givonena, “Kevakeva adiga moyai-vagaina wagaimeya, anafaiweya tutulagolota gimiyamiya faimiya ke bogi wana veyawai.”

26Ada kaliva-nai giodu ke Yaubada giawadavadavana. 27Ada givonaga, “Yaubada gadavadavana, yaku kauveya Ebelaamo yana Yaubada. Banae ginuwakalikaliyena ke yana vonadabadaba gigugaiye-dewedewena yaku kauveya wagaine. Anafaiweya iya gaelaelai aku Yaubada ginagoyeku tunutunugina gaelai yaku kauveya yana gabuyavo wagaidiya.”

28Ada yadi ifufu giavaina, akeakedu-nai gimadu giyewana inana yadi manuweya ke badi gavega manuwa-nai wagaine imiyamiya ani giifufu taidei gaitoma-nai faine. 29-30Ada Libeka tawagana kaliva anayegana Lebani, ani tova-nai giitana kabuwafola gola ada kaduwe nimakwasi gola novuna nimaodona wagaidiya, ke ginogalina Libeka yana ifufu gavaiyamu togugai givona wagaine, ada au gimadu ginau gufa kavu wagaine. Ada gina giyegemona wadedeku ani giitana kaliva-nai aimoina gimidimididi wayana kameli nodi gufa kavu lilivane. 31Ada givonena, “Oyeni Yaubada givonanuwakabubuyeni, ada keke gida luboda idedeku una midimididi. Unaela kananau manuweya. Manuwa bademowa gakidewadewana fainiya ada kaduwe kameli yadi fafali.”

32E ada Ebelaamo yana togugai-nai ginau manuweya. Ada Lebani yadi giba kameli wagaidiya giseobuyedi ke aa kameli faidiya gialiyedi ada yadi fafali gikidewadewa. Ada kaduwe gufa gialiyena ke banae ada yana kalivayavo nodi agedi ina koladi. 33Ada aa matane isena, aku togugai-nai givona, “Keke nagona gana madukani, analaba gana ifufuyemi gavana ganavone.”

Ada Lebani givona, “Una ifufuyema.”

34E ada givebutu ifufu, givona, “Iya Ebelaamo yana togugai. 35Ada tova taidei wagaine yaku kauveya givekaikaiwabu velemoena, faina Yaubada gilemena lakai-vagaina gaitoma moyaina wagaidiya. Anafaiweya yana sifiyavo ke yana gotiyavo ada yana bulumakau ke yana siliva ada yana gola lakaina, ada kaduwe yana togugaiyavo kaliva ke vevine ada yana kameliyavo ke yana donikiyavo moyaidi. 36Yaku kauveya vavinena Sela yadi vesilakai wagaine natudi kaliva seyana ivenatunena, ada yana giba matatabuna giatuegena wagaine. 37Ada yaku kauveya giveimeyeku gavonadabadaba Yaubada matane vaita keke natuna gana venagi meKenani natudiyavo vevine wagaidiya-deya, badi adimwatuguya gimiyamiya. 38E aku gananau anaunuma ke tauna yana gabu wagaidiya ada natuna Aisake vavinena seyana gana vagaule gana nauwena.

39“Ada yaku kauveya gatolidadanena, 'Gavaiyamu kai keke vavine gina nuwa awaega nodi anaela?'

40“Ani gilufata, givona, 'Yaubada Banae gayegayegana ke gatunutunugina matane, ani aimo yana anelose gina imilina oye nodi ke gina lemeni yaku nuwanuwa una luyabuna ya nau-nai wagaine. E ada afaiweya natuku vavinena una vagaulena tauku yaku gabu ada kamaku unumina wagaidiya-deya. 41Kai unanau yaku gabuyavo wagaidiya aku vavine-nai keke ina awaege wagainiya, aga oye aimo yavuyavu wagaikuya-deya vonadabadaba-nai ububuna faine. Tayuwe wai-nai wagaine gagana oye aimo yavuyavu.'

42“E, ada malinai gaelai gufa kavu wagaine ada gaveola, gavona, 'O Yaubada, yaku kauveya Ebelaamo yana Yaubada, kai ya nuwanuwa anafaiweya aga uda vemwamwala yaku ela idedeku faine anaiwakana uda veleku. 43Uitana, iya gamidimididi taidei gufa kavu lilivane. Aku kai seyana vavine akeduna ginaela gufa ginakoi ada gana vonenaga, “Meyameyaganina ya tuwaveya maita gufa gadayuga?” 44ada kai vavine-nai gina vonekuga, “Iwakana unayuga, ada kaduwe gufa ganakoi ya kameliyavo faidiya,” tainei banae Yaubada givenuwadadanena yaku kauveya natuna faine.

45“Ada muliya-yo nuwakuya-deya gaveoveola-yabu aku Libeka giyegemona wayana gufa tuwava giavaavalana e ada giobu gufa kavu wagaine gufa gikoina, ada gavonena, ‘Meyameyaganina maita gufa uda veleku gadayuga?’

46“Ada yana gufa tuwava avalane gimaduavalakakilina ke givoneku, ‘Unayuga, ada ya kameliyavo kaduwe gana veyudi.’ E ada gayuga giavaina ke kameli kaduwe giveyudi.

47“Ada gatolidadanena, gavona, 'O gaito natuna?'

“Ani givona, 'Iya Betuweli natuna, banae Neoli ke vavinena Milika nodi natudi.'

E ada kabuwafola gakivefosena kabuna wagaine ke kaduwe nimakwasi nimane gauyadi, 48ada gaodu Yaubada wagaine gavona vesiule. Ada yaku kauveya Ebelaamo yana Yaubada gaawadavadavana, faina Banae ginagoyeku tunutunugina gaelai ke yaku kauveya anatubuluga, taina tubuna vavine ani gana vagaulena natuna faine. E, ada taidei anafaiweya giyegemona.

49“Bademowa taumiyavo tagamiya wanogalina yaku ifufu, ada wana voneku, kai wanuwakalikali ke wanagugai tunutunugina yaku kauveya wagaine? Aku kai keke aga kaduwe wana voneku anafaiweya, ke gana alamanena gavana ganagai.”

50E ada Lebani ke Betuweli ilufata, ivonaga, “Gaitoma taidei Yaubada wagaine-deya gielai, ada keke tamo gavana amafaiweya anavone wagainiya. 51Libeka idauwe, una vagaule nodi wananau ada ya kauveya natuna gina nagina anafaiweya Yaubada bademowa givenuwadadanena mamauwe.”

52Tova-nai Ebelaamo yana togugai-nai yadi laufata ginogalina, au giiboula-mowa babi wagaine Yaubada matane. 53E ada togugai lokoloko kaikaiwabu gola ke siliva giseyegemonedi ada Libeka givelena, aku kaduwe giba fatadi lakaidi ani inana ke tawagana Lebani nodi adinuwakabubu giveledi. 54Ada togugai ke badi gavega banae nodi ani ikani ke bogi wadedeku idau.

Ada mala gilavuna malabutuya tova-nai ienoviladi ada giveola Lebani ke inana nodi wagaidiya, givona, “Wanaimiliku ganayewa-vagila yaku kauveya wagaine.”

55Aku tawagana Lebani ke inana ilufata, ivonaga, “Ime nuwanuwama Libeka nodi anamiyaveyaveyavo yadayada 10 anafaiweya, e muliya-yo unaabi una nauwena.”

56Aku givonedi, “Keke wana kikiveyabiku idedeku. Yaku ela anaiwakana bademowa Yaubada giveleku, e ada wanamadu awaegeku gananau yaku kauveya Ebelaamo wagaine.”

57Ada ivona, “Ina iwakana, aku vavine tauna kanadouwe ginaela kana toliyeluvaluvana gavana yana nuwanuwa.” 58E ada Libeka idouwe gielai ke itoliluveluvena, ivona, “Uawaegau kaliva taidei nodi wananau?”

Ani givona, “Ika, iya nodi ananau.”

59Ada novudi Libeka iawaegena ginanau aku togugai vavine seyana nodi banae anatoitaveyabina yana tova kwamana wagaine, ada Ebelaamo yana togugai-nai ke yana kalivayavo nodi. 60Ada vonanuwakabubu ibubuna Libeka wagaine, ivona,

“Novuma, meyameyaganina aimo yoo

lakai-vagaina una vetubulalagina,

ya tubudelideliyavo adiyoo gina veinala-mowa

e ada adigaviyayavo ina toyogitagonedi.”

61Ada Libeka ke yana togugaiyavo akeakedu ikidewadewa giavaina au iyage kameli wagaidiya ada matatabudi itauya kaliva-nai nodi. Taidei anafaiweya Ebelaamo yana togugai-nai Libeka giabi ginauwena.

62E aku tova-nai wagaine Aisake gielai Biya Laai Loi** wagaine-deya ada gimiyamiya Negevi. 63Aku lavilavi seyana ginudadana ginau fafali kavovona wagaine givenuwatudadana, ada matana gida segena ani giitadi kameli ielaelai. 64Ada kadu Libeka matana gida segena ani Aisake giitana, ada yana kameli wagaine-deya giobu 65ke togugai gitolidadanena, givona, “Wada gava kaliva tayuwe fafali kavovona wagaine gielaela wagaideya?”

Ani togugai-nai gilufata, givonena, “Wada yaku kauveya.” Au vavine kaleko makamakakana givai magigina gisebabalina.

66E ada togugai-nai Aisake giifufuyena gavana matatabuna gigugaiyedi faidiya. 67Ada Aisake Libeka giabi ginauwena inana Sela yadi manuwa sinininila wagaine ke wadedeku ginagina ada nodi imiya, ada Aisake Libeka ginuwakabubuyena lakaina. Ada nuwana giveiwaka inana Sela yadi alika faine.

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index