Search form

Ebavevuvu 29

Iyakobo giyegemona Padan Alama wagaine.

1Ada muliya Iyakobo kaduwe gitauya-vagila ke gielai fafali-nai kauwana ebalakavina anakaliva wagaidiya. 2E, wadedeku gufa kavu seyana giitana fafali kavovona wagaine, aku sifi boudi toiye ienobalabala kavu-nai lilivane, faina aditoitaveyabina nodi aimoina ina veyudi gufa-nai wagaine. Aku kavu-nai awana sesebodana kabala lakaina wagaine. 3Tova-nai sifi matatabuna aditoitaveyabina ina aliye-yabudi wadedeku, e muliya toitaveyabina sifi kabala ina vekaliwawana kavu-nai awane aku sifi gufa ina veyudi. Ada kaduwe kabala-nai ina wailiyena ke gufa kavu awana inaseboda-vagilena.

4Ada Iyakobo ginau toitaveyabina sifi wagaidiya ke gitolidadanedi, givona, “Tubuiyakweyavo, imi gavega?”

Ani ilufata, ivonaga, “Ime Elani anakaliva.”

5Ada kaduwe gitolidadane-vagiledi, givona, “Aku maita waalamanena Lebani banae Betuweli natuna, aku Neoli tubuna?”

Ani ilufata, ivonenaga, “Ika, bana ime aalamanena.”

6E ada givonedi, “Gavaiyamu, iwakana?”

Ada ifatana, ivona, “Ika, iwakana gimiyamiya,” ada ivonena, “Aku ida natuna Litiyeli sifi nodi ielaelai.”

7Ada givonedi, “Wanaitana, ida aimo yadayada lakaina, kevakeva keke yadi tova wana vagauwidi. Gufa wana veyudi ada kaduwe wana yewe-vagiledi laimwagu inakani.”

8Ani ivonena, “Ime keke ana wailiye aku anaboda anatova-nai sifi matatabuna ina vagauwi-yabudi, muliya kabala ana wailiyena gufa kavu awana wagaine ke sifi ana veyudi.”

9Ada Iyakobo aimo kaliva-dina nodi iifuifufu, ani Litiyeli giyegemona tamana yana sifiyavo nodi, faina bana toitaveyabina sifi. 10Ada Iyakobo giitana Litiyeli, inana novudi natuna, ada Lebani yana sifiyavo, au gina kabala lakaina aku anakaibe giwailiyena kavu-nai awana wagaine-deya e aku tamana yana sifiyavo giveyudi.11Muliya gina novuna Litiyeli giveyaugina ada au giafuwa gitagiya. 12Ada tagiya muline givebutu giifufuyena, givona, “Iya tama yana gabu, novuna Libeka natudi iyayeku.” E ada vavine-nai Iyakobo gisegena aku gimadu gina tamana giifufuyena.

13Ada Lebani ginogalina novuna natudi valeyana, au gimadubodebode ginau wagaine, ada giatulauwi giveyaugina ke giabi gialiyena yana manuweya. Wadedeku Iyakobo giifufuyena gavana giyegemona banae wagaine. 14E ada Lebani givonena, “Oyeni velemoena iya dayagiku.” Ada Iyakobo wadedeku nodi imiya.

Leya ada Litiyeli Iyakobo ginagidi.

15Ada vaikoi seyana giavaina, Lebani givonena, “Iya yaku gabu velemoena oyeni, ada keke gida luboda una faisewa-kavovo faikuya aku keke fata. Tova taidei una voneku gavana ya nuwanuwa giluboda gana veleni fata faina.”

16E aku Lebani natunavo vevine adiselu, Leya ineinagona ke Litiyeli kwamaneya. 17Ada Leya givematakibo, aku Litiyeli ani vavine aiwakafouna. 18Iyakobo matana gimununa Litiyeli anaaiwaka wagaine, tayuwe faina givona Lebani wagaine, givonaga, “Ganafaisewa fainiya malamala seveni, muline natu kwamaneya una awaege gana nagina.” **

19E ada Lebani yana nuwanuwa giawaveiwakanena ada givona, “Iwakana banae gana veleni e aku keke mali kaliva ginanagi. Oye iya nodi kanamiya.” 20Ada Iyakobo givetogugai Lebani wagaine malamala seveni wagaidiya Litiyeli ananagi faina, aku wada malamala-dina wagaine vaita anafaiweya yadayada gavaiyei banae wagaine, faina mine-nai ginuwakabubuyena lakaina.

21Ada malamala seveni giavaidi muline, au Iyakobo Lebani givonena, “Yaku vetogugai wagainiya bademowa anatova giavaina, ada natu una veleku gana nagina.”

22E ada Lebani melala-nai anakalivamomo matatabuna givagauwidi nagi-nai anakanibutu lakaina faina. 23Aku mala bademowa gibogi ada Lebani vaita natuna Litiyeli gida naunauwe ani gimiya aku Leya giabi ginauwe Iyakobo gisivenagina. Ada Iyakobo Leya nodi idau. 24Ada kaduwe Lebani yana togugai vavine anayegana Silipa ani natuna Leya givelena ke wagaine gina vetogugai.

25Ada mala gilavuna Iyakobo gienovilana ada givona, “Ida Leya!” E ada gina Lebani gilumatana, givonaga, “Taidei gavana ugana, ani keke analauboda wagaikuya. Gavetogugai wagainiya Litiyeli faine, aiyo? Aku gavana faina ufwayaku?”

26Ada Lebani gilufata, givona, “Ime idedeku keke amagiduwa anafaiweya, keke gida luboda kwamaneya ginamadu nagi-yo muliya ineinagona.” 27Ada kaduwe givonena, “Una atuvefaila aku nagi anakanibutu anawiki gina avaina, muline Litiyeli ana vele-vagileni una nagina. Aku kaduwe una faisewa-vagila faikuya malamala seveni wagaidiya.”

28Ada au Iyakobo giawaveiwakana gavana Lebani yana nuwanuwa anafaiweya, ke wiki-nai giluyabuna Leya nodi. Muline Lebani natuna velugana kwamaneya Litiyeli giabi ginauwe Iyakobo wagaine gisivenagina. 29E ada kaduwe yana togugai vavine anayegana Bila, ani natuna Litiyeli givelena ke gina vetogugai wagaine. 30Ada Iyakobo kaduwe Litiyeli nodi idau. Ada Litiyeli ginuwakabubuyena lakai-vagaina aku Leya keke gida nuwakabubuye velemoena. E ada Iyakobo vavine anavelu faine kaduwe givetofaisewa-vagila malamala seveni wagaidiya Lebani wagaine.

Iyakobo natunavo

31Yaubada giitana Iyakobo keke Leya gida nuwakabubuye velemoena, e ada giawaegena ke banae gina venavenatuna, aku Litiyeli kakalina. 32E ada au Leya giveifuga ke natudi kaliva ivenatunena ada anayegana ivelena Lubeni, faina ivonaga, “Yaubada bademowa amavita giitana. Ada au moganema gina nuwakabubuyema velemoena.” **

33Ada kaduwe iveifuga-vagila ke natudi kaliva ivenatunena ada ivona, “Faina Yaubada ginogalina vaita moganeku keke gida nuwakabubuyema, e ada kaduwe taidei givele-vagilema.” E ada anayegana ivelena Simiyoni.**

34Kaduwe iveifuga-vagila, ada tova-nai natudi kaliva ivenatunena, ivona, “Au tova taidei moganeku yana nuwanuwa gina luvefosena wagaimeya, faina natunavo kaliva aditoto avenatunedi.” E ada anayegana ivelena Livai.**

35Ada kaduwe iveifuga-vagila ke natudi kaliva anavelaufuli ivenatunena ada ivona, “Tova taidei Yaubada ana awadavadavana,” e ada kwamana anayegana ivelena Yuda.** Ada Leya iageyava.

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index