Search form

Ebavevuvu 33

Iyakobo ke Iso ivenuwaga

1Ada Iyakobo Peniela gisegesegena aku matana gidanau, ani Iso giitana gielaelai yana kalivayavo adiyoo 400 nodi. E ada biyabiyama givutugedi ada Leya natudiyavo inau inadi wagaidiya, anafaiweya Litiyeli, ada kaduwe togugaiyavo vevine adiselu. 2Ada togugai vevine adiselu wanatudiyavo gisenagoyedi ke Leya natudiyavo nodi nefanine ada Litiyeli natudi Yosefa nodi muline-mwane. 3Aku Iyakobo anakaibe wai ginago-moena, ada giiboula tova seveni aku ginaunau tawagana wagaine.

4Aku Iso gimadubodebode gina Iyakobo giatulauwi giveyaugina, ada ivetagitagiya.5Ada tagiya muline Iso gida itadadana ani vevine ke biyabiyama giitadi, ada au gitolidadana, “Ida gavega?”

Ani Iyakobo gilufata, givona, “Ida biyabiyama-dina Yaubada yana nuwadogeya giveleku.”

6Ada togugai vevine adiselu wanatudiyavo iela lilivane iiboula vemoimoina Iso wagaine. 7Anavelu Leya ke natudiyavo nodi iela iiboula, ada anaebalauyabu-mowa Litiyeli natudi Yosefa nodi kaduwe iela iiboula.

8Ada kaduwe gitolidadane-vagilena, givona, “Aku wada kevakeva boudi gamadunuwagadi ielaelai, gavana vuvuna uimilidi wagaikuya?”

Ani Iyakobo gilufata, givona, “Wada gaimilidi gana kivemwamwalini ada nuwa gina veiwaka wagaikuya.”

9Aku Iso givona, “Kaiku, auwe. Iya bademowa yaku kevakevayavo moyai-vagaidi ada akufaiweya. Wada auwe una kiveyabidi ya kevakevayavo.”

10Ani Iyakobo givonaga, “Keke, aku gaveola wagainiya, kai unuwakalikaliyeku aga yaku nuwakabubu kevakeva unavaidi, faina tova-nai ya vemwamwala gaitana ani vaita Yaubada yana vemwamwala gadaitaita, faina umadubodebodeku nuwakalikaliya. 11Kawaku, gaveola wagainiya yaku nuwakabubu ialiyedi udavaidi, faina Yaubada gilemeku lakai-vagaina ada kevakeva bademowa akufaiweya.” Ada Iyakobo yana vona giselakalakavena wagaine au Iso nuwakabubu givaina.

12Ada Iso givona, “Kanatauya, gana kwayabuni kananau.”

13Ani Iyakobo givonena, “Yaku kauveya, bademowa ualamanena biyabiyama-mowa ada kaduwe kevakeva tufodi natudiyavo evagudi. Tayuwe faine keke adifaiweya gana luyayalidi inamadu, aenanai ina vealialika. 14Ada yaku kauveya, auwe wai una nagona, aku aimo mainuwameyavo ana vemulitagoiyeni yadi nauya adifaiweya analaba kaduwe kana venuwaga-vagila Seila wagaine.”

15Ada Iso givona, “Kai anafaiweya aga tufona yaku togugaiyavo inamiya inalemeni.”

Ani Iyakobo givona, “Yaku kauveya, auwe, keke una nuwanuwa. Aku gaitoma seya-moena ani uda nuwakalikaliyeku, tainei-mowa.”

16E ada tayuwe yadayada-nai wagaine Iso gitauya giyewana Seila wagaine. 17Aku Iyakobo ginau Sakoti, wadedeku yana manuwa giyogona ada kaduwe yana kevakevamomo yadi vada. Tayuwe vuvuna fafali-nai anayegana ivewagana Sakoti.**

18Ada taidei anafaiweya Padan Alama-deya gisegena ada kukuyeya gielai Sekemu, seyana melala lakaina Kenani wagaine, ada melala-nai lilivane giveebaga. 19E ada babi-nai wagaine giveebaga ani gikimonena Emoli natunavo wagaidiya, banae Sekemu tamana, ada fatana siliva 100. E ada wadedeku yana manuwa sinininila givemididina. 20Ada wadedeku ebavebolavoi gididina ke givewagana ‘Yaubada, ani Isileli yana Yaubada’.

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index