Search form

Ebavevuvu 30

1Aku Litiyeli giitanuwagana vaita banae keke tamo Iyakobo natuna gida venatune, au givebutu tawagana giibabaledi. Ada moganena wagaine givona, “Biyabiyama una veleku, aenanai ganaalika.”

2Ada Iyakobo nuwana gikoyo vavinena wagaine ada givona, “Gavaiyamu, iya Yaubada anafaiweya, e ada gaawatani keke una venatuna?”

3Ada Litiyeli givona, “Uitana, taidei yaku togugai vavine anayegana Bila. Banae vovona una kiluvaluvana ke gina venatuna iya faikuya, e ada banae wagaine iya kaduwe yaku gabu gana vetubulalagina.” 4E ada yana togugai Bila giatuegena Iyakobo wagaine anafaiweya banae vavinena. Ada Iyakobo mine-nai vovona gikiluvaluvana 5ke giveifuga ada kwamana kaliva ivenatunena. 6Ada Litiyeli givona, “Yaubada givenuwadadana faikuya ke giawaveiwakaneku. Yaku veola ginogalina ada kwamana kaliva giveleku.” Taidei faina anayegana givelena Dani.**

7Ada kaduwe yana togugai-dina iveifuga-vagila ke Iyakobo natuna anavelu kaliva ivenatunena. 8Ada Litiyeli givona, “Gabalalava toyogina kawaku wagaidiya, ada bademowa gavetoyogina.” E ada kwamana-nai anayegana givelena Nefitalai.**

9E aku Leya iitanuwagana vaita badi venatuna wagaine iageyava, ada yadi togugai vavine anayegana Silifa ani iatuegena Iyakobo wagaine anafaiweya banae vavinena. 10Ada Leya yadi togugai-nai giveifuga, ke Iyakobo natuna kaliva ivenatunena. 11Ada Leya ivona, “Yama iwakana bademowa anuwagana.” E ada anayegana ivelena Gada.**

12Ada kaduwe Leya yadi togugai Silifa iveifuga-vagila ke Iyakobo natuna kaliva anavelu ivenatunena. 13Ada Leya ivona, “Avemwamwala lakai-vagaina, kai anaita vevine matatabudi inavona faimeya, ‘Badi tovemwamwala.’” E ada kwamana-nai anayegana ivelena Aseli.**

14Ada imiyamiya aku yadayada seyana wagaine, witi anabavagu, Lubeni ginau witi anabakuleya ani ai seyana anayegana manideleki ginuwagana. Ada tufona givaidi gialiyedi inana Leya wagaidiya. Au Litiyeli giitana ada tawagana givonedi, “Natumi yana manideleki** maita wada veleku gada kanina.”

15Ani inuwalolonena ada ivonena, “Keke! Bademowa moganeku ulemama, aku kaduwe ugaluvaluva natuma yana manideleki unavaina?”

Ada Litiyeli gilufata, givona, “Ina iwakana, aku kai manideleki-nai wana veleku aga Iyakobo gana awaege bogi nodi wanadau natumi yana manideleki fatana.”

16Ada tayuwe lavilavi-nai wagaine Iyakobo gielaelai witi anabakuleya-deya, ani Leya imadubodebode inau wagaine ada ivonenaga, “Gilubodani unaela ime nodi kanadau, faina bademowa afatani natuma yana manideleki wagaine.” E ada bogi-nai wagaine moganedi gina nodi idau.

17Ada Leya yadi veola Yaubada givenogalena ke giawaegedi kaduwe iveifuga-vagila, ada Iyakobo natuna anavenima fafalina ivenatunena. 18E ada ivona, “Yaubada gifatama, faina yama togugai vavine aatuegena moganema wagaine.” Ada kwamana-nai anayegana ivelena Isaka.**

19Ada kaduwe Leya iveifuga-vagila ke Iyakobo natuna kaliva anavesikisi ivenatunena. 20Ada ivona, “Yaubada givelema amanuwakabubu lakai-vagaina. Tova taidei moganema ginadewa wagaimeya wayana vemoimoina nodi, faina natunavo kaliva adisikisi avenatunedi.” E ada natudi-nai anayegana ivelena Sebuloni.**

21E ada Sebuloni gitubuga muline, Leya iveifuga-vagila ke natudi vavine ivenatunena, ada anayegana ivelena Daina.

22Aku Yaubada ginuwanuwa Litiyeli faine, ke givenogalena ada giawaegena gina venatuna. 23E ada giveifuga ke natudi kaliva ivenatunena ada ivona, “Yaubada bademowa amavovomumu givaiegena.” 24Ada natudi anayegana ivelena Yosefa, faina ivona, “Yaubada gina vele-vagilema velugana kwamana kaliva.” **

Iyakobo yana kevakevayavo ivemoyai.

25Ada Yosefa gitubuga muline, Iyakobo lawana Lebani givonena, “Unaimiliku ganayewa tauku yaku fafali wagaine. 26Vavinekuweyavo ke natukuweyavo nodi una awaegema ada ananau. Badi faidiya yaku vetogugai wagainiya bademowa galuyabuna. Kaduwe bademowa ualamanena gavaiyamu faisewa anatubuga gafaisewadi fainiya.”

27Ani Lebani givonena, “Kai uvemwamwala wagaikuya aga unamiya, faina gaitanuwagana vaita Yaubada gilemelemeku vuvuna oye wagainiya.” 28Ada kaduwe givone-vagilena, givona, “Unavoneku, gavana fata kai unainana mamauwe gana veleni.”

29Ada Iyakobo givonena, “Tauni bademowa ualamanena gavaiyamu gafaisewa fainiya, ada kaduwe gavaiyamu ya kevakevayavo ivemoyai yaku itaveyabina wagaidiya. 30Faina muliya-yo gaelai idedeku ya kevakevayavo gavaiyei gagana, aku malinai bademowa ivemoyai-mowa. Ada Yaubada gilemeni kai gadedeku gana nauwedi. Aku iya gava toveya gavana maita ganagai tauku yaku gabu kaduwe faidiya?”

31Ada Lebani gitolidadanena, “Gavana nuwanuwa gana veleni?”

Ani Iyakobo gilufata, givona, “Keke gava gaitoma una veleku, aku kai gaitoma seyana taidei unagana faikuya, aga ganamiya ke ya kevakevayavo gana vekavekanidi ke gana itaitaveyabidi. 32Taidei gaitoma-nai anafaiweya, malinai una awaegeku gananau ya kevakevayavo matatabuna wagaidiya ada gana luididi, tainei sifi ke goti vovodi kionaonadi ada bwaebwaedi. Kaduwe lami vovodi bowabowanaga gana luliyedi, ani wada aimo iya fataku. Kaduwe tova-nai ina venatuna aga gava kevakeva vovodi bwaebwaedi ke kionaonadi, wada iya yaku kevakevayavo. Aku kwayakwayadiga inamiya wagainiya. 33Ada tova ielaelai wagaidiya unaela yaku kevakevayavo una dadanidi, ada yaku dewa tunutunugina gina awatalatalaina. Una alamanena kai iya gavona velemoena o kai gafwaya. Kai yaku kevakevayavo wagaidiya-deya tamo sifi o kai goti una itanuwagana vovona kwayakwayana aga iwakana unavona, ‘Ida ikiyafuna.’”

34Ada Lebani givona, “Iwakana! Kana gugaiyena uvona anafaiweya.” 35Aku yadayada-nai wagaine goti kaliva matatabuna vovodi lugologoloidi o bwaebwaedi, ada kaduwe goti vevine vovodi kionaonadi o bwaebwaedi, ani tamo kwayakwayana wagaidiya, ke sifi bowabowadiga, ani matatabuna Lebani giluliyedi ke natunavo giveimeyedi ina itaveyabidi. 36E ada Lebani kevakeva-dina givaidi ginauwedi yadayada toiye anaatuwada anafaiweya.

Aku Iyakobo gimiya ke Lebani yana kevakevayavo tufodi giitaveyabidi. 37Ada ai toiye adiyegana popila, alamoni ke peleni, ai-dina nafodi kwayakwayana, ani wagaidiya Iyakobo lagadi gidabadi gialiyedi gisisidi ada kwafilidi gikakidi aku nafodi kwayakwayadi iyegemona. 38Ada iwalofu-dina wadebaidiya matatabuna gisesedi kevakeva yadi ebayuga negenidiya, ada evona kevakeva yadi tova ina elaela gufa ina yuyuga aku iwalofu-dina wadebaidiya ina itaitadi. 39Ada ielaela iyuyuga aku ivefofofo tabodiya iwalofu-dina magigidiya, ada natudiyavo itubutubuga vovodi lugologoloidi ada kionaonadi ke vovodi bwaebwaedi. 40Ada Iyakobo kevakeva biyamidi giluliyedi taudiyavo gagana, aku matatabu-moedi magigidi ginau lugologoloidi o bowabowadi Lebani yana kevakevayavo wagaidiya. Ada tauna yana kevakevamomo giluliyedi tabae, aku keke gida vetutamwaidi Lebani yana kevakevayavo nodi. 41Kaduwe, kai tova-nai kevakeva toyogidiyavo igasebaseba, aga Iyakobo iwalofu gisesedi ebayuga wagaine wadebaidiya, ke inavefofofo aiwala-dina lilivadiya. 42Aku kevakeva kabekabebediyavo, ani keke iwalofu gida sesedi faidiya. E ada kevakeva kabekabebediyavo inau Lebani wagaine aku toyogidiyavo Iyakobo wagaine. 43Taidei wai-nai wagaine Iyakobo au givekaikaiwabu-mowa. Tauna yana kevakevayavo lakaina, kaduwe wa yana togugaiyavo vevine ke kaliva, ada kaduwe yana kameliyavo ke yana donikiyavo.

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index