Search form

Ebavevuvu 39

Yosefa ivekimoneyena Potifali wagaine.

1E aku Yosefa iabi inauwena Itipita, ke kwanaItipita seyana anayegana Potifali ani gikimonena Isimeli yana tubudelidelimomo wagaidiya-deya.** Banae meItipita adikini yana manuwa anatoyavaga aditonagona.

2Aku Yaubada ani Yosefa nodi ada gilemelemena. Ada Yosefa gimiyamiya yana kauveya kwanaItipita yana manuwa wagaine, 3ada aimo yana kauveya-nai giitanuwagana banae Yaubada gilemelemena wagaine, yana gugai-dina adiiwakana ginuwanuwagadi. 4Ada Yosefa giveiwaka matatabuna banae matane ke giselakaina yana togugai tomaduboda ke givetonagona yana manuwa anatomiyayavo wagaidiya. Ada kaduwe givetumaganena ke giselakaina banae yana giba matatabuna aditoitaveyabina. 5Tayuwe tova-nai wagaine Potifali Yosefa gisena ke banae givetoveimeya yana manuwa anatomiyayavo ke yana giba matatabuna wagaidiya, ani kwanaItipita-nai yana manuwa anatomiyayavo Yaubada givebutu gilemelemedi faina Yosefa wagaine-deya. Ada Yaubada gilemelemena yana giba matatabuna, manuwa negenine ke bakula wagaidiya. 6E ada Potifali yana giba matatabuna giatuegena Yosefa nimane faina givetumaganena ke banae gina itaveyabidi, ada keke gida nuwanuwa gavana faine, aku kani gagana.

Aku Yosefa tubudonena ke aiwaka founa. 7Ada aimo yana kauveya vavinena giitaluvadigena, e ada seyana tova givonenaga, “Unaela, nodi kanadau.”

8Aku Yosefa givenikoi, givonena, “Uitana yaku kauveya givetumaganeku ada giseku vaita yana giba matatabuna aditoitaveyabina aku banae kadu keke tamo gavana faine gida nuwanuwa. 9Ada keke seyana gaito toveimeya lakaina manuwa taidei wagaine, aku iyayeku gagana. Kaduwe gaitoma matatabuna giatuege-yabuna ke iya gana veimeya, aku oyeni gagana keke, faina o vavinena. Tayuwe faine keke gida luboda koyona ganagai. Ida Yaubada matane dewa koyo-moena.” 10Aku vavine-nai yadayada seyana seyana Yosefa gilulumodovena vaita nodi inadau, aku Yosefa au bonana giawaegege-moena, ada tova moyaina givelovelovogena.

11Ada vavine tova moyaina tayuwe anafaiweya gidewadewa, aku seyana tova Yosefa giluku manuweya gina faisewa aku tova-nai wagaine keke tamo togugai nodi manuwa-nai wagaine. 12E ada yana kauveya vavinena ginau ke ananuya anakiwafi gikiveyabina aku givonaga, “Unaela nodi kanadau!” Ani Yosefa ananuya-nai gimadusegena vavine-nai nimane aku tauna giota giyegemona melaleya. 13Ada vavine-nai giitana vaita Yosefa ananuya nimane aku kaliva-moena bademowa gimadu giyegemona melaleya, 14au givebutu gikwekwekwela. Ada manuwa anatogugaiyavo ivemadumadu ielai wagaine ada nuya-nai gikilakaina aku givonediga, “Waitana! KwanaIbeliu togugai moganeku gialiyena ke ide gina kivevovomumuda. Giluku-elai wagaikuya evona nodi adadau ani gakwekwela. 15Ada yaku kwekwela wagaine giota giyegemona melaleya, aku ananuya taidei lilivakuya gimadusegena!”

16Ada togugaiyavo giifufuye-yabudi ke nuya-nai gisena aku gibodana moganena analaba gielai manuweya. 17E ada gielai ada kaduwe vavinena valeya-nai giluvagilena, givonaga, “KwanaIbeliu togugai ualiyena vaita gina vetogugai wagaideya ani gigaluvaluva gina kivevovomumuku. Giluku-elai wagaikuya evona nodi adadau ani gakwekwela. 18Ada yaku kwekwela wagaine giota giyegemona melaleya aku ananuya lilivakuya gimadusegena!”

19Ada Yosefa yana kauveya ginogalina vavinena giifufuyena gavaiyamu yana togugai gidewa wagaine, au nuwana gikoyo-mowa. 20E ada yana tolugaviya giveimeyedi ada Yosefa ikiveyabina ke inauwe deliya isena, wadedeku kini yana kaliva yogoyogodiyavo isesedi. Ada Yosefa wadedeku deli-nai wagaine gimiyamiya.

21Aku Yaubada Yosefa nodi ke gilemelemena e ada giveiwaka matatabuna deli anatoitaveyabina matane. 22Ada toitaveyabina-nai Yosefa givenuwadadanena ke banae kaliva yogoyogodiyavo deli wagaine aditoitaveyabina kaduwe gugai matatabuna bana anatoveimeya. 23Ada deli anatoitaveyabina keke tamo gavana faine gida nuwanuwa yana faisewa wagaine, faina Yaubada Yosefa nodi ke gilemena ada gugai matatabuna gigugaiyedi adiiwakana giyegemona.

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index