Search form

Ebavevuvu 43

Yosefa tawaganavo yadi na anavelu Itipita wagaine

1Tova tayuwe wagaine aimo loka lakaina gimiyamiya fafali moyaidi wagaidiya, 2ada Iyakobo yana gabuyavo nodi witi ikimonedi ani matatabuna ikani-yabuna. E ada givonedi, “Kaduwe wanayewa-vagila adaga maita wana kimone.”

3Aku Yuda tamana givonena, “Kamaku, kaliva-nai banae meItipita aditoveimeya givonema toyogina, givona, ‘Keke kaduwe magigiku wanaita-vagile kai keke taimi kwamaneya nodi wanaela.’ 4Ada kai Beniyamina una awaege nodi ananau, aga anaobu Itipita ke aa anakimone fainiya. 5Aku kai keke una awaegena mamauwe aga keke meyameyaganina anaobu, faina kaliva-nai givonema, ‘Keke kaduwe magigiku wanaita-vagile kai keke taimi kwamaneya nodi wanaela.’”

6Ada Isileli gitolidadanedi, givona, “Aku gavana faina kaliva-nai wagaine waawamogatala vaita kaduwe taimi seyana gimiyamiya? Imiyavo ani iya wakikivenuwavitaku.”

7Ani badi ilufata, ivonaga, “Kaliva-nai tauna gitoliuyeuyema taumeyavo faimeya ada yama gabu faine, givona, ‘Tamami aimo wayawaina gimiyamiya?’ Ada kaduwe givona, ‘Tamo taimi?’ Ada ime alufata yana tolidadana anafaiweya. Ime keke adaalamane vaita aimo gina vonaga, ‘Taimi wana aliyena wagaikuya.’”

8Ada Yuda tamana Isileli givonena, “Kwamana una awaegena iya nimakuya ke meyameyaganina anamadutauya, e ada oyeni, imeyavo ke natumeyavo biyabiyama nodi wayawaida kanamiya ada keke mafalavuga wagaine kana vealialika. 9Kamaku, gavonadabadaba aimo iwakana gana yewena. Iya aimo gana itaveyabi-dewedewena ada kaduwe ganayewe-aliyena wagainiya. Aku kai keke ganayewe aga tainei yaku koyona mataniya yawaiku matatabuna wagaine. 10Kai keke tova kada venuwaegege aga bademowa-deya tova luwei adanau ada adayewama.”

11Ada Isileli givonediga, “Kai keke tamo wai kaduwe gida miyami, aga taidei wana gugaiyena. Yada fafali anagaitoma iwakadi wanavaidi wana vedodoga yami veinuwana wagaidiya ke wana obuyena Itipita ke kaliva-nai wana velena yada nuwakabubu. Wanavaidi anafaiweya, mulamula, mawa, gidala magamagadina, bunama magana iwakana ada pisitakio guwana ke saida. 12Ada kaduwe siliva anavefofo wanavaidi, ke siliva-nai nagona yami baiki wagaidiya idododi ani wanavaidi wana nauwedi. Wada kai isidamanena. 13Kaduwe taimi wanaabina ke maduga-mowa wana mididi ada wanayewa kaliva-nai banae meItipita aditoveimeya wagaine. 14Gaveola Yaubada Totoyogi-vagaina wagaine vaita toveimeya-nai nuwana gina kiveiwakanena ke gina nuwakalikaliyemi, ada tubuiyami velugana gina etoyavuna ke Beniyamina gina awaege nodi wana yewaelai. Kai vita gana nuwagana natukuweyavo inaalika faina, aga auwe ganawaina. Keke tamo gavana kaduwe akufaiweya gana gugaiye.”

15Ada natunavo yadi nuwakabubu ke yadi siliva anavetutamwata ivaidi, ada kaduwe taidi Beniyamina ivagaulena ke maduga-mowa inau Itipita. Ada tova-nai iyegemona fafali-nai wagaine, inau Yosefa wagaine ke matane imididina. 16E ada taina Beniyamina giitana, au yana manuwa anatoitaveyabina givonena, “Badi kaliva-dina una abidi una nauwedi yaku manuweya, ada kevakeva una mununa ke una vetavoga, ada aa una kidewadewa. Kauwana givugivudiya badi iya nodi anakani.”

17Ada togugai-nai gigugai anafaiweya Yosefa giveimeyena mamauwe, ada kaliva-dina givagauledi ginauwedi Yosefa yana manuweya. 18Aku kaliva-dina inunuyegemona Yosefa yana manuweya ada imatauta, inuwanuwa ivona, “Gialiyeda idedeku faina nagona siliva idodoveyewadi yada baiki wagaidiya, e ani ina kiabida ke kana vetogugai yogoyogona aku yada donikiyavo inavaidi.”

19E ada inau manuwa anaebaluku wagaine ada togugai-nai ivonenaga, 20“Kauveya, vona velemoena nagona aobuelai idedeku aa kimone faina, 21aku yama siliva kaduwe idodoyewadi ada bade mala gibogi ayegemona manuwa ebaveyawai wagaine ke anaveyawai aku yama baiki aiyavuga ani seyana seyana yana siliva ginuwagana yana baiki wagaine. Ada kaduwe matatabuna ayewe-vagiledi aaliyedi. 22E aku kaduwe siliva maita lakaina aaliyena nuwanuwama aa anakimone-vagila. Keke adaalamane gaito yama siliva gidododi yama veinuwana wagaidiya.”

23Ada togugai-nai givona, “Ina iwakana. Keke wana matauta. Yami Yaubada Banae tamami yana Yaubada yami siliva gidododi. Iya bademowa yami siliva gavaina aa fatana tainei nagona waelai aa kimone wagaine,” e ada muliya ginau Simiyoni giabi gialiyena wagaidiya.

24Ada matatabudi giabidi gilukuwedi manuwa negenine ke gufa giveledi agedi ikoladi, ada gina yadi kevakevayavo givekanidi. 25Ada kaliva-dina inogalina vaita kauwana givugivudiya Yosefa ginaelai nodi inakani, e ada yadi nuwakabubu ikidewedewedi aimo ina velena faina.

26Tova-nai Yosefa gielai manuweya, tubuiyanavo yadi nuwakabubu ivelena ada matane iiboula-mowa babi wagaine.27Ada Yosefa tubuiyanavo gitolidadanedi, givonediga, “Imi gavaiyamu, iwakamiyavo? Gavaiyamu tamami nagona wavoneku faine, aimo gimiyamiya?”

28Ani ilufata ivona, “Ya togugai, tamama aimo wayawaina gimiyamiya.” Ada ioduvemoimoina wagaine.

29Ada Yosefa giitadadana ani taina Beniyamina giitana, banae nodi inadi seyana, ada gitolidadanedi, “Idogamenai taimi-nai faine nagona wavoneku?” Ada givonena, “Natuku, gaveola vaita Yaubada yana nuwadogeya gina lemeni.” 30Aku Yosefa nafona tagiya gilubudabudalina taina faine ada giwaiviviye giluku yana tutulagolota wagaine gitagiya. 31Gitagiya-yabu, magigina gikolana, ada giatuvefailina aku giyegemo gielai ke givona yana togugai wagaidiya, givona, “Aa wanaaliye wanasena ke anakani.”

32Aku bana anakaibe anaga isena, tawaganavo adiloi adiga isena, ada meItipita kaduwe adiloi adiga isena. Faina meItipita adigiduwa anafaiweya keke meIbeliu nodi inakani, wada koyo-moena matadiya. 33Ada Yosefa togugaiyavo givonedi ke tubuiyanavo iveiyotodi matane yadi tubuga anafaiweya, tomoinagona wagaine givevuvu ada ginau kwamaneya wagaine giluyabu. Ada tubuiyanavo nuwadi givoganina ke taudiyavo iveitaita. 34Ada Yosefa yana tebeli wagaine aa feleiti seyana seyana iveledi tubuiyanavo, aku Beniyamina anakaibe anaga feleiti nimafafalina anafaiweya. Ada matatabudi ikani ke iyuga wayadi vemwamwala lakaina Yosefa nodi.

Ebavevuvu, Mosese yana buki nagona

© Wycliffe Bible Translators, Inc. All rights reserved.

More Info | Version Index